ZAJ NYEEM HNUB TIM 3 LUB 3 HLIS 2025
HNUB OB, LIS PIAM 8 CAIJ NYOB NRUAB XYOO
(NXL 17: 24-29; MK 10: 17-27)
Kwv tij Hmoob sawv daws, hnub no peb hnov hais tias muaj ib tug hluas xav tau txoj sia nyob mus li ces nws thiaj tuaj thov Huab Tais Yes Xus pab qhia rau nws paub. Lo lus Huab Tais Yes Xus hais rau nws mas yog lo lus tias “Koj txhob tua neeg, txhob zes luag txij luag nkawm, txhob ua tub sab, txhob ua tim khawv cuav, txhob ua luam cuav, hwm koj niam koj txiv.”
Peb pom tias cov lus Huab Tais Yes Xus hais no yog nyob hauv Huab Tais 10 Lo Lus Qhia.
Tus hluas hnov cov lus no mas nws hais tias txij thaum yau los mas nws yeej coj rawv cov lus ntawd tag tib si. Huab Tais Yes Xus hnov tus hluas cov lus mas Huab Tais Yes Xus nyiam nws vim nws yeej yom ib tug neeg zoo tiag thiab nws yeej nyiam Tswv Ntuj tiag mas nws thiaj ua tau raws li cov lus qhia.
Huab Tais Yes Xus xav kom nws ua ntau dua qhov ntawd, xav kom nws tau txais paj tshab ntau dua txoj sia nyob mus li; yog Tswv Ntuj lub Ceeb Tsheej, ces Huab Tais Yes Xus thiaj hais kom nws los raws Huab Tais Yes Xus qab.
Kwv tij, tus raws tau Huab Tais Yes Xus mas nws yuav tso txhua yam tseg raws li lo lus Huab Tais Yes Xus hais rau tus hluas no tias “Koj mus, koj muab koj lub cuab tam muag, koj muab tus nqi pub rau cov pluag ces koj los raws kuv.”
Thaum tus hluas hnov li no mas nws ua ntsej muag ntshaus tas vim nws tseem tso siab rau nws lub cuab tam, nws tseem muab nws khi rau cov cuab tam, nws ua siab tso tsis tau.
Zaj no zoo qhia peb tias txojsia nyob mus li tsis yog tus raws Huab Tais Yes Xus xwb thiaj yuav tau, tus neeg zoo hwm ntuj hwm neeg mas nws yeej tau txais txoj sia nyob mus li ib yam li tus neeg raws Huab Tais Yes Xus.
Tab sis tus yuav tau Tswv Ntuj lub Ceeb Tsheej los ua nws tug, kawg yog tus txiav siab tso txhua yam khi nws cia pov tseg, nws tsis muab qhov ub qhov no los ua chaw khuam nws cia, nws tsuas tso siab rau Huab Tais Yes Xus thiab zoo siab pub yam nws muaj rau tus tsis muaj.
Hnub no, peb hais tias peb ntseeg txog Yes Xus, txhais tias peb tso siab rau Huab Tais Yes Xus, peb raws Huab Tais Yes Xus qab lawm tiag; yog li peb puas tseem saib lwm yam loj thiab tseem ceeb dua Huab Tais Yes Xus, peb puas muaj ib lub siab nyiam luag tej ib yam li peb nyiam peb tiag.
Kwv tij, Huab Tais Yes Xus hais tias kev mus hauv Tswv Ntuj lub Ceeb Tsheej yog ib yam nyuaj kawg rau tib neeg tab sis kuj yooj yim kawg rau tus neeg qhib siab txais Huab Tais Yes Xus thiab tso siab rau Huab Tais Yes Xus xws li cov me nyuam.
Li ntawd mas kwv tij Hmoob, peb ua neeg zoo mas peb tau txoj sia nyob mus li lawm, peb tsum nrhiav Tswv Ntuj lub Ceeb Tsheej thiab mas thiaj tsim nyog rau peb txoj sia nyob mus li mog.
