Tsuj dej : nrhiav ib khob dej. (Treading water: struggling for a glass of water)
Kev tawm tsam los ntau xyoo, vim yog tawm tsam txog teeb meem tsis muaj dej txaus haus uas tshwm sim nyob ntawm ntug dej Npees Las Des. Teeb meem yog los ntawm kab mob uas los hauv dej los, dej daw ntsev thiab liaj teb muaj tsawg zuj zus.
10 tawm xyoo tag los, Purnima Mandal tsev neeg kheev kheev raug tus kab mob uas yog los ntawm dej, xws li tus kab mob raws plab. Txhua yam zoo zuj zus tuaj tom qab Caritas Bangladesh tau txais peev nyiaj txiag tuaj ntawm Caritas Switzerland, ces lawv pib ua kom dej ntshiab huv tuaj. Mandal uas nws yog ib tug niam tsev hais tias : “Thaum ub peb cug dej nag rau hauv tej lub hub av loj loj cia haus, peb muaj dej haus raws ntuj nag. Tab sis lub caij ntuj qhuav, peb haus dej hauv tej qhov dej uas peb khawb. Vim li no peb thiaj muaj mob thiab nkim nyiaj ntau mus yuav tshuaj.”
Txij xyoo 2013 los, Caritas cov tshuaj lim dej hu ua Water Doctor uas tuaj ntawm Caritas Switzerland tuaj muaj neeg nyiam siv heev nyob hauv Mongla uas nyob Bagerhat, yog thaj tsam nyob ntawm ntug dej hiav txwv nyob Npees Las Des qab teb. Water Doctor tau siv Clolin los lim dej ua rau dej ntshiab huv thiab zoo siv. Kev hloov los siv dej ntshiab huv ua rau txawv deb heev thiab tsoom pej xeem txaus siab kawg.
Mandal hais tias : “Tsis yog tias kuv tsev neeg xwb, tseem muaj ntau yim neeg nyob sib ze kuj zoo kawg thiab. Vim peb muaj mob tsawg thiab tsis tau mus ntsib kws kho mob lawm. Peb muaj dej ntshiab haus thiab txuag tau nyiaj.”
Ntawm cov hauj lwm no, siv nyiaj tsawg heev. 400 liv dej yog 40 taka xwb. Yog muab piv rau tus nqi hauv khw mas yog 800 taka los yog 7 dos las diam. Dej ntshiab huv 400 liv yog kev daws teeb meem uas tsim nyog kawg.
Dej daw ntsev ua teeb meem lwm yam.
Tej thaj tsam nyob Khulna uas nyob qab teb, mas dej daw ntsev thiab txheem mus txog cov dej hauv tej qhov dej thiab av tib si, ces zoo li muaj ntsev nyob txhua txhia qhov chaw. Ua rau kev ua kom dej huv thiab tsuag yog qhov nyuab heev nyob hauv thaj tsam no. Xyoo 2013, Caritas thiaj pib koom tes nrog Water Doctors daws cov teeb meem dej haus.
Kev yuav tau dej huv haus nws yog qhov nyuab kawg thiab tseem ceeb nyob ntawm ntug dej hiav txwv naj. Cov poj niam yuav siv sij hawm ua hauj lwm thiab mus cug dej. Tsoom pej xeem ris lub nra hnya kawg, vim yuav tsum siv nyiaj mus kho tus kab mob raws plab. Nkim sij hawm ua hauj lwm ntau dua, vim muaj mob thiab qee zaus tej poj niam kuj yug tau me nyuam tsis txwm pua. Ces yog qhov kev nyuab kawg rau tsoom pej xeem yuav tsum ris thiab daws teeb meem lawv tus kheej.
Raws li kev soj ntsuam ntawm lub Koom Haum txawv teb chaws Pratical Action xyoo 2015, mas pom tias cov thaj tsam ua liaj ua teb nyob Npees Nkos naj, txhwj xeeb tshaj yog thaj tsam Khulna, Bagerhat thiab Satkhira pom tias poob qis kawg yam txaus txhawj. Tej pas dej tauv piam sij los ntawm kev tshau qhov dej los yug cws, ua rau dej nyab thiab muaj dej teev ntev ntev nyob hauv cov thaj tsam li hais no. Tej liaj teb raug dej qab ntsev nyab ntev, vim dej nyab tas nyab dua thiab dej teev ntws tsis taus, thiaj ua rau av piam sij tas. Ntiaj teb lub Koom Haum kev noj qab haus huv qhia kom tsoom pej xeem yuav tsum noj ntsev ib hnub li ntawm 5 gram. Tab sis tsoom pej xeem nyob hauv cheeb tsam no lawv noj ntsev li ntawm 200 npaug nyob hauv ib hnub, ces ua rau lawv muaj kev txhawj xeeb txog lawv lub cev ntaj ntsug heev kawg. Vim noj ntsev ntau yuav ua teeb meem rau hlab ntsa paj hlwb thiab plawv nres yam txaus txhawj. Cov teeb meem dej qab ntsev no, ua rau tej dej haus thiab kev ua liaj ua teb yog qhov txaus txhawj, vim nws yuav ua rau muaj kab mob raws plab thiab lub plab zom zaub mov tsis zoo thiab ua teeb meem rau neeg tej tawv nqaij. Cov teeb meem no ua rau cov tsev tsim dej huv tau zoo kev ua lag luam nrhiav nyiaj txiag. Tsim nyog cov tseem hwv yuav muab siab rau nrhiav dej ntshiab huv rau tsoom pej xeem, vim yog tseem hwv lub luag hauj lwm.
Tab txawm Water Doctor Caritas Bangladesh yuav ua tau hauj lwm tiav, tsis kav lawv kuj ntsib teeb meem thaum Caritas Switzerland thim rov qab xyoo 2020, ces Water Doctor pib nres. Txawm tias Caritas Npees Las Des muab siab rau nrhiav peev nyiaj txiag npaum li cas, tsis kav xyoo 2022 Water Doctor kuj tso cov hauj lwm tseg. Caritas Npees Las Des kuj maj mam ua cov hauj lwm ntxiv mus, yam li khawb qhov dej thiab cug cov dej nag coj mus faib rau tsoom pej xeem. Lawv nrhiav tej lub rhawv loj loj kom ntim tau dej ntau khaws tseg rau tsoom pej xeem tau siv.
Das hais tias : “Dej yog teeb meem tseem ceeb, vim dej yog qhov pej xeem xav tau tshaj plaws. Peb tsis tau txais nyiaj pab tuaj qhov twg tuaj, hais txog dej haus ntxiv mus, ces peb tsuas vam txog peb lub peev xwm thiab kev pab ntawm tseem hwv xwb.”
Tam sim no tseem hwv tab tom khawb cov qhov dej thiab pab nrhiav cov hwj roj hmab loj loj rau tsoom pej xeem, kom lawv tau khaws dej cia siv. Tab sis cov tseem hwv lawv kuj tsis tuaj yeem ua tau lawv ntiag tug, yuav tsum yog tau txais kev txhawb nqa ntawm tsoom pej xeem. Peb siv tshuab lim dej ntim rau hauv cov hwj dej kom tau faib faib rau tsoom pej xeem, peb twb pib cov hauj lwm lim dej no los tau 6 lub hlis lawm. Ces tsoom pej xeem pib muaj dej tsuag dej huv zoo haus zuj zus.
