ZAJ NYEEM HNUB TIM 16 LUB 12 HLIS: HNUB NCO TXOG XYA TUS TIM KHAWV THAIB NYOB XOOS KHOOS
COV LUS NYOB PHAU NTAWV XAM PHAJ (XP 24: 2-7, 15-17)
LUB MOO ZOO RAWS LI MAS TAIS (MT 21: 23-27)
Kwv tij Hmoob sawv daws, cov His Xas Lais tawm hauv Hais Nkws Tos teb los mus rau sab hnub tuaj, lawv hla mus rau Es Doos teb ces mam nce toj mus rau lub tiaj Muas uas nyob sab hnub tuaj ntawm tus dej Yos Las Das ncaj rau lub tsheej Yes Lis Kos. Tus vaj Muas hu ua ‘Npas Las’ nyob hauv lub teb chaws Kas Nas Has ntshai cov His Xas Lais, mas nws hu tus txiv dab Nplas Las Has tuaj pab foom lus phem rau cov His Xais Lais. Tab sis Huab Tais Tswv Ntuj hais rau Npas Las Has kom txhob foom lus phem rau haiv His Xas Lais, ces Npas Las Has nrog cov Muas mus. Npas Las Has tsis hais cov lus phem los tsawm cov His Xas Lais, nws hais cov lus foom hmoov zoo rau cov His Xas Lais xwb. Npas Las Has tseem ua Yaj Saub ceeb toom Huab Tais Tswv Ntuj cov lus tias tus Pleev yuav tawm hauv cov His Xas Lais tuaj. Npas Las Has hais zoo li no “Kuv pom ib lub hnub qub sawv hauv Yas Kos tuaj, ib rab cwj ua vaj sawv hauv His Xas Lais los. Nws ntaus cov Muas ob sab ntsos, nws tsoo Xes cov tub taub hau tawg tas.”
Kwv tij Hmoob, Huab Tais Yes Xus yog lub hnub qub tsom kev hauv qhov tsaus ntuj, yog peb txais Huab Tais Yes Xus tuaj nyob hauv peb mas peb yuav muaj Huab Tais Yes Xus lo lus ua lub teeb coj peb kev.
Hnub no lub Moo Zoo piav tias thaum Huab Tais Yes Xus qhia tsoom sid nyob hauv lub Tuam Tsev Teev Ntuj, cov thawj Leej Choj thiab cov txwj laus neeg tuaj nug Huab Tais Yes Xus saib leej twg muab cai rau Huab Tais Yes Xus qhia sawv daws.
Lawv nug li ntawd, vim tsuas yog cov Thoob Xwm Txoj Cai xwb thiaj muaj cai qhia tsoom pej xeem nyob hauv lub Tuam Tsev Teev Ntuj. Huab Tais Yes Xus tsis yog ib tug Thoob Xwm Txoj Cai.
Cov Thoob Xwm Txoj Cai qhia dab tsi? Lawv qhia Huab Tais Lo Lus Qhia uas puag thaud Mais Xes txais ntawm Huab Tais Tswv Ntuj nyob saum roob Xis Nais thiab nthuav Mais Xes Txoj Cai rau sawv daws mloog. Lawv pom ib tug tsis yog Thoob Xwm Txoj Cai li lawv los qhia tsoom sid mas lawv nyob tsis taus.
Huab Tais Yes Xus tsis nrog lawv sib cav, nws tsuas twv lawv tias yog lawv qhia tau tias leej twg pub cai rau Zam ua kab ke ntxuav mas nws thiaj yuav qhia tias leej twg pub cai rau nws qhia tsoom sid nyob hauv lub Tuam Tsev Teev Ntuj.
Lawv lo lus teb yuav yog lo lus rov qhia rau lawv tias leej twg pub cai rau Huab Tais Yes Xus qhia tsoom sid.
Lawv xav tias yog lawv teb tias Tswv Ntuj pub cai rau Zam ua kab ke ntxuav, mas Yes Xus kawg yuav hais tias yog li ua cas lawv tsis ntseeg Zam cov lus; yog lawv hais tias Zam lam tau lam xev tswv yim ua xwb, mas zeej tsoom yuav tsis hwm lawv ntxiv vim sawv daws puav leej saib tias Zam yog Tswv Ntuj ib tug Yaj Saub. Lawv muab xav xav tas, yuav hais li cas los kawg rov ntob lawv xwb, ces lawv thiaj teb tias “Peb tsis paub.”
Kwv tij Hmoob, muaj ntau zaus peb ua zoo li cov Thoob Xwm Txoj Cai thiab cov txwj laus hauv lub Moo Zoo hnub no, peb pom lwm tus ua tej yam hauj lwm zoo, pom muaj neeg cav lus zoo txog lawv, mas peb lub siab muaj khib; peb pib nrhiav cai rau tus neeg ntawd.
Lub caij Tos Huab Tais no tsim nyog peb yuav tso lub siab khib pov tseg, peb pom lwm tus ua zoo, pom muaj neeg nyiam lwm tus dua peb mas peb yuav nrog nws zoo siab thiab nrog zeej tsoom zoo siab.
