Hnub Chiv tim 9 lub 8 hli tas los, Vaj Qhia Les Os 14 tau nthuav lub Moo Zoo raws li Mas Tais hais txog Huab Tais Yes Xus mus ko taw saum nplaim dej ntuj rau cov ntseeg sawv daws mloog, mas Vaj Qhia hais tias thaum Huab Tais Yes Xus ua kom mov ntsu tuaj yug cov neeg mas cov thwj tim pom tias lawv muaj feem koom txais Huab Tais Yes Xus lub hwj huam, tab sis nyem no lawv nyob hauv lub nkoj hauv plawv dej ntuj, lawv pom tias lawv xwb tsis muaj peev xwm ua tau dab tsi li, ces lawv ntshai thaum lawv pom dej nphau nphwv tuaj vov lub nkoj thiab cua hlob ntsawj lub nkoj vias mus vias los.
Huab Tais Yes Xus tawm rau lawv pom saum nplaim dej ntuj, mas lawv xav tias yog lawv pom poj ntxoog, ces lawv yim ntshai. Huab Tais Yes Xus thiaj li hais lus rau lawv, nws hais tias “Yog kuv, txhob ntshai.” Huab Tais Yes Xus hais li ntawd tas, nws nce saum nkoj, ces dej rov tus yees, cua daj cua dub rov ntsiag to.
Vaj Qhia muab nthuav tias tab txawm cov thwj tim tau pom Huab Tais Yes Xus ua hwj huam, tsis kav tseem tsis tau txaus rau lawv to taub tias Huab Tais Yes Xus yog Tswv Ntuj Leej Tub. Cov thwj tim tsum tau ntsib tau raug tej xwm lawv tsis muaj peev xwm yuav ua tau dab tsi li, mas lawv mam to taub Huab Tais Yes Xus zoo dua tuaj. Qhov ntawd yog lawv tsum paub tias lawv tsis muaj zog txaus thiab nyob hauv lawv qhov tsis muaj zog no, lawv tsum ras tau tias Tswv Ntuj nrog nraim lawv.
Tsuas yog thaum cov thwj tim tsum paub li no xwb, lawv qhov muag thiab lawv lub siab thiaj yuav qhib ntsia pom tias Huab Tais Yes Xus nyob ze lawv, ces lawv lub siab yuav nyob kaj lug tab txawm lawv nyob hauv nruab nrab cua daj cua dub.
Zaum no Vaj Qhia muab los piv rau sawv daws lub neej, mas Vaj Qhia hais li no “Zaj hwj huam no qhia peb tias; Ib tuaj, txhob cia tej yam peb tau ua tiav lawm dag peb kom yuam kev thiab peb tsis txhob ruaj siab rau peb tus kheej dhau. Ob tuaj, peb txhob tag kev cia siab thaum peb poob rau hauv qhov tsaus ntuj nti los yog thaum peb raug teeb meem, peb ua npaum cas daws los daws tsis tau.”
Vaj Qhia xaus tias tab txawm yuav phem npaum cas, Huab Tais Yes Xus tsis tso peb pov tseg. Tsuas yog peb thov Ntuj, txais cov Cim Ntshiab, thiab mloog Huab Tais Yes Xus cov lus, mas Huab Tais Yes Xus yuav nyob hauv peb, ces peb yuav nrhiav tau kev kaj siab, kev pom kev, thiab muaj zog ua lub neej ntxiv mus.
