Peb lub cev nqaij daim tawv nws tsis txawv dua tej tsiaj txhu thiab xyoob ntoo. Yog hais txog sab muaj txoj sia thiab lub cev nrog, mas zoo ib yam nkaus. Tab sis muaj ib qho txawv nyob hauv neeg uas tsis zoo li tsiaj txhu thiab xyoob ntoo, yog qhov tias Ntuj tsim peb muaj tus ntsuj plig nrog peb lub cev.
Tus ntsuj plig yog dab tsi? Ntsuj plig yog ib lub tswv yim ua kom peb txawj xav thiab yog ib lub tswv yim ntse txawj tsim thiab ua ub ua no txhim kholub ntiaj teb no kom vam meej zuj zus, thiab yog lub tswv yim kav peb lub cev kom txawj xaiv qhov phem qhov zoo. Lub tswv yim no yog Ntuj yeej pub los nrog peb lub cev, lub hlwb; thiaj hais tau tias yog peb tus ‘plig’.
Peb tus plig kuj nrog peb lub siab thooj ua ib lub tswv yim nyob rau hauv peb lub cev. Peb tus plig txawj tawm ntawm peb lub cev mus, yog zoo li thaum peb txoj sia tu lawm ces peb tus plig yuav tsum tawm ntawm peb lub cev mus xwb.
Vim li cas peb thiaj pom tsis tau peb tus plig? Vim yog Tswv Ntuj yeej tsim peb tus plig zoo li Tswv Ntuj me ntsis. Yog li peb thiaj pom tsis tau Tswv Ntuj ntawm qhov muag ib yam li peb rov pom tsis tau peb tus plig thiab.
Peb lub cev yog raug xwm txheej, los raug kab mob, mas peb txoj sia yuav tsum tu ntawm peb lub cev mus thiab. Peb lub cev zoo ib yam li tej tsiaj txhu xyoob ntoo thiab xwb. Yog thaum raug ib yam txo txoj sia mas kawg tuag thiab xwb.
Yog li ntawd, thaum peb muaj mob peb tsum tau kho ob phab tib si. Tsis zoo li tej tsiaj txhu, los xyoob ntoo es peb yuav kho lub qhov txhab uas to thiab tua tus kab mob los yog tus kab noj xwb.
Peb yuav tsum kho lub cev thiab lub siab nrog rau tus ntsuj plig tib si. Vim yo 3 yam no ua kom peb lub cev tas huv tib si tau txais kev zoo siab thiab nyob kaj siab lug rau lub neej tib si.
Kev thov Ntuj rau ib tug neeg mob los ib yam dab tsi uas yus txhawj xeeb txog, yam li kev thov Ntuj foom hmoov zoo, kev khi tes thov Ntuj foom hmoov; mas yog ib qho zoo kawg tuaj rau hauv tus neeg ntawd lub siab, lub cev thiab tus ntsuj plig. Vim yog Tswv Ntuj lub txiaj ntsim tuaj pab rau tus neeg ntawd kom muaj lub siab nyob kaj lug, kom nws qhov ntxhov hauv lub neej cia li ploj mus tas.
