Vaj Qhia Fas Ntshis Kus hais lus rau cov neeg ntseeg nyob hauv lub nroog Vanimo tias : thov kom koj txoj kev ntseeg thiab kev nyiam kev hlub ci ntsa tshaj yam ntuj tsim
Vaj Qhia Fas Ntshis Kus hais lus rau cov neeg ntseeg nyob hauv lub nroog Vanimo tias : thov kom koj txoj kev ntseeg thiab kev nyiam kev hlub ci ntsa tshaj yam ntuj tsim.
Thaum Vaj Qhia tab tom hais lus rau cov neeg ntseeg uas sib sau hauv lub tsev teev Ntuj hwm Ntoo Cuam Ntshiab nyob Vanimo, Vaj Qhia txhib kom tsoom pej xeem Pas Puas muab siab rau tshaj lub Moo Zoo thiab xa kev nyiam kev hlub rau ib tsoom neeg ntxiv mus. Vaj Qhia hais rau cov neeg tuaj mloog, cov nom tswv zej zog, cov Txiv Plig, cov tub tshaj Ntuj Lus thiab cov me nyuam. Vaj Qhia qhuas txog Leej Ntuj Plig Ntshiab hauv kev tshaj lub Moo Zoo nyob hauv lub Cheeb Koom Txoos uas muaj sia txij tiam 19 los lawm. Vaj Qhia qhuas txog cov Txiv Plig, cov tub tshaj Ntuj Lus thiab cov neeg ntseeg nyob hauv xeev ntuj no. Lawv tau ua hauj lwm nyob hauv kev kawm, kev saib xyuas lub cev ntaj ntsug thiab kev saib xyuas fab ntsuj plig.
Vaj Qhia qhuas txog lawv txoj kev muab siab rau tshaj Ntuj Lus nyob hauv cov thaj tsam nyob deb thiab lawv txoj kev muab tus kheej los ua hauj lwm pab luag tej. Vaj Qhia txaus siab rau txhua yam ntuj tsim zoo nkauj nyob Pas Puas. Vaj Qhia muab piv tias qhov zoo nkauj ntawm thaj av no zoo cuag li lub vaj Es Dees nyob hauv Ntawv Ntshiab. Txawm li cas kuj xij, Vaj Qhia qhuas txog qhov zoo ntawm txhua leej txhua tus tias : ntawd yog qhov kev zoo nyob hauv lawv kev sib nyiam sib hlub.
Thaum xav txog David thiab Mary nkawm niam txiv uas nkawd sib yuav nyob hauv txoj kev ua txij ua nkawm, Vaj Qhia qhuas txog txoj kev hlub tseem ceeb hauv cov yim neeg, vim nws qhia txog qhov zoo nkauj hauv lub Moo Zoo.
