Kooj txom fav ua kom pom txog teeb meem kev piam sij ntawm cov neeg Nyab Laj kev ua liaj ua teb.
Kooj txom fav ua kom pom txog teeb meem kev piam sij ntawm cov neeg Nyab Laj kev ua liaj ua teb.
Tseem hwv hais tias kooj txom fav ua kev piam sij rau tej nroj tsuag thiab qoob loo li ntawm 1,031 hev taj nyob hauv 11 lub xeev nyob Nyab Laj qaum teb.
Tran Duc Quyen pw ib hmos hmos tsis tsaug zog. Suav txij hnub muaj kooj txom fav los noj cov xyoob dag thiab tej qoob loo hauv lub xeev Nghe An, uas nyob pej fab naj hauv Nyab Laj teb 2 lub lis piam tag los. Tran Duc Quyen muaj 59 xyoos, nws muaj 3 tug me nyuam. Nws thiab nws cov tub siv tej lub tsig los cuab kooj, kom kooj txhob noj lawv tej nplej thiab pob kws uas lawv cog, tab sis tsis tau qab hau dab tsi.
Quyen thaj av uas nws cog qoob loo yog nyob nruab nrab hauv tej zej zog cov liaj teb, ces yog ib qho nyuab kawg uas yuav tiv thaiv tau kooj txom fav kom tu noob. Muaj tsoom pej xeem ntau pua leej tej qoob loo kuj raug kooj txom fav noj ib yam nkaus nyob hauv 11 lub xeev. Cov kooj txom fav pib ya los noj tsoom pej xeem tej qoob loo txij hnub tim 6 lub 6 hli no los. Yog lub pwm tsav ua liaj ua teb thiab txhim kho zej zog tshaj tawm cov lus no.
