Lub kim txwv ntawm Ntoo Cuam.
Peb mus saib nyob hauv phau ntawv His Xas Lais Liv Xwm, peb yuav pom tas txhua lub teb chaws tshwm sim thiab muaj meej mom hauv lub caij ntaus tsam yeej. Dhau ntawd thaum txog lub caij poob tsim, cov teb chaws ntawd puas tsuaj, thiab txhua lub teb chaws nyob hauv ntiaj teb no kuj zoo ib yam li ntawd. Yog kev ploj, tsuas tshuav cov ntshav, kev nco cia hauv tsov rog, kev phem thiab kev tsim txom uas piav tsis tau xwb. Peb kheev kheev rov nug tus kheej tias : “Puas muaj ib lub ceeb tsheej twg tsis muaj hnub puas tsuaj ? Peb yuav muab peb lub neej tso rau lub ceeb tsheej twg, kom tso siab tias peb yuav tsis muaj kev tu siab ? Tswv Ntuj cov lus hauv hnub no teb cov lus nug no tau meej kawg, vim Yes Xus muab lub ceeb tsheej nyob mus li txawb pem peb hauv ntej lawm. Lub ceeb tsheej Yes Xus muab rau peb thiab nws kuj hais txog lub ceeb tsheej no txij thaum nws pib ua lub neej nrog ib zeej tsoom neeg los lawm. Qhov tseeb tiag lo lus no yog lub ntsiab tseem ceeb nyob hauv Yes Xus cov lus qhuab qhia. Tus vaj zoo li no yog li cas tiag ? Nkag siab nyuab kawg. Nej nco puas tau qhov uas Yes Xus nrog Pis Las Tos tham, nws ntxhov npaum li cas ? Nws tsis paub tias Yes Xus tab tom hais txog lub ceeb tsheej twg ? Nws tsuas paub txog lub teb chaws Tis Npes Lias xwb. Hais txog lub zog ntawm cov tub rog Los Mas, mas Yes Xus tsis muaj tub rog li. Tsuas muaj 12 tus neeg ntes ntses nrog nws thiab ob peb tug poj niam xwb. Tsis kav ntau zaus Yes Xus cov Thwj Tim tsis nkag siab.
Sim xav seb Yes Xus cov Thwj Tim kheev kheev poob hauv kev sib tw ntawm txhua lub teb chaws hauv ntiaj teb no thiab lawv raug ua phem kawg. Yog qhov tsis haum nrog lub ceeb tsheej uas Yes Xus hais rau peb. Peb nyob hauv ntu kawg ntawm cov kab ke, thiab ntu kawg hauv Lus Kas ntawv Moo Zoo uas nyob rawv nrog peb hauv lub xyoo no. Hauv qhov pib Lus Kas tau hais txog 3 lo lus ntxias uas raws nraim Yes Xus nyob hauv nws lub neej. Ib yam nyob hauv 3 yam kev ntxias dag no yog hais txog dab phem cov lus ntxias Yes Xus, kom Yes Xus tawm tsam lub ntiaj teb no. “Kuv yuav muab cov ceeb tsheej ntawd lub peev xwm thiab lub koob meej huv tib si rau koj. Yog koj txhos caug pe kuv, mas tej ntawd yog koj tug huv si.” Cov lus dab phem tau hais tag los yog qhov tias : “Yuav xav txog tus kheej, vim kev sov siab. Koj yuav sawv ntseg muaj hwm chim thiab muaj meej mom. Yog tias koj pluag thiab koj qaug zog, mas koj lub npe yuav raug rho kom ploj mus hauv cov liv xwm.” Ntawv Ntshiab hnub no lub tswv yim phem no tau tawm los, thiab peb tau hnov nyob hauv neeg cov lus tiag tiag. Nov yog kev muab siab rau zaum kawg ntawm dab phem, uas xav ntxias Yes Xus tawm ntawm lo lus yuav tsim lub ceeb tsheej txawv neeg lub ceeb tsheej. Cov lus hauv Ntawv Ntshiab tau qhia txog qhov tshwm sim hauv Yes Xus kev ua vaj. Thiab tom qab cov xwm txheej no, yuav tsis muaj qhov nkag siab yuam kev ntxiv lawm. Yes Xus lub ceeb tsheej yuav tsis cuam tshuam txog ntiaj teb lub ceeb tsheej ntxiv mus, thiab peb raug caw kom ua tus xaiv. Thov peb mloog tom qab lawv muab Yes Xus ntsia saum Ntoo Cuam, tas ib tsoom neeg sawv ntsia ntsoov. Tab sis cov thawj coj hnyos Yes Xus thiab lawv hais tias : “Nws cawm tau luag tej. Yog tias nws yog Tswv Ntuj Leej Pleev thiab tus xaiv tiag, kom nws rov cawm nws mas !” Cov tub rog kuj thuam Yes Xus, lawv cev ib co dej qaub rau Yes Xus, lawv hais tias : “Saib koj yog cov Yus Das tus vaj no, koj cia li cawm koj mas !” Tseem muaj ib co npe ntawv sau nyob siab me ntsis saum Yes Xus taub hau hais tias : “Tus no yog cov Yus Das tus vaj.”
Zaj peb nyuam qhuav hnov ntawd, ua kom pom tias kev tsa ua vaj txawv peb txoj kev tsa ua vaj. Lub ceeb tsheej Yes Xus hais rau peb yog dab tsi ? Thov peb nco ntsoov tias hauv qhov chaw ua cov kab ke ntawd tsis yog chav tsev loj dav rau lub kim txwv, tab sis nws yog lub roob Nkos Nkos Tas. Yog qhov chaw qias neeg nyob ntawm sab phab ntsa ntshiab sab nraud. Nyob ntawd yog qhov chaw tua neeg. Nyob ntawd cov neeg raug Tswv Ntuj tsawm yuav raug ntsia saum Ntoo Cuam. Thiab qhov lawv xaiv thaj chaw no, vim nws nyob siab dua zoo li lub sam thiaj ua yeeb yam. Yog kev ua yeeb yam uas tsim nyog rau txhua tus neeg dhau mus dhau los ntawm lub nroog lub rooj vag tau ua pov thawj txog. Tsis yog qhov Lus Kas lam siv xeem lus Hes Las uas pom nyob hauv Ntawv Ntshiab. Hauv Ntawv Cog Lus Tshiab lo lus tias ‘pom zoo’ tsis raug siv dua li. Tab sis qhov tseeb yog hais txog kev ua tawm uas tsis tau pom dua. Nov yog kev ua uas tab tom ua nyob saum lub sam thiaj ntawd, yog lub roob Nkos Nkos Tas. Thiab Lus Kas xav kom sawv daws ua pov thawj txog kev ua yeeb yam no. Vim Tswv Ntuj nyob saum lub sam thiaj ntawd. Tswv Ntuj tau ua tawm tag nrho nws cov hauj lwm nto koob meej. Nws tau ua tawm txog nws lub ntsej muag tseeb tiag. Thiab thaum xaus kev ua yeeb yam, peb txhua tus raug thov kom rhuav tshem Tswv Ntuj tus yam ntxwv uas tsis haum rau nws nyob saum lub roob Nkos Nkos Tas tawm hauv peb lub siab mus. Tswv Ntuj lub rooj zaum yog Ntoo Cuam. Lus Kas thov kom peb rhuav tshem lub kim txwv uas peb teeb tseg rau Tswv Ntuj, vim Tswv Ntuj tsis tau nyob ntawm lub kim txwv peb xav. Nws lub rooj zaum yog Ntoo Cuam. Ntawm lub kim txwv ntawd Tswv Ntuj tsis tau txib, tab sis yuav mloog nws tus yam ntxwv hauv Tswv Ntuj tus uas yog kev nyiam kev hlub. Kev zoo yog kev zoo xwb. Ntawm lub kim txwv saum Ntoo Cuam ntawd, yog nws qhov chaw zaum ci ntsa iab uas yuav txiav txim rau peb txoj sia.
Rab pas nrig ntawd nyob qhov twg ? Rab pas nrig uas txhua tus tswv tuav nyob hauv lawv tes. Rab pas hlau uas dai tej yam zoo nkauj muaj nqis. Tiag tiag mas rab pas nrig tsuas yog rab pas ua kom pom txog lub hwj chim ntawm cov tswv kav, thaum lawv siv los ntaus leej twg kuj xij, cov uas yog neeg cam thawj. Tab sis hais txog ntawm Tswv Ntuj, mas nws yog lub Cim ntawm lub hwj chim. Yog kev ntshai uas cov ua tswv txhawb nqa tau. Yes Xus lub ntsej muag raug ntsia hlau ntsia, lawv tsis tau kov ib rab pas twg uas yog cov thawj coj nyob thoob ntiaj teb tuav. Tus uas ib txwm tawm tsam, nws tsis tawm tsam leej twg. Nws raug tawm tsam thiab yuav tsis muaj qhov ua pauj. Nws tsis muab txim rau tus neeg ua txhaum. Nws lub tsho zoo nkauj ntawm kev ua vaj nyob qhov twg ? Tsos tsam xem uas nws cov thwj tim feem ntau yuav khav txog tom qab, cov uas tsis nkag siab nws cov lus hais txog lub ceeb tsheej tshiab. Tsis muaj cev khaub ncaws ua vaj, Yes Xus liab qab, Yes Xus pluag. Tab sis nws yog tus tau txais koob hmoov los ntawm qhov tsis tshuav dab tsi li, vim nws tso tas txhua yam pov tseg. Nov yog kev sov siab uas Yes Xus muab rau peb. Cov neeg pluag txom nyem yog cov tsis muaj dab tsi li, vim lawv tau tso tas txhua yam pov tseg lawm. Peb lub neej muaj nqis, yog thaum peb ua tau li Yes Xus. Thaum peb liab qab xws li Yes Xus, vim peb tau tso tas txhua yam Tswv Ntuj muab rau peb pov tseg. Thiab peb muab hloov ua kev nyiam peb cov kwv tij.
Hauv qab Ntoo Cuam tsis muaj ib lub Cim uas yog cov tub rog tuav riam tuav hmuv hwm tus vaj. Qhov tseeb cov tub rog tsuas yog nyob ntawm Ntoo Cuam ko taw. Tab sis lawv tsis yog nws cov tub rog. Yes Xus hais rau Pis Las Tos tias ; yog peb lub ceeb tsheej teeb raws li ntiaj teb no tus qauv, mas yog tuaj ntawm tiam neeg Tis Npes Lias tuaj, ces Pis Las Tos ntseeg. Ua ntej Pis Las Tos, mas Yes Xus twb xub qhia Pob Zeb lawm tias ; lub ceeb tsheej tshiab tsis raug txhim nyob hauv lub ntiaj teb no. Yes Xus tuag nrog ob tug tub sab uas raug txiav tsim zoo li nws. Nws yog tus nyob nruab nrab. Tsab ntawv sau mus rau cov Hes Nplaws piav meej kawg txog Yes Xus tus uas yog peb kwv tij, thiab tsis txaj muag txog qhov yuav hu ob tug neeg ntawd ua Yes Xus kwv tij. Thov kom peb xav tias tus Yes Xus uas peb pom nyob saum lub roob Nkos Nkos Tas, tus uas peb tab tom ua xyem xyav ntawd, nws txawv qhov peb xav. Thaum Tswv Ntuj Leej Tub tuaj thiab nthuav nws lub ntsej muag rau peb nyob ntiaj teb no. Thaum Yes Xus yees tawm tuaj, mas thawj pab neeg nyob rawv ntawm Yes Xus ib sab. Thiab cov uas Yes Xus tsis txaj muag hu lawv ua kwv tij, yog cov neeg txheej qis hauv lub teb chaws, yog cov neeg zov yaj. Tom qab Yes Xus sawv rov los, nws nyob xyaw cov neeg txhaum hauv lub Cim Ntxuav. Tab txawm tus ua lub Cim Ntxuav kuj ua xyem xyav thiab hais tias : “Koj tsis tau nyob hauv kev txhaum, koj yuav tsum nrog cov neeg ncaj ncees nyob.” Tab sis Yes Xus yog tus coj kev ncaj ncees tshiab tuaj. Nov yog tus Tswv Ntuj uas tau tshwm sim nyob saum lub roob Nkos Nkos Tas. Nws sawv nyob nruab nrab hauv ob tug tub sab. Nov yog peb tus Tswv Ntuj. Lub mom kub yog kauj pos thiab tsis muaj tub txib, tsis muaj tus pab los tsis muaj tus qhev yuav quaj qw pe hawm nws nyob saum lub roob Nkos Nkos Tas. Hauv qab Ntoo Cuam muaj ib pab neeg sawv ntsia thiab lawv tsis quav ntsej txog yam tshwm sim. Lawv xav tsis txog tias tus neeg uas ib txwm ua zoo, yuav tuag txom nyem ntsuav li no. Nws raug tua tuag yam tsis muaj kev ua dab tsi pauj. Tom qab ntawd, Lus Kas tau sau tseg tias :
“Cov neeg tuaj sawv ntsia cov xwm txheej no, puav leej rov xav txog yam lawv tau pom thiab qhov lawv tu siab.” Nov kuj yog kev tu siab uas xa tuaj txog peb ib yam. Tom qab saib Ntoo Cuam lawm, tsim nyog peb yuav ncaim mus nrog kev tu siab uas tau ua txhaum rau Yes Xes nyob hauv peb txoj kev xav. Hauv lub hnab looj peb ntsej muag nyob ntawm Yes Xus xub ntiag. Cov neeg no yog cov sawv cev ntawm cov neeg xav zoo thiab xav nkag siab txog Tswv Ntuj lub ceeb tsheej, tab sis lawv tsis nkag siab.
Cov thawj coj tsoom pej xeem sawv nyob ntawm taw Ntoo Cuam thiab hnyos Yes Xus tias : “Nws cawm tau luag tej. Yog tias nws yog Tswv Ntuj Leej Pleev thiab tus xaiv tiag, kom nws rov cawm nws mas !” Cov thawj coj no yog cov tuav lub luag hauj lwm tiag tiag, cov uas lawv kav lub ceeb tsheej qub, yog cov ua tswv kav thiab cov uas tsis xav kom lub ceeb tsheej qub puas tsuaj nrog lawv lub hwj chim. Lawv hnyos Yes Xus tias ; yog nws lub ceeb tsheej muaj txiaj ntsim, muaj yav tom ntej, ua cas Yes Xus ho tsis nqes saum Ntoo Cuam los ? Vim Yes Xus tsis tau ua hwj huam yees ntxwv, tab sis lawv ntseeg nws. Tej zaum nov yog qhov uas peb tus kheej xav ib yam. Hais ncaj tias yog thov kom Yes Xus nqes saum Ntoo Cuam los, thiab ua kom cov ua phem rau nws raug pauj. Tab sis nov yog tus Tswv Ntuj uas tsis muaj nyob tiag, vim nws tsis haum nrog yam uas peb pom nyob saum lub roob Nkos Nkos Tas.
Tus Yes Xus nyob saum lub roob Nkos Nkos Tas, yog tus Yes Xus uas hlub thiab nyiam sawv daws. Tab txawm yog cov tiv Yes Xus, thiab cov tsis ntseeg Yes Xus cov lus, lawv thuam Yes Xus, tsis kav Yes Xus kuj tseem hlub thiab nyiam lawv. Nws zam txim rau lawv, vim nws yog tus cawm seej.
Dab phem qhov kev thov yog kom thim rov qab thiab rov mus cuag nws, yog los ntawm cov thawj coj no lub qhov ncauj. Dab phem tseem hais ntxiv tias : “Koj rov pab koj thiab siv tas koj lub peev xwm los ua kom pom txog lub zog, ces sawv daws yuav ntseeg koj.” Tab txawm yog cov tub rog, tsis kav lawv kuj thuam Yes Xus. Lawv muab kua qaub cev rau Yes Xus, tab sis nws tsis chim rau lawv. Yes Xus paub tias lawv yog cov neeg pluag txom nyem uas ncaim ntawm lawv tsev neeg thiab lawv daim av. Lawv raug ntiav kom ua phem rau cov neeg muaj xeem lus, muaj kab lis kev cai thiab kev ntseeg sib txawv. Lawv nyob nrug deb lawv tsev neeg, thiab lawv tej poj niam me nyuam. Cov tub rog no lawv tsis muaj txoj kev ua neeg, lawv thiaj muab lawv tej kev tag kev cia siab coj los ua rau cov neeg tsis muaj zog. Lawv caij tsuj cov neeg pluag txom nyem. Lawv tus kheej poob hauv lub ceeb tsheej txheej thaud tej kev ntxias dag, uas muaj qhov tawv thiab qhov phem yog qhov tseem ceeb. Lawv raug qhia kom ntseeg txog lub zog xwb. Cov tuav ntaj tuav hmuv, lawv hwm tus yeej thiab hnyos tus neeg swb. Yes Xus dai saum Ntoo Cuam, yog kev sawv nyob ntawm tus neeg swb ib sab. Nyob saum Yes Xus taub hau muaj ib cov npe ntawv sau tias : “Nov yog cov Yus Das tus vaj.” Pis Las Tos tsis paub txog qhov no, tab sis nws hais qhov tseeb. Yes Xus yog tus ua kom Ntawv Ntshiab tsheej xeeb. Nws yog tus vaj uas tos ntshis txog, tab sis cov neeg uas lawv paub Ntawv Ntshiab zoo ntawd yuam kev. Lawv tseem xav txog tus Mes Xias raws li qhov lawv xav, thiab qhov lawv xav tsis yog Tswv Ntuj. Peb pom Tswv Ntuj tus Mes Xias nyob saum lub roob Nkos Nkos Tas. Ntawd yog tus Mes Xias cawm kom peb dim hauv peb tus kheej txoj kev xav, thiab qhib siab tos txais kev nyiam kev hlub nyob hauv peb cov kwv tij. Tej zaum kuj yog hais txog tus ua kom peb sib ncaim thiab. Lus Kas tus sau ntawv Moo Zoo tau hais txog lub kim txwv tshiab ntawm tus Mes Xias uas yog Tswv Ntuj Leej Tub. Thiab nyob ntawm no peb yuav xaiv nyob ntawm Yes Xus ib sab los nyob ntawm ob tug tub sab ib sab. Ib qho nyob hauv yuav nco tias peb yog ib feem ntawm lub ceeb tsheej qub, yog lub ceeb tsheej siv lub hwm chim thiab kev phem. Tam sim no nws yuav txhawb nqa lub ceeb tsheej tshiab. Peb hnov ib tug tub sab dai saum ntoo cuam tsawm Yes Xus tias :
“Koj tsis yog Leej Pleev lod ? Koj rov cawm koj thiab cawm wb mas !” Tab sis lwm tus tub sab cem nws tias : “Koj tseem tsis ntshai Tswv Ntuj lod ? Koj twb raug tib lub txim zoo li nws thiab ! Wb mas, wb lub txim yog txoj kev ncaj, vim wb tau ua tej yam tsim nyog raug txim. Hos nws tsis tau ua dab tsi phem li.” Ces Yes Xus hais rau tus hais cov lus ntawd tias : “Kuv hais tseeb rau koj : hnub no, koj yuav nrog kuv nyob hauv lub Nras Lom Zem.”
Tus tub sab kawg tig mus saib Yes Xus thiab hu Yes Xus lub npe. Ib tug phooj ywg hnov nws lub suab hu, tab sis nws tsis tau hu Yes Xus tias Tswv Ntuj. Vim tam sim no nws qhov muag qhib thiab paub txog Tswv Ntuj lub ntsej muag tseeb tiag. Tswv Ntuj hlub nws, ces nws pom tias nws yog phooj ywg mus kev ua ke thiab tsis pom txog qhov nws nyiam. Tab sis nws tsis raug tus Tswv Ntuj no rau txim. Zaj hais txog tus tub sab no, yog sawv daws zaj. Puas muaj ib tug neeg twg nyob hauv peb uas tsis tau ua txhaum dua, thiab tsis tsim nyog tau txais Tswv Ntuj lub ceeb tsheej ? Tab sis lub ceeb tsheej no yog Tswv Ntuj muab rau peb, vim nws txoj kev nyiam kev hlub. Tswv Ntuj tsis tau txiav txim tias leej twg zoo los leej twg phem. Nws pub kev nyiam kev hlub tsis muaj kawg rau txhua tus.
Kwv tij Hmoob sawv daws ! Hnub no peb tham txog lub kim txwv ntawm Ntoo Cuam los xaus li no. Thov Huab Tais Yes Xus Pleev lub txiaj ntsim nrog nej nyob, ua nej siab kaj lug ! Lwm zaus peb mam sib ntsib dua, nej sawv daws nyob zoo !
