Peb cov ntseeg mas tsis hu plig lawm, vim peb ntseeg hais tias neeg tus plig yog neeg lub tswv yim nrog rau neeg txoj sia nyob ua ke ua hauj lwm hauv neeg lub cev lub siab tib si. Yog tias neeg tus plig poob los tawm ntawm neeg lub cev mus mas neeg txoj sia yuav tsum tsis muaj lawm. Vim peb tus neeg tseem muaj txoj sia nyob, mas nws tus plig tseem nyob. Peb thiaj tsis hu plig. Tab sis peb tus plig, lub cev, txoj sia mas yeej tshaib nqhis txog Tswv Ntuj lub txiaj ntsim tuaj pab cawm lawv thiab ntxiv zog rau lawv tiag. Yog li peb thiaj yuav thov Ntuj lub txiaj ntsim los pab xwb.
Peb thiaj muaj kev thov Ntuj lub txiaj ntsim foom hmoov los rau saum tus neeg, ces peb thiaj khi tes rau nws. Tab sis peb khi tes mas yog hu txog Tswv Ntuj lub npe thiab thov txiaj ntsim los rau tus neeg xwb. Peb tsis hu txog ib tug dab los pov hwm nws, los yog hu tus plig kom rov los rau hauv nws.
Peb yuav tsis khi li thaum tseem coj dab lawm, es yuav hais txog plig ub plig no, los yog hais txog nkawm niam txiv dab kab yeeb xyab lawm. Peb tsuas yog thov Ntuj pab xwb.
Vim peb me nyuam neeg, mas peb tsis muaj hwj chim, muaj koob hmoov. Tus muab koob hmoov pab neeg tau, mas yog tus tsim neeg. Vim nws thiaj yog neeg txoj sia, nws thiaj cawm tau neeg. Peb mas peb tsuas yog nrog thooj siab koom ntsws ua ke thov ntawm Tswv Ntuj ces peb cov lus thov yuav haj yam muaj zog mus txog Tswv Ntuj dua ib leeg thov xwb. Raws li Huab Tais Yes Xus hais qhia rau peb tias : “Kuv hais tseeb rau nej tias : yog muaj ob leeg hauv nej koom suab thov dab tsi nyob ntiaj teb no, mas kuv Txiv nyob saum ntuj yuav pub yam ntawd rau nkawd. Thaum ob leeg los peb leeg sib sau ua ke tuav txog kuv lub npe, mas kuv nyob hauv nruab nrab lawv.” (MT18:19-20)
Peb thiaj tso siab tias thaum peb coob leej ua ke thov lawd, mas peb cov lo lus muaj nqes ntau dua, vim Tswv Ntuj yuav pab peb raws li peb thov ntag.
Thaum khi tes, peb yuav xub hais ib co lus thov Ntuj ua ntej, thiab hais zaj peb txiv nyob saum Ntuj, zaj koj nyob zoo Mab Liab tso mam khi tes.
Yuav muab cov hlua los tuav, thiab thov Ntuj foom hmoov rau cov hlua, ua Ntoo Cuam Lub Cim rau saum cov hlua. Mam muab faib rau sawv daws coj mus khi.
Cov lus hais thaum khi mas nyias hais raws li nyias lub siab nyiam, yam li yus thov Ntuj ywj yus siab. Tsuas yog thawj lo lus qhib hais thiab lo lus xaus mas thiaj yuav hais zoo li no :
Kuv hu txog Leej Txiv thiab Leej Tub thiab Leej Ntuj Plig lub npe;
thov......................................................................................................................
Tswv Nyuj nrog koj nyob ua koj siab kaj lug. Ua li.
Tom qab khi tes tas thov Ntuj foom hmoov rau phaj khi tes thiab rooj mov, mam li tsaws lub phaj khi tes rau tus neeg txais.
