Teeb meem tib neeg txoj cai hauv Thaib teb.
Tseem ua txhaum tib neeg kev ncaj ncees thiab txoj cai hauv zej zog.
Teeb meem hais txog tib neeg txoj cai nyob Thaib teb tseem muaj ntau yam uas txaus txhawj. Thaum peb hais txog tib neeg txoj cai hauv txhia xeev ntuj nyob Thaib teb, yuav pom tias muaj tus yam ntxwv thiab teeb meem ntau yam sib txawv raws nyias yam nyob ib puag ncig ntawm nyias xeev ntuj. Thiaj thov muab qhov hais txog kev hla tib neeg txoj cai nyob hauv txhua xeev ntuj coj los tham ua ntej li no rau sawv daws nrog xav.
Nyob sab qaum teb : Feem ntau yog teeb meem txoj cai hais txog av thiab cov neeg hauv paus txawm uas yog neeg toj siab. Yuav luag txhua lub xeev nyob yav qaum teb, yog cov haiv neeg tsawg nyob toj siab. Xws li Chiangmai, Mae Hongson, Lamphun, Lampang, Tak, Nan thiab Chiangrai. Feem coob lawv raug teeb meem hais txog chaw ua noj ua haus. Teeb meem txwv fab txoj cai Thaib thiab tseem hwv tej av. Cov neeg toj siab nyob ntau qhov chaw raug ntiab tawm ntawm lawv thaj av uas lawv nyob thiab ua noj los ntau tiam neeg. Muaj kev txhim kho lwm yam mus txog kev sib txeeb chaw ua noj ntawm cov los pav loj. Ces ua rau lawv raug teeb meem kev kub ntxhov thiab ntsib kev pluag txom nyem tsis muaj liaj teb ua noj. Kev tsis muaj liaj teb ua noj, ua teeb meem rau txhiam xws noj thiab cuam tshuam txog kab lis kev cai.
Piv txwv li lub zos Ban Klang, lub nroog Mae Mao, hauv xeev Lampang. Lub zos Ban Klang yog ib lus zos Pas Kas Yos uas nyob xyaw hav zoov ntsuab xiab thiab lawv ib txwm nyob los tau ntau pua xyoo. Tab sis cov tub tseem hwv txhob txwm sau txoj cai hais txog koog hav zoov Thamphathai tawm los. Koog hav zoov ntawd khav tas 5 lub nroog, 33 lub toj xeem nyob hauv lub xeev Lampang.
Zos Ban Klang kuj yog ib lub zos nyob hauv, ces thiaj tab tom raug teeb meem uas zam tsis dhau. Niaj hnub no tsoom pej xeem tawm tsam tas zog nrog cov tub tseem hwv ua ntu zus. Cov pej xeem raug ntes thiab raug liam tias luaj teb ntov hav zoov. Tsoom pej xeem ntsia pom tias nov yog kev txeeb av thiab hla txoj cai, vim tsoom pej xeem xub nyob ua ntej yuav raug tshaj tias yog tseem hwv li av.
Tsis tas li ntawd, tseem yog qhov chaw ntawm kab lis kev cai tshwj xeeb raws li tseem hwv teeb tseg nyob hauv hnub tim 3 lub 8 hli xyoo 2010. Yog qhov chaw txuag thiab txhawb nqa kev ua lub neej ntawm cov Pas Kas Yos. Tseem muaj cov tub tseem hwv saib xyuas hav zoov mus rhuav lawv tej tsev txais qhua nyob hauv lub zos Na Lao, lub nroog Chiangdao, xeev Chiangmai. Lawv liam tias cov pej xeem hla tseem hwv ciam lawm. Qhov tiag mas tsoom pej xeem xub nyob txawm hauv thaj chaw ntawd ua ntej yuav muaj kev tshaj tias thaj tsam ntawd yog hwm cia.
Vim muaj tej yam li hais no, mas cov kws txuj coob leej thiaj tau thov kom tseem hwv daws kho txoj cai no tshiab. Hais txog cov haiv neeg tsawg, txoj cai zej zog thiab kev ywj pheej. Dhau no lawm tseem muaj teeb meem cov neeg thoj nam thiab cov tub zog hla teb chaws. Vim Thaib sab qaum teb muaj cov neeg thoj nam thiab cov tub zog hla teb chaws tuaj ntawm cov teb chaws nyob ib puag ncig coob. Xws li Mias Mas teb kheev kheev raug ntau yam teeb meem nyob hauv cov yeej thoj nam. Qee leej khiav mus ua hauj lwm nyob hauv cov nroog loj. Lawv raug ntes thiab raug kaw nrog rau cov tub zog txawv teb chaws nyob hauv tej tuam tsev tsim toob xib. Lawv kuj raug cov tswv hla txoj cai. Piv txwv li kev hla cov tub zog txoj cai nyob hauv cov tsev xaws khaub ncaws nyob ze ciam teb hauv lub nroog Maesod, lub xeev Tak. Muaj cov tub zog Mias Mas coob leej cia li raug kaw tseg tsis ua hauj lwm lub caij tus kab mob COVID-19 sib kis. Ua rau cov tub zog txom nyem ntsuav thiab tsis muaj kev pab dab tsi. Thiaj ua qhov chaw rau cov tub zog pib taij thov txoj cai tub zog ntawm cov tseem hwv Thaib. Raws li cov tub zog piav txog kev nyob noj hauv lub tsev xaws khaub ncaws, muaj kev saib tsis taus thiab hla txoj cai tub zog ntau yam. Tsis tas li ntawd, lawv tseem tau txais nqi zog qis dua tus nqi cov tseem hwv Thaib teeb tseg thiab. Lawv tau txais nqi zog ib hnub 150 npaj, thiab lawv ua hauj lwm yog 8 teev sawv ntxov mus txog 11 teev ib tag hmo mam tau so. Cov tub zog ua hauj lwm txhua hnub tsis muaj hnub no nruab lis piam thiab nruab xyoos li. Pom tau tias lawv tus nqi zog qis tshaj tus nqi zog txheej qis lawm. Ces ua rau lawv tsis muaj nyiaj txaus yuav txhiam xws noj yug lawv, nrog rau tej kev khiav ntaub ntawv kom tau ua hauj lwm raug cai. Vim li ntawd, kev daws kho teeb meem tib neeg txoj cai nyob Thaib teb, cov tub zog yuav vam txog kev koom tes los ntawm cov tseem hwv, cov Koom Haum zej zog thiab cov Koom Haum sib tham ntawm txawv teb chaws. Kom tau ua ib co neeg ncaj ncees thiab txawj hwm tib neeg txoj kev ncaj ncees tiag tiag.
Nyob sab toob fab pej : Feem ntau ntsib teeb meem hais txog av thiab tej xyoob ntoo. Kev khawb qhov mining potash ntawm cov neeg nplua nuj, tsim kev kub ntxhov rau tsoom pej xeem uas nyob ib cheeb tsam ntawd. Ua rau xyoob ntoo hlob tsis taus thiab tsis muaj dej txaus siv ua liaj ua teb. Tsis tas li ntawd, tseem ua teeb meem rau kev noj qab haus huv los ntawm huab cua muaj tshuaj. Ua rau neeg tej tawv nqaij xoo pob thiab tej hlab plawv tsis zoo. Kev ua noj ua haus tau txais kev piam sij loj kawg thiab tej txhiam xws noj tsis kav ntev.
Piv li ntau thaj tsam uas muaj cov qhov mining potash nyob toob fab pej. Cov kws txuj hais tias lawv tau tshawb fawb mining potash nyob hauv 20 xyoo dhau los no, pom tias ua teeb meem rau tsoom pej xeem thiab txhua yam nyob ib puag ncig heev kawg. Yog tias tseem muaj kev khawb qhov mining potash ntxiv thiab, mas ntshe yuav ua teeb meem rau tsoom pej xeem thiab txhua yam nyob ib puag ncig mus dav heev. Kev khawb qhov mining nyob Thaib teb, pom tias muaj kua ntsev ntws tawm ntau thiab ua rau av qab ntsev. Txog tav no lub qhov mining potash tseem daws qhov teeb meem ntawd tsis tiav. Av qab ntsev yog yam teeb meem uas daws nyuab kawg uas yuav lim tau kom av rov zoo li qub. Zim txwv no muaj cov av qab ntsev nyob toob fab pej li ntawm ntau txhiab laij, thiab muaj 3 lub Koom Haum khawb mining potash nyob Thaib teb. Nyob hauv lub xeev Nakhon Rakchasima kuj muaj kev taij thov kom tseem hwv soj ntsuam txog cov teeb meem no ua ntu zus los. Tab sis txog tav no kuj tseem tsis hnov ntab ntws dab tsi li.
Nyob sab nruab nrab : Yog teeb meem cov tub zog hla teb chaws uas tuaj ntawm cov teb chaws nyob ib puag ncig tuaj, xws li Mias Mas teb, Los Tsuas teb thiab Khas Phus Chas teb. Cov tub zog txawv teb chaws feem coob yog cov neeg Mias Mas. Lawv kheev kheev raug yuam cai yuav ntsej muag. Lawv tsis tau txais kev txuag pov hwm los ntawm cov tseem hwv Thaib. Nyob hauv lub xeev Sanud Sakhon yog lub xeev uas muaj cov tub zog neeg txawv teb chaws coob tshaj. Lawv tuaj Thaib teb vim lawv xav kom tau lub neej zoo ua, tab sis vim Thaib teb txoj cai saib xyuas cov tub zog zoo tsis txaus. Ces cov tub zog neeg txawv teb chaws tsuas zoo li yog cov neeg txheej ob ntawm Thaib teb xwb. Nyob hauv lub caij tus kab mob COVID-19 sib kis, cov tub zog coob leej sib kis mob, tab sis cov tswv ntiav zog tsis kam lees txog lawv tej nqi tshuaj nqi kho mob. Ces zoo li cov tub zog neeg txawv teb chaws nyob Thaib teb ntsib ntau yam teeb meem nyuab, thiab txoj cai txuag cov tub zog kuj tsis meej tseeb. Lawv tsis muaj suab tsis muaj cai taij thov kev pab dab tsi kiag. Tsim nyog cov tseem hwv Thaib yuav muab siab rau saib xyuas txoj cai no, kom sawv daws muaj cai muaj vaj huam sib luag nyob hauv kev ua neeg.
Nyob Npaas Koj thiab ib cheeb tsam : Feem ntau teeb meem yog txoj cai zej zog. Muaj kev txhim kho tej nroog, ces ua rau tsoom pej xeem tsis muaj chaw ua tsev nyob. Ua rau cov neeg ib txwm nyob txawm yuav tsum tshais chaw, qhov no thiaj yog teeb meem rau neeg kev nyob thiab nyob tau sib ti heev. Ua rau cov neeg no kev lag luam tsis ruaj khov thiab zej zog ntxhov. Nyob hauv tej qhov chaw mas muaj neeg nyob coob kawg. Thaum muaj neeg nyob coob coob, mas kuj muaj ntau yam ntxhov thiab nyuab heev. Qhov nrov ncha tshaj plaws yog kev hla txoj cai ntawm cov tub ntxhais hluas. Ua rau coob leej tub ntxhais hluas raug ntes raug kaw thiab ntau yam teeb meem ntxiv.
Nyob sab qab teb : Yog teeb meem kev kub ntxhov nyob hauv 3 lub xeev nyob qab teb. Niaj hnub no peb ntsia pom tias muaj kev sib txeeb tas mus li, xws li hauv lub xeev Pattani, Yala thiab Narathivat mus txog rau lub xeev Sungkla. Muaj kev kub ntxhov thiab hla tib neeg txoj cai ntau heev. Muaj kev quab yuam haiv neeg kom ploj mus thiab sib ntaus sib tua. Ua rau tsoom pej xeem Thaib nyob hauv cov thaj tsam ntawd lub neej nyob ntshai rwg, mus txog rau kev kawm ntawv thiab kev txhim kho fab kev lag luam tsis ruaj khov. Qhov pom tseeb yog tseem hwv cov tub rog raug liam tias hla txoj cai tsis muaj kev lees pom lees paub. Cov neeg raug ntes raug tsim txom thiab raug ntaus. Piv txwv li lub nroog Takbai uas nyob hauv lub xeev Narathivat hnub tim 25 lub 10 hli xyoo 2004. Yog pib ntawm tsoom pej xeem taij thov kev ncaj ncees ntawm cov tub rog, ces ua rau tsoom pej xeem 6 leej raug ntes thiab nyob ntawd muaj neeg tuaj saib li ntawm 1,000 tawm leej. Cov tub rog tau vis zej zog thiab ntiab cov neeg sib sau taij thov khiav tawm, ua rau neeg tuag 6 leej hos cov raug ntes yog 1,370 leej. Kev tawm tsam zaum ntawd muaj neeg tuag 85 leeg. Tseem hwv tau them nyiaj rau cov neeg tuag ib leeg 7 plhom 500 txhiab npaj thiab cov raug mob yog ib leeg 500 txhiab npaj. Ntawv xov xwm tshaj tias : cov xwm txheej ntawd yog lub tswv yim quab yuam xav ua kom neeg ploj mus.
1. Txoj cai tiv thaiv ua kom muaj kev kub ntxhov los ntawm cov tub rog nyob qab teb. Txoj cai pib txij xyoo 2001 uas yog Taksin ua thawj pwm tsav. Thiab xyoo 2011 uas yog Abhisit ua thawj pwm tsav. Raws kev soj ntsuam hauv xyoo 2004, cov neeg raug quab yuam ploj mus yog cov txiv neej Mawv Xis Lim uas nyob qab teb. Cov neeg cia li ploj mus lawm 80 feem pua yog cov txiv neej hnub nyoog qis dua 40 xyoo. Thiab 45 feem pua yog cov hnub nyoog qis dua 30 xyoo. Cov cia li ploj mus lawm nrhiav tsis tau yog 55 feem pua.
2. Txoj cai cheb ntxuav cov neeg ua luam txhaum kev cai.
Txij xyoo 2004 uas yog tseem hwv Taksin, mas muaj kev ua kom neeg ploj thiab tua neeg heev kawg. Lub caij ntawd cov neeg ua luam tshuaj txhaum kev cai raug ploj raug tuag thiab sawv daws ua lub neej nyob nrog txoj kev ntshai. Lub Koom Haum kev ncaj ncees thiab kev thaj yeeb tshaj tias cov neeg ploj lub caij ntawd muaj li ntawm 10 leej, tab sis qhov tseeb tiag muaj coob tshaj ntawd.
3. Cov neeg pheej hmoo nyob uas lawv ntshai tsam raug ploj nyob Thaib teb.
Cov neeg pheej hmoo nyob ntawd, feem coob yog cov muaj kev sib raug zoo nrog tub ceev xwm thiab tub rog. Yog kev sib txeeb nyob hauv kev ua luam txhaum kev cai thiab kev ua luam muag neeg. Tsis tas li ntawd, cov tub txawj ntse fab tib neeg kev ncaj ncees, kev tseev tsim los yog tiv kev nyiag noj nyiaj, lawv kuj yog cov neeg ntshai raug nyiag tua los ntawm tseem hwv pab neeg tuav kev ncaj ncees. Muaj coob leej neeg uas lawv yog kws lij choj, tub tseev tsim thiab cov neeg taij thov kev ncaj ncees Mawv Xis Lim cia li ploj mus nyob hauv hnub tim 12 lub 3 hlis xyoo 2004, uas yog lub caij Taksin ua thawj pwm tsav.
Dhau ntawd lawm, Angkana tseem hais txog coob leej tub tseev tsim uas zim txwv no lawv khiav nkaum nyob txawv teb chaws. Lawv kuj yog cov neeg nto npe thiab tseem ceeb tsis swb Taksin. Qhov uas Taksin rov los Thaib teb yam kaj siab lug thiab tos txais zoo, tej zaum yog tus piv txwv ntawm cov neeg khiav nkaum nyob txawv teb chaws. Yog qhov ua kom cov tub tseev tsim uas khiav tawm teb chaws tau kev rov qab los Thaib teb, kom lawv tau rov los ua lub neej sov siab nrog lawv tsev neeg.
