Txoj kev teev hawm tus Tswv Ntuj rov raug txhim kho dua tshiab. Yav thaum ub txij li Huab Tais Yes Xus tsis tau tuaj qhia tshiab, mas neeg yeej siv tsiaj txhu los tua hlawv txi Ntuj. Vim neeg lub siab lub ntsws nyiam cev tej yam uas yog neeg tug los cev rau Ntuj, los thov txiaj ntsim ntawm Ntuj. Ntawm dab los ib yam thiab. Qhov no mas muaj txij puag thaum thawj ob kwv tij pib ua neej, es nkawd mus muab tsiaj thiab txhiam xws noj los hlawv txi Ntuj los lawm. Vim li ntawd mas nyem no peb Hmoob thiaj tseem siv tsiaj txhu los pauj dab los txog nyem no.
Tab sis txij li thaum Yes Xus rov tuaj qhia dua tshiab kom los hawm Tswv Ntuj lub siab, mas nws tau los tsim dua txoj kev txi Ntuj txawv yav thaud lawm. vim tsis siv tsiaj txhu los hlawv cev rau Ntuj lawm, vim Ntuj tsis nyiam ua li ntawd lawm. Thaj txi Ntuj uas yog ntxim Tswv Ntuj siab mas yog raws li Yes Xus tau qhia rau cov thwj tim ua, uas yog hmo kawg, pluas mov kawg. Nws tau muab mov thiab cawv uas yog neeg ua los noj, los thov Tswv Ntuj foom hmoov rau kom nqa txoj sia thiab Ntuj lub txiaj ntsim tuaj rau neeg xwb. Nws tsis kom muab tsiaj txhu los txi lawm, yog li nyem no peb thiaj tsis coj tsiaj txhu mus txi Ntuj lawm.
Tseem ceeb Ntuj xav kom peb muab peb lub siab lub plawv, peb tej hauj lawm, peb tej txhiam xws noj mus cev rau Ntuj kom nws tej txiaj ntsim uas peb tos ntawm nws nqes los rau hauv lub ncuav mov, thiab cov cawv uas peb yuav tau noj los yug peb lub cev, peb txoj sia thiab peb tus ntsuj plig; kom peb tau nrog nws Leej Tub Yes Xus txais tau txoj sia sawv hauv txoj kev tuag los dua tshiab zoo ib yam li Yes Xus uas nws twb sawv los ua peb ntej lawd.
Vim Yes Xus yog tus tuag los txi rau Leej Txiv kom tau muab txoj sia rov rau neeg. Thaj txi Ntuj uas Yes Xus tau ua hmo noj plawv mov kawg ntawd yog cov mov nqa txoj sia rov rau neeg, tab sis tus tuag txi Ntuj kom tau muaj txoj kev sawv rov los mas yog Yes Xus, yog li peb thiaj hais tias ‘Yes Xus lub cev thiab cov ntshav yog cov mov nqa txoj sia tuaj rau neeg, kom rov sawv tau los ua dua lub neej tshiab rau hauv lwm tiam.’ (MT 5 : 17)
Yes Xus qhia tias yuav teev Ntuj nyob rau qhov twg? ‘Lawv hawm Leej Txiv nyob hauv lub tswv yim thiab nyob hauv txoj kev tseeb.’ (Z 4 : 23) Tseem ceeb yog teev Ntuj nyob hauv yus siab thiab yus lub tswv yim, vim Tswv Ntuj tsis xav txais tej yam uas yog pauj rau nws. Nws xav txais neeg lub siab zoo thiab nyiam Tswv Ntuj, nyiam tas tsoom neeg sawv daws nyob hauv Tswv Ntuj txoj kev nyiam uas nws zoo siab tsim kom muaj neeg los nyob ze nws.
Kev teev tus Tswv Ntuj tsis yog yuav them ib tug tsiaj los ib rooj qav pauj rau Ntuj noj vim Tswv Ntuj twb tau pab yus lawm. Tsis yog li ntawd lawm, Tswv Ntuj twb yog tus pub noj pub haus rau peb lawm, tsis yog nws yuav tos ntawm peb, yog peb yuav tos ntawm nws xwb. Vim Tswv Ntuj tsis pluag noj pluag haus zoo li cov dab, es yuav tos kom peb pauj rau noj rau haus raws li nws tau pab peb ntawd. Tswv Ntuj tos kom peb cev peb lub siab zoo, hwm Tswv Ntuj thiab hwm luag tej xwb ces Tswv Ntuj zoo siab kawg yog vim nws pom peb sib hlub nyob hauv nws.
Tswv Ntuj yog tus ntshiab tiag, yog tus muaj kev nyiam, kev thoob tsib kawg nkaus; uas peb neeg yeej ntsuas tsis tau thiab paub tsis txog Tswv Ntuj lub tswv yim thiab nws tej kev thoob tsib li.
Peb thiaj yuav thov kom nws pub nws tej txiaj ntsim tuaj cawm peb thiab pab peb xwb. Peb kev teev Ntuj mas txawv kev teev dab nyeg lawm deb kawg nkaus.
Vim Tswv Ntuj yog tus muaj hwj chim, muaj txiaj ntsim rau tas ib puas tsav yam kom muaj txoj sia thiab hlob tuaj thiab ua lub neej zoo rau Tswv Ntuj nyiam xwb.
Peb tsuas yog thov ntawm Tswv Ntuj xwb, tsis muaj ib yam uas Tswv Ntuj yuav thov ntawm peb; tsuas yog thov kom peb hwm nws, nyiam nws rau hauv lub neej, lub siab thiab ua nws tsaug xwb.
