Zaj nyeem hnub tim 8 lub 3 hlis 2026
Hnub Chiv, Lis Piam 3 caij Plaub Caug
Cov lus nyob hauv Zam Ntawv Moo Zoo (Z 4: 5-42)
Cov kwv tij Hmoob, hnub no yog hnub chiv lis piam 3 hauv lub caij Plaub Caug. Peb tab tom npaj siab npaj ntsws, hloov yus lub siab kom ntshiab kom huv. Lo lus tseem ceeb hauv lub caij no yog lo lus “hloov,” peb thiaj hais tias peb yuav tsum hloov lub siab kom zoo, hloov lub neej kom ncaj, hloov yus lub tswv yim, hloov yus cuj pwm kom huv. Hauv lub caij no peb yuav tsum rau siab hloov ib yam los ob peb yam uas tsis tshua zoo kom zoo tuaj. Yam li thaum yus nyiam hais lus phem rau luag, kuj thov kom peb hloov yus tus kheej, ua neej tshiab, muab siab ua kom tau tias txij no mus yus tsis hais lus phem phem rau luag lwm tus lawm. Ua li no, mas Huab Tais Yes Xus xav kom peb ua kom tau, nws nyiam yam no tshaj dua kev yoo mov xwb, kev teev ntuj xwb, tiam sis yus tsis hloov dab tsi. Lub caij Plaub Caug los dhau lawm, kuj tseem ua neej li qub, muaj cuj pwm li qub, kuj tsis yog nawb.
Huab Tais Yes Xus yog dej muaj txoj sia, peb yuav tsum haus dej muaj txoj sia uas nws muab rau peb haus. Cov dej muaj txoj sia yog Huab Tais Yes Xus thiab nws cov lus. Yog peb ua zoo li nws cov lus qhia, kuj piv li peb tau haus dej muaj txoj sia los yug peb lub neej lawm. Dej muaj txoj sia uas peb haus yuav hloov peb lub neej, yug peb tus tsuj plig, maj mam ua kom peb hloov ua neej siab zuj zus. Zoo li tus poj niam Xas Mas Lias hauv lub Moo Zoo hnub no, thaum nws hnov Huab Tais Yes Xus hais li ntawd, nws ntseeg txog Huab Tais Yes Xus, ces nws tsis yog neej li qub lawm, nws tsis ua neej li qub lawm. Nws hloov nws tus kheej, nws thiaj tau txais txoj sia nyob mus li. Hnub no thaum peb mloog Tswv Ntuj Lo Lus tas lawm, kuj thov peb ua zoo li tus poj niam Xas Mas Lias. Thov Tswv Ntuj pab peb, foom hmoov zoo rau peb txhua leej txhua tus mog.
