Tej keeb kwm uas tseem ciaj sia, ua rau cov neeg ncig tsham tuaj txog lub zos Hmoob qub qub.
Ib lub zos Hmoob qub qub ua rau ib tsoom neeg ncig tsham teb chaws nyob thoob ntiaj teb nyiam tuaj mus tsham, vim tej qub txeeg qub tes hauv kab lis kev cai tseem ciaj sia. Lub zos Hmoob Xinjiang, Qianhu nyob hauv lub xeev Kim Tsawb, yog lub zos uas rub tau txhua haiv neeg ncig tsham teb chaws tuaj mus tsham tej yam lawv txuag cia tau zoo. Cov tsev ntoo uas yog lub Cim, tej tsoos tsho ntawm haiv neeg uas zoo nkauj thiab tej kab lis kev cai muaj txhij txhua. Cov neeg ncig tsham teb chaws Is Tas Lias thiab neeg Fab Kis piav tias ; lub zos no yog lub zos tshwj xeeb uas yuav tau pom txog Hmoob tej kab lis kev cai tseeb tiag, los ntawm lawv tej tsoos tsho qub qub uas lawv hnav. Tej qauv tes xaws, tej paj nruag, kev dhia seev cev thiab kev muab cawv los txais qhua raws tej laus ib txwm ua los. Yog lub Cim ntawm kev muaj dej siab thiab yog haiv neeg ntiag tug. Coob leej hais tias ; kev sib raug zoo nrog cov neeg zej zog ua rau yus pom txog tej keeb kwm thiab lub Cim hauv tej kab lis kev cai zoo tuaj. Xinjiang yog lub zos muaj neeg nyob coob tshaj 6,000 leej. Yog ib lub zos Hmoob loj tshaj plaws nyob Suav teb thiab yog qhov chaw khaws Hmoob tej kab lis kev cai. Tsaib no lub zos no tos txais cov neeg ncig tsham teb chaws coob tshaj 5 plhom 300 txhiab leej. Cov nyiaj uas tau los ntawm cov neeg ncig tsham yog 591 plhom Yuan, los yog 87 plhom US dos las.
Cov nom tswv hauv zej zog tab tom ua kom tau teeb tej kev ncig tsham ua theem nyob ntawm 5A, uas yog qhov siab tshaj plaws nyob hauv Suav teb. Cov hauj lwm hauv zej zog kuj tau txais txiaj ntsim qab hau los ntawm kev txhim kho tej kev ncig tsham ib yam. Zim txwv no muaj cov tsev thau duab ntau tshaj 200 lub uas qhib rau cov neeg ncig tsham tau hnav Hmoob tej tsoos tsho qub qub, thiab tau kawm txog Hmoob tej keeb kwm thiab tej qauv tes uas nyob tom qab tej tsoos tsho ntawd. Tus coj lub zej zog hais tias ; lub zos no lub hom phiaj tsis yog txhawb nqa kev ncig tsham xwb, nws tseem hais txog kev txuag Hmoob tej kab lis kev cai, thiab txhawb nqa kev sib raug zoo ntawm tsoom Hmoob nyob thoob ntiaj teb thiab.
