ZAJ NYEEM HNUB TIM 21 LUB 12 HLIS: HNUB NCO TXOG LEEJ NTSHIAB POB ZEB KAS NIS XIS AS
COV LUS NYOB PHAU NTAWV KWV TXHIAJ (KwT 2: 8-14)
LUB MOO ZOO RAWS LI LUS KAS (LK 1: 39-45)
Kwv tij Hmoob sawv daws, thaum peb hnov cov kwv txhiaj hauv phau Ntawv Ntshiab hais txog ‘tus kuv hlub’ mas peb txhob muab ntau nqe hais tias ua cas phau Ntawv Ntshiab yuav hais tej zaj nkauj nraug kev sib hlub sib tshua. Tsis yog li ntawd.
Cov kwv txhiaj hauv phau Ntawv Ntshiab yog ib cov lus paj hais txog cov His Xas Lais thiab Huab Tais Tswv ntuj txoj kev hlub. Cov His Xas Lais muab Huab Tais Tswv Ntuj piv li lawv tus hlub tab tom tuaj. Yog li mas zaj kwv txhiaj peb hnov hnub no thiaj hais tau tias “Cov His Xas Lais, nej saib mas! Huab Tais Tswv Ntuj tuaj lawm, Huab Tais Tswv Ntuj dhia hla toj roob hauv pes khiav tuaj. Cov His Xas Lais nej ntsia saib! Huab Tais Tswv Ntuj tuaj sawv nraum ntsa loog, Huab Tais Tswv Ntuj xauj nraum qhov rais tuaj, Huab Tais Tswv Ntuj nyob nraum laj kab ntsia ntsoov tuaj. Huab Tais Tswv Ntuj tsa suab hais rau nej tias “Nej sawv tsees mas! Nej los cuag kuv mas! Nyem no lub caij ntuj no dhau lawm, nag twb tu lawm. Paj tawg puv tas lub teb chaws. Yog lub caij seev lus paj lus taum. Tus nquab tsug twb pib quaj hauv peb cov teb tuaj. Cov txiv cev ua cos ntsuab vog, cov paj txiv cawv tsw qab ntxiag. Nej sawv tsees los mas! Nej sawv los! Nej kav tsij los cuag kuv mas.”
Kwv tij, yog peb muab ua tib zoo saib mas peb yuav pom tias tsis yog cov His Xas Lais tawm mus nrhiav Huab Tais Tswv Ntuj, tiam sis yog Huab Tais Tswv Ntuj tawm tuaj nrhiav cov His Xas Lais. Tab sis Huab Tais Tswv Ntuj kuj hwm cov His Xas Lais, ces Huab Tais Tswv Ntuj nyob sab loog nraud xauj thiab ntsia, hu cov His Xas Lais kom qhib qhov rooj tawm mus.
Peb pom tias Huab Tais Tswv Ntuj hlub cov His Xas Lais tas npaud, nyem no Huab Tais TSwv Ntuj kuj hlub peb li ntawd. Huab Tais Tswv Ntuj tawm tuaj nrhiav peb thiab hu peb kom qhib siab txais Huab Tais Tswv Ntuj los nyob hauv peb, los koom pub Huab Tais Tswv Ntuj txoj sia rau peb.
Lub Moo Zoo hnub no kuj yog ib yam zeem tseeb rau peb pom tias tsis yog peb xub nrhiav kom tau pom Huab Tais Tswv Ntuj tab sis yog Huab Tais Tswv Ntuj xub tuaj cuag peb. Mab Liab muaj Tswv Ntuj Leej Tub lub txiv txi nyob hauv nws lub cev, ces Mab Liab coj Tswv Ntuj Leej Tub tawm rooj mus cuag tus me nyuam tib neeg xeeb nyob hauv nws tus phauj lub cev. Thaum Tswv Ntuj Leej Tub thiab tus me nyuam neeg sib ntsib, nkawd dhia zoo siab hom khaj nyob hauv leej niam lub cev.
Lub caij Tos Huab Tais no, peb tsoom neeg zoo tam li tus me nyuam Zam nyob hauv Es Lis Xas Npes lub plab, hos Tswv Ntuj Leej Tub tab tom tawm tuaj nrhiav peb. Tswv Ntuj Leej Tub yuav ntsib peb nyob hauv hnub peb ua hmoov Yes Xus yug. Hnub ntawd peb sawv daws yuav zoo siab dhia hom khaj xws li tus me nyuam Zam dhia nyob hauv Es Lis Xas Npes lub plab.
Kwv tij, nej sawv daws yuav zoo siab mog. Tswv Ntuj tuaj yuav txog lawm tiag.
