ZAJ NYEEM HNUB TIM 17 LUB 12 HLIS: HNUB PEB LUB LIS PIAM 3 CAIJ TOS HUAB TAIS
COV LUS NYOB HAUV NTAWV HAUV PAUS (HP 49: 2, 8-10)
LUB MOO ZOO RAWS LI MAS TAIS (MT 1: 1-17)
Kwv tij Hmoob sawv daws, cov lus hauv phau ntawv Hauv Paus nej hnov hauv hnub no yog Yas Kos foom lus rau nws 12 tug me nyuam; qhov tseeb mas Yas Kos foom lus zoo thiab phem tib si rau lawv tab sis hnub no lub Koom Txoos tsuas muab cov lus foom rau Yus Das coj los rau peb tau mloog ua ke. Yas Kos foom lus rau Yus Das tias Yus Das caj ces yuav tau ua vaj kav tas cov His Xas Lais. Yus Das cov xeeb ntxwv yog leej twg?
Mas Tais sau qhia nyob hauv nws phau ntawv Moo Zoo raws li cov lus nej tau hnov nyob hauv hnub no.
Mas Tais sau qhia tias Yus Das cov xeeb ntxwv mas muaj ib tug yog tus vaj Das Vis. Das Vis cov xeeb ntxwv muaj ib tug yog Yes Xus.
Kwv tij, nyob hauv cov His Xais Lais mas caj ces yog qhov tseem ceeb heev. Nyob hauv Hmoob los kuj ib yam li ntawd, yog li niaj xyoo thaum xaus lub xyoo laus mas Hmoob thiaj muaj kab ke laig dab poj yawm txwv koob ib txheej dhau ib txheej; kom tsis txhob hnov qab yus tsev neeg caj ces.
Cov His Xas Lais thaud mas lawv tis npe me nyuam mas lawv muab leej txiv lub npe los ntxiv rau xws li peb hnov kam hauv Ntawv Ntshiab hais tias ‘Zam Ntxes Npes Dais tus tub.’ Nyob hauv Hmoob mas thaud lawv kuj tis npe li ntawd; yam li ‘Tub Npis Lis Foom’ los yog ‘Faiv Ntaj Lauj Npliaj Yob’.
Tej no puav leej yog qhia kom tus neeg ntawd nco tau nws caj ces.
Hnub no, peb thiaj pom Mas Tais piav txog Huab Tais Yes Xus tias nws tus cag yog hlav qhov twg tuaj; yog suav nce mus mas yog tuaj ntawm Das Vis tsev neeg tuaj, yog tuaj ntawm Yus Das tsev neeg tuaj, thiab yog hlawv los ntawm Has Nplas Has los, yog Tswv Ntuj haiv neeg.
Huab Tais Yes Xus thiaj yog lo lus Tswv Ntuj cog rau Has Nplas Has, cog rau Das Vis, thiab cog rau Tswv Ntuj haiv neeg tias yuav xa tuaj coj Tswv Ntuj haiv neeg rov mus cuag tau Tswv Ntuj.
Das Vis sau ntxiv tias txij Has Nplas Has txog Das Vis mas yog 14 tiam neeg, txij Das Vis los txog lub caij raug txim nyob Npas Npis Los yog 14 tiam, thiab txij lub caij raug txim nyob Npas Npis Los txog rau lub caij Yes Xus yug los mas muaj 14 tiam. Hais tau tias Mas Tais muab Huab Tais Yes Xus caj ces faib ua 3 ntu; ib ntus yog 14 tiam.
Ntu 1 hais txog tus pib mas yog Has Nplas Has, nws yog tsoom ntseeg leej txiv; nws yog tus piv txwv hais txog ‘lub siab ntseeg’.
Ntu 2 pib ntawm tus vaj Das Vis. Lub npe Das Vis txhais tias ‘nyiam’. Tas Das Vis lub neej mas nws nyiam Tswv Ntuj thiab nyiam cov neeg ntxub nws; yog li Das Vis thiaj yog tus piv txwv hais txog ‘lub siab nyiam’.
Ntu 3 pib ntawm lub caij raug txim nyob Npas Npis Los. Thaum ntawd cov Yaj Saub ntuas cov Yus Das kom txhob tag kev tso siab rau Tswv Ntuj, ces qhov kawg lawv rov los nyob ua neeg twj lij nyob Yes Lus Xas Les; yog li lub caij ntawd thiaj yog tus piv txwv hais txog ‘lub siab vam khom’.
Li ntawd, nyob hauv hnub no Tswv Ntuj Lo Lus thiaj yog ntuas peb kom muaj lub siab ntseeg, muaj lub siab nyiam, thiab muaj lub siab vam khom nyob hauv lub caij Tos Huab Tais.
