ZAJ NYEEM HNUB TIM 19 LUB 12 HLIS: HNUB TSIB LUB LIS PIAM 3 CAIJ TOS HUAB TAIS
COV LUS NYOB PHAU NTAWV TXWJ LAUS TIV THAIV (TLTT 13: 2-7, 24-25)
LUB MOO ZOO RAWS LI LUS KAS (LK 1: 5-25)
Cov kwv tij Hmoob, hnub no nyob hauv thawj zaj nyeem peb hnov hais txog ib tug Tshiab los hais rau Mas Nos As poj niam tias nws yuav muaj me nyuam, nws yuav tis tus me nyuam npe hu ua ‘Xas Xoos’.
Nyob hauv Ntawv Moo Zoo peb hnov hais txog tus Tshiab tawm tuaj hais rau Ntxas Kas Lias tias nws poj niam Es Lis Xas Npes yuav muaj ib tug me nyuam, nkawd yuav hu tus me nyuam hu ua ‘Zam’.
Hnub no, lub Koom Txoos muab 2 zag no los rau peb nyeem thiab xav tswv yim vim lub Koom Txoos xav kom peb pom tias Mas Nos As thiab Ntxas Kas Lias nkawd tsis muaj me nyuam yuav los tsa nkawd lub koob lub npe. Ib yam li Hmoob hais tias tsis muaj tub los tuav ncej dab, mas tuag mus yuav tsis muaj leej twg laig rau noj.
Nyob hauv cov His Xas Lais los cov Yus Das mas lawv hais tias tus neeg tsis muaj me nyuam mas vim nws yog neeg muaj txhaum; yog Tswv Ntuj foom hmoov phem rau.
Mas Nos As thiab Ntxas Kas Lias zoo li nkawd tau txoj hmoov phem tiag, nkawd lub neej ntsia tsis pom yuav muaj ib txog kev vam nyob qhov twg li, nkawd yuav tag kev tso siab mus li.
Tab sis Huab Tais Tswv Ntuj hlub neeg, Huab Tais Tswv Ntuj pub ib tug me nyuam rau 2 tsev neeg no; zoo li Huab Tais Tswv Ntuj rov tsa Mas Nos As thiab Ntxas Kas Lias lub meej mom. Huab Tais Tswv Ntuj rov ua kom nkawd muaj kev vam khom tuaj.
Nyob hauv ib nkawm niam txiv twg, puas yuav muaj dab tsi zoo tshaj qhov nkawd paub tias nkawd yuav muaj me nyuam?
Tus Tshiab qhia Mas Nos As poj niam thiab qhia Ntxas Kas Lias tias tus me nyuam yug los, nws muaj ib txog hauj lwm loj tuaj ntawm Tswv Ntuj tuaj; yam li Mas Nos As tus tub Xas Xoos mas nws yuav tuaj pab cov His Xas Lais ntawm cov Fis Lis Tias txhais tes, nkawd Ntxas Kas Lias tus tub Zam mas nws yuav tuaj pab ib haiv neeg kom qhib siab lug tos tus Huab Tais yuav tuaj.
Nyob hauv peb ib tsoom neeg ntseeg, mas qhov peb yuav zoo siab dua thaum peb paub tias peb yuav muaj me nyuam, mas yog qhhov no. Yog Huab Tais Tswv Ntuj xaiv peb cov me nyuam los leg Tswv Ntuj txoj hauj lwm.
Kwv tij, Huab Tais Tswv Ntuj tsim peb los, mas tsis yog lam tsim peb los nyob dag; tab sis Huab Tais Tswv Ntuj puav leej tsim sawv daws los leg Tswv Ntuj txoj hauj lwm; los ua hauj lwm cev rau Tswv Ntuj. Li ntawd, peb txhua tus neeg thiaj yuav zoo siab hlo tias Huab Tais Tswv Ntuj tab meeg tsim peb txhua leej txhua tus los ua kev zoo siab rau peb niam peb txiv.
Peb rov los saib hauv 2 zaj lus hauv hnub no tias yog zoo qhia dab tsi rau peb; yog xav qhia peb tias yog peb ua neej nyob peb muaj kev tso siab rau Tswv Ntuj mas Huab Tais Tswv Ntuj yuav pub txoj kev vam khom rau peb, yog peb ua neej nyob peb tos ntsoov Huab Tais Yes Xus, mas Huab Tais Tswv Ntuj yuav pub nws txoj kev cawm rau peb.
Cov Hmoob sawv daws, ze lub caij Yes Xus yug los lawm, thov kom peb txhua tus tso siab rau Huab Tais Tswv Ntuj, thiab thov Huab Tais Tswv Ntuj qhib peb siab kom peb muaj lub siab tos ntsoov nws Leej Tub tuaj nyob hauv peb, mas peb thiaj yuav txais tau Tswv Ntuj kev cawm.
