25 Xyoos “Zoo Tswv Zov Yaj” Nyob Thaib Teb
Kwv tij hmoob hmov thiab tshua sawv daws, peb paub lawm tias xyoo no lub xov tooj cua Zoo Tswv Zov Yaj ua hmoov tsuj xeeb 25 xyoos Zoo Tswv Zov Yaj nyob Thaib teb. Li ntawd mas, kuv yuav siv lub sij hawm no caw nej sawv daws mloog kom paub me ntsis tias Txiv Plig Nyiaj Pov tau txhim tsa lub Koom Haum Tshaj Ntuj Lus Zoo Tswv Zov Yaj tau li cas?
Txiv Plig Nyiaj Pov xam pom tias kev tshaj lub Moo Zoo rau Hmoob nyob hauv lub zim txwv ntawd mas nyuaj kawg kiag vim Hmoob nyob ntau lus teb chaws; yuav ua li cas tas cov tej zaum kawg yuav tau tshaj xo hauv xov tooj cua xwb! Thaum Txiv Plig Nyiaj Pov mus txog Suav teb, Yaj Ntxoov Yias kuj tau hais rau nws tias “Txiv Plig, cov kwv tij hmoob Suav nyiam mloog cov Plos Tes Tas cov zaj tshaj xo kawg li, uas cas peb cov Kas Tos Liv tsis muaj li ntawd thiab.” Cov lus no haum rau Txiv Plig Nyiaj Pov txoj kev xav kawg, tab sis yuav ua li cas thiaj yuav tau kev tshaj lus?
Lub zim txwv ntawd, nyob Fis Lis Pees teb muaj ib lub hauv paus tshaj xo hu ua ‘Xov Tooj Cua Ves Lis Tas As Xias (Radio Veritas Asia); yog lub tshaj xo zwm rau lub Koom Txoos Kav Tos Liv. Lub hauv paus tshaj xo no tshaj tawm ua 15 xeem lus tso tawm saum huab cua rau cov haiv neeg nyob As Xias teb tau mloog; xws li lus Fis Lis Pees, lus Suav, lus Nyab Laj, lus Mias Mas. Thaum ntawd, sob lus Nyab Laj tab tom ntsib xwv txheej loj vim nyob Nyab Laj teb mas muaj ib co Hmoob tsis nkag siab txog cov lus tshaj xo, lawv thiaj xav tau tej tus Hmoob mus pab tshaj xo nyob hauv lawv sob lus.
Muaj ib tug poj niam Fab Kis hu ua ‘Aas Nes des Nplais’ (Anne de Blay) ua hauj lwm pab cov neeg Nyab Laj hnov txog qhov ntawd, nws qhia rau Txiv Plig Nyiaj Pov paub. Txiv Plig Nyiaj Pov thiaj sau ntawv mus fim Tswv Qhia Nyiaj Vam Tais (Msgr Pietro Nguyen Van Tai) tus tswj lub hauv paus tshaj xo Ves Lis Tas thiab thov lawv pub ib lub sij hawm rau nws tshaj Ntuj Lus ua xeem lus Hmoob rau cov Hmoob tau mloog. Tus Tswv Qhia tswj lub hauv paus tshaj xo pom zoo, lawv muab sij hawm rau Txiv Plig Nyiaj Pov tshaj cov lus ib hnub 30 fiab nyob hauv sob lus Nyab Laj li 2 xyoos.
Txiv Plig Nyiaj Pov hais Yaj Tsuj Xyooj tus tub ‘Yaj Chiv’ (Fr. Antione Chi Yang) tuaj pab ua tus zom lus. Txiv Plig Nyiaj Pov thiab Yaj Chiv zom lus nyob Nkws Yas teb tag, mam xa cov lus mus rau tus tiam lis nyob Vas Tis Kas coj mus kom txog lub tsev hauv paus tshaj xo nyob Fis Lis Pees teb, ces cov tub lis dej num hauv lub tshaj xo mam muab tso tawm hauv xov tooj cua. Txiv Plig Nyiaj Pov tis lub npe rau nws cov zaj hu ua ‘Zoo Tswv Zov Yaj’ (The Good Shepherd). Tshaj tawm thawj zag nyob hauv hnub tim 1 lub 12 hlis xyoo 1994 sij hawm 5.00-5.30 teev tsaus ntuj.
Ib lub lis piam, mas yuav tshaj cov zaj li nram no: Hnub Chiv tshaj cov zaj ntxiv kev ntseeg. Hnub Ob tshaj cov zaj nthuav Ntawv Cog Qub Lus thiab His Xas Lais liv xwm. Hnub Peb tshaj cov zaj nthuav Ntawv Cog Lus Tshiab. Hnub Plaub tshaj cov zaj kawm kev ntseeg thiab Koom Txoos liv xwm. Hnub Tsib tshaj xov xwm. Hnub Rau tshaj txuj Hmoob. Hnub Xya tshaj cov zaj nthuav Ntawv Moo Zoo hauv Hnub Chiv lub Lis Piam.
Lub zim txwv ntawd, Txiv Plig Nyiaj Pov pom tias nyob hauv Thaib teb, mas muaj Hmoob nyob coob; yooj yim rau kev nrhiav neeg tuaj pab ua hauj lwm hais lus hauv xov tooj cua, ces tim 10 lub 5 hlis 1999 nws thiaj tuaj nrog cov Leej Choj Os Nplas hauv Thaib teb tham thiab sawv daws pom zoo cia Txiv Plig Nyiaj Pov tshais chaw los ua hauj lwm nyob Thaib teb.
Muaj ib hnub Txiv Plig Tswv Tuam tau caw Txiv Plig Nyiaj Pov tuaj koom ua Hmoov nyob Moos Les (Muang Louie), Txiv Plig Nyiaj Pov pom tias Txiv Plig Tswv Tuam tau khaws cov ntawv thaud lawv sib pab tsim los nthuav kev ntseeg rau Hmoob cia, mas Txiv Plig Nyiaj Pov thiaj txiav siab yuav tsa lub tsev hauv paus Hmoob tshaj Ntuj Lus nyob rau Moos Les. Cov ntawv ntawd, mas yog xyoo 1975 Diav Yaj xa hla dej Naj Khoom tuaj, muaj txog 700 kis lus. Txiv Plig Nyiaj Pov thov kom ‘Vam Leev Xyooj’ (Va Leng Xiong) thiab ‘Txiaj Kuab Yaj’ (Chia Kua Yang) pab txoj hauj lwm nws yuav tsa tshiab nyob Thaib teb no; nkawd tab tom ua hauj lwm pab Txiv Plig Tswv Tuam. Txiv Plig Nyiaj Pov tseem thov ib tug Hmoob uas thaum ub tau pab Txiv Plig Tshaj Sawm qhia Ntuj kev cai rau cov Hmoob hauv yeej thoj nam tuaj pab nkawd ob tug no thiab; tus Hmoob no yog ‘Lis Maib’ (Lee Mike).
Lawv pom tias nyob hauv lub nroog Loom Xam (Lomsak) tsis deb tsis ze lub zos Khej Me mas muaj ib co tsev txhim tau tshiab tshiab, lawv hu nrog Txiv Plig Nyiaj Pov tham; Txiv Plig Nyiaj Pov thiaj txiav siab hloov chaw ua hauj lwm los nyob hauv qhov chaw lawv pom ntawd. Xyoo 1999 lub hli 9 tim 14 lawv thiaj qhib lub tsev hauv paus Hmoob tshaj Ntuj Lus hu ua ‘Zoo Tswv Zov Yaj’. Hnub ntawd ncaj rau hnub hwm Yes Xus tus Ntoo Cuam.
Pib ua hauj lwm xwb, Txiaj Kuab Yaj yuav los pab poj niam me nyuam ua hauj lwm nyob pem zos Hmoob. Txiv Plig Nyiaj Pov thiaj hu Soob Tub Ham tus tub ‘Kub Ham’ (Ku Ha) tuaj pab Vam Leev Xyooj thiab Lis Mais.
Muaj ib cov neeg tuaj yws rau Txiv Plig Nyiaj Pov tias ua cas nws xaiv cov neeg tsis muaj kev kawm, tsis txawj ntse tuaj pab nws leg cov hauj lwm. Txiv Plig Nyiaj Pov thiaj hais rau lawv tias “Kuv xav tau tus neeg nyiam Yes Xus lub Moo Zoo thiab kub siab kawm Tswv Ntuj cov lus uas nyob hauv cov Ntawv Ntshiab. Nws kuj yuav tsum nyiam haiv Hmoob ti txha, nyiam cov txuj Hmoob, xyiv fab siv tas lub dag lub zog los ua kom tas peb haiv Hmoob hlob mus nyob hauv txoj kev nyiam Tswv Ntuj thiab sawv los ua ib haiv neeg vam meej hauv tas txhia fab.”
Thaum ntawd, Txiv Plig Nyiaj Pov tseem tsis tau muab hauj lwm ntau rau cov Hmoob hauv lub tsev hauv paus Hmoob tshaj Ntuj Lus leg, nws tsuas cia lawv teb cov tsab ntawv rau cov kwv tij Hmoob mloog lub xov tooj cua uas lawv xa ntawv tuaj cuag Zoo Tswv Zov Yaj, thiab nws cia lawv npaj tsab ntawv ‘Liaj Luv Xa Moo’ (The Falcon and the Swallow mail) thiab ‘Tseb Nplej’ (The Sower) xa mus rau cov kwv tij Hmoob nyob thoob ntiaj teb. Thaum pom tias sawv daws paub hauj lwm zoo lawm, nws thiaj kom lawv npaj sau cov zaj xa mus rau Phauj Ntxhais hais lus hauv xov tooj cua nyob tim Fis Lis Pees teb. Cov zaj lawv npaj mas xws li ‘xov xwm’, ‘Koom Txoos Liv Xwm’, ‘Txuj Hmoob’. Hos Txiv Plig Nyiaj Pov npaj cov zaj qhia Ntuj kev cai thiab nthuav Ntawv Moo Zoo.
Ntxiv mus mas, Vam Leev Xyooj tso nws txoj hauj lwm tseg, Txiv Plig Nyiaj Pov thiaj hu ‘Xib Hwb Yaj Nom Thoob’ (Yang No Thong) tuaj pab hauj lwm. Txiv Plig Nyiaj Pov muab txoj hauj lwm pab npaj cov zaj qhia kev ntseeg rau Yaj Nom Thoob ua tus tuav, thiab txib nws mus qhia ntawv Hmoob thiab kev ntseeg rau cov Hmoob nyob Sauv teb.
Thaum ntawd, Txiv Plig Nyiaj Pov kuj thov tus ntxhais Hmoob ‘Vaj Ntxhoo’ tuaj ntxiv nrog lawv, mas lub tsev hauv paus Hmoob tshaj Ntuj Lus Zoo Tswv Zov Yaj thiaj muaj 5 tug Hmoob pab lis dej num; ib tug nyob tim lub tsev hauv paus tshaj xo nyob Fis Lis Pees teb, 4 tug nyob hauv lub tsev lis dej num nyob Thaib teb. Lawv coob li ntawd mas txoj hauj lwm thiaj mus tau sai.
Txiv Plig Nyiaj Pov paub tias nws laus heev lawm, nws yuav nyob tuav txoj hauj lwm tshaj lus hauv xov tooj cua mus li tsis tau, nws thiaj sau ntawv mus cuag Txiv Plig Xas Mis Kis (Fr. Ryszard Szmydki) tus tswj lub koom haum Os Nplas, thov lub koom haum xa tej tus Leej Choj hluas xav ua hauj lwm rau Hmoob tuaj pab nres cov hauj lwm hauv Zoo Tswv Zov Yaj.
Xyoo 2001 lub 10 hli tim 31 Txiv Plig Nyiaj Pov nrog cov tub lis dej num hauv lub tsev hauv paus Hmoob tshaj Ntuj Lus Zoo Tswv Zov Yaj sib sab laj, lawv txiav tias yuav ua 15 zaj li nram no los hais lus hauv xov tooj cua; yam li lub txoos teev Ntuj, nthuav cov zaj teev Ntuj, nthuav Ntawv Ntshiab Cog Qub Lus, cov Leej Ntshiab yav thaud lub neej, cov neeg tshaj Ntuj Lus lub caij no, lub Koom Txoos Kav Tos Liv cov liv xwm, lub Koom Txoos Kav Tos Liv kev ntseeg, nthuav Ntawv Ntshiab Cog Lus Tshiab, cov kuj cuab nyob ntiaj teb, zim txwv no cov teeb meem loj, cov xwm nyuam qhuav tshwm nyob ntiaj teb, cov txuj Hmoob, teb tsab ntawv uas cov mloog Zoo Tswv Zov Yaj xa tuaj, nthuav zaj Ntawv Moo Zoo hauv Hnub Chiv, thiab zaj txhib Hmoob kom xyaum nyeem thiab sau ntawv Hmoob.
Tseem muaj ib yam hauj lwm Txiv Plig Nyiaj Pov ua tiav nyob hauv Zoo Tswv Zov Yaj, yog luam phau ‘Ntawv Ntshiab 2002’. Txiv Plig Nyiaj Pov thiab ob peb tug Hmoob twb tau pib kho phau Ntawv Ntshiab txij puag xyoo 1994 los lawm. Nyob hauv cov zaj Cog Qub Lus hauv phau Ntawv Ntshiab no mas Txiv Plig Nyiaj Pov txhais tsis tag, nws kuj vam tias yav tom ntej niam Txhiaj Vwj Yaj (Paj Vaj) yuav ua tus pab muab txhais kom tas.
Txij thaum ntawd los txog hnub no mas, cov tub lis dej num qee leej tau tso lawv txoj hauj lwm tseg, muaj tub lis dej num tshiab tuaj pab ua hauj lwm ntxiv mus. Thiab tom qab Txiv Plig Nyiaj Pov tsis nyob lawm ces kuj muaj cov leej choj Os Nplas los yog leej choj O.M.I, xws li Txiv Plig Tsom, Txiv Plig Nplus Nos (Fr. Arens Bruno), Txiv Plig Txawj Foom (Fr. Thossaporn), Txiv Plig Txawj Pov (Fr. Ong-art), thiab Txiv Plig Domenico tus txiv plig tab sim no saib xyuas Zoov Tswv Zov Yaj. Lawv tuaj pab txhawb tej hauj lwm tshaj Ntuj Lus ntawm lub tsev hauv paus Hmoob tshaj Ntuj Lus Zoo Tswv Zov Yaj kom hlob tuaj ntxiv mus. Tam sim no, muaj 2 tug tub lis dej num, nkawd yog Lis Maib thiab Txawj Tsav Lauj. Thiab muaj 2 tug txiv plig, nkawd yog Txiv Plig Domenico, tus tab tom saib xyuas Zoov Tswv Zov Yaj thiab Txiv Plig Tshaj Moo, tus pab ua hauj lwm. Li ntawd, hnub tim 14 lub 9 hlis Xyoos no mas, lub tsev hauv paus Hmoob tshaj Ntuj Lus Zoo Tswv Zov Yaj txhim tsa tau 25 xyoos lawm. Muaj Kev tshaj Ntuj Lus hloov ntau heev. Niaj hnub no peb tsis luam phau ntawv los tsab ntawv li qub lawm. Muaj kev tshaj Ntuj Lus tshiab raws li kev vam meej ntawm lub sij hawm. Tam sim no, peb siv social media, xws li YouTube, Facebook, Website, Twitter, thiab Instragram los pab tshaj Ntuj lus. Txawm tias kev Tshaj Ntuj Lus tau hloov ntau li qub, tsis kav lub hom phiaj uas Txiv Plig Nyiaj Pov mob siab rau ua tseem nyob.
Txiv Plig Nyiaj Pov muab tas nws txoj sia los ua hauj lwm tsob hwb Tswv Ntuj thiab haiv Hmoob tiag. Txiv Plig Nyiaj Pov tsis yog tus tswv zov yaj xwb, nws tseem txia ua ib tug yaj thiab muab tas nws lub neej los pub rau nws cov yaj. Txiv Plig Nyiaj Pov tau hais rau Txiv Plig Txhiaj Foom tias:
“Ib sim neej kuv mob siab ua peb yam nyob hauv haiv Hmoob; yog mob siab qhia Tswv Ntuj Lo Lus rau Hmoob, mob siab ua tej phau ntawv khaws cov txuj Hmoob, thiab mob siab kawm cov txuj Hmoob. Yog ua 3 yam no mas yus cawm Hmoob tus ntsuj plig kom muaj Tswv Ntuj txoj sia nyob mus li, thiab yus cawm xeem lus Hmoob, thiaj muaj haiv Hmoob ciaj mus ib txhiab ib txhis xws luag lwm haiv neeg” (2003)
Kwv tij zoo nyiam sawv daws, kuv thov muab Txiv Plig Nyiaj Pov cov lus ntuas nws hais rau peb Hmoob los xaus lub daim video no rau nej sawv daws mloog tias:
“Nej tsoom Hmoob yuav tsum sib hlub tiag tiag, mas yuav zoo xwb xwb.”
“Kuv yuav thov Ntuj kom Hmoob mas txawj sib haum xeeb. Tiam sis nej paub zoo dua kuv tias Hmoob mas sib haum xeeb nyuaj kawg. Ua li kom nej sib haum xeeb nyob hauv nej lub neej thiab nej ua yam twg mas kom nej sib haum xeeb thiaj li muaj zog.”
