Tus cuj pwm kev noj mov ntawm koj, puas ua teeb meem li cas rau koj lub cev, koj yuav hloov tau li cas ? (Eating Habits Affect Your Health)

Tus cuj pwm kev noj mov ntawm koj, puas ua teeb meem li cas rau koj lub cev, koj yuav hloov tau li cas ? (Eating Habits Affect Your Health)

Txhob ua xyem xyav kiag tias : thaum peb noj mov pab peb lub cev, peb pom tias peb lub cev ntaj ntsug nyob zoo kawg. Yog vim li cas ho zoo li no ? Tej zaub mov peb noj mus rau hauv peb lub cev, muaj txiaj ntsim qab hau rau peb tej kev ua hauj lwm txhua txhua hnub zoo li cas ?

Yog hais txog kev noj qab nyob zoo ntawm peb lub cev, nws muaj txiaj ntsim qab hau heev. Qhov tseem ceeb tshaj yog peb lub plawv. Qhov uas peb loj rog thiab hnyav, kev tsis dhia tsis qoj tes taw, kev chim siab, muaj ntshav siab thiab phob vog. Tej yam no tuaj yeem ua rau peb lub plawv muaj mob thiab mob lwm yam Cancer tau zoo heev.

Tej zaub mov peb noj, nws pab peb lub cev kom muaj zog ua hauj lwm xwm yeem. Yog peb noj tsis raug thiab tsis haum, yuav ua rau kev xam ntawm tej zaub mov ua teeb meem rau peb lub cev thiab peb tsis muaj zog. Kev muaj txhiam xws noj zoo raws peb tus cuj pwm, nws yog qhov tseem ceeb pab kom peb muaj zog thiab muaj txoj sia nyob ntev. Qhov tseeb tiag, tej zaub mov uas peb noj tuaj yeem pab peb zam tau tej tus kab mob thiab pab peb tiv thaiv tsis ua kom peb lub cev ua qob qis los sis qaug zog.

Tej txhiam xws zaub mov noj, pab peb lub cev tau li cas ?

Tej zaub mov peb noj, nws ua kom peb tej nqaij tej leeg thiab roj ntsha tuaj yeem ua hauj lwm tau zoo heev. Zoo ib yam li peb xov ib lub vaj, peb tab tom cog noob txiv lws suav rau. Peb yuav xaiv cov av kom haum thiab muaj tshav ntuj haum, cov txiv lws suav peb cog thiaj yuav txi zoo. Txawm li cas kuj xij, yog koj xaiv thaj av zoo tsis txaus, muaj tshav ntuj tsis txaus, tej zaum koj cov txiv lws suav kuj siav tsis txaus, liab tsis txaus, caws maum thiab tsis zoo nkauj.

Hais ib qhov ntxiv tias : kev pub txhiam xws noj kom haum rau lub cev, tuaj yeem pab kom yus lub cev loj hlob tiav ua tus neeg muaj lub cev ntaj ntsug zoo. Kev noj txhiam xws zoo thiab txaus rau yus lub cev, tsis yog pab kom yus lub cev muaj zog thiab loj hlov tiav neeg xwb, nws tseem pab rau yus cov hlab plawv ua hauj lwm zoo thiab.

Vim tias thaum yus noj tej txhiam xws ntawd mus rau hauv yus lub cev, nws yuav lim thiab nqus tej yam tseem ceeb ntawm cov txhiam xws yus noj mus yug yus tej hlab siab hlab ntsws thiab tej nqaij mos nyob ze lub plawv kom zoo thiab muaj kev tiv thaiv. Nws kuj yog nyob ntawm tej hom txhiam xws noj thiab. Muaj tej yam yus noj mus kuj yuav ua rau yus lub plawv dhia ceev thiab ua hauj lwm ntau tuaj. Qhov no yog qhov yuav ua kom plawv nres tau.

Tej zaub mov uas muaj roj ntau, yuav ua kom yus cov Cholesterol uas tsis zoo (LDL) nce siab tuaj thiab tej zaum yuav ua rau cov hlab ntshav liab khov, los sis ua rau yus cov Cholesterol nqaim dua qub. Qhov nqaim dua qub yog txhais tias thaum lub plawv tau txais ntshav, mas lub plawv yuav ua hauj lwm ntau kom lim tau cov ntshav khiav mus los sib luag. Yog tias koj noj tej txhiam xws zoo pab koj lub cev, nws yuav tiv thaiv tau lwm hom kab mob Cancer zoo dua.

Raws kev tshawb fawb tshaj tawm xyoo 2018 los ntawm BMJ, pom tias muaj kev soj ntsuam los ntawm kev muab tej txhiam xws noj rov ua dua tshiab thiab xyaw lwm yam kom muaj qhov qab tuaj, xws li tus ntxhiab tsw thiab qab, tsos thiab kev ceev khaws tseg. Tej yam no pom tias kev noj cov txhiam xws muab hloov ua lwm yam noj, 10 feem pua yuav muaj kev kis tus kab mob Cancer siab txog 12 feem pua. Tsis tas li ntawd, cov poj niam yuav mob Cancer ntawm lub mis tau li ntawm 11 feem pua.

Tab txawm tias cov txhiam xws li hais no, nws txaus ntshai thiab ua kom muaj mob tau, tsis kav kuj tuaj yeem pab yus lub cev thiab kev ua hauj lwm ntawm lub plawv tau thiab. Tej roj uas neeg noj thiab pab tau lub cev xws li : roj txiv ntoo thiab roj los ntawm tej nroj tsuag, kuj pab ua kom Cholesterol nqis thiab pab tau yus cov hlab ntshav liab. Ua kom yus lub plawv lim ntshav mus los tau zoo. Kev chim siab npau taws hauv lub plawv kuj muaj tsawg thiab ua kom lub plawv dhia xwm yeem.

Cov zaub mov tsis zoo yog dab tsi ?

Kev muaj zaub mov noj tsis txaus rau yus lub cev, yog cov zaub mov tsis zoo thiab tus cuj pwm ntawm kev noj mov kuj yuav ua rau yus muaj tus kab mob rog, muaj ntshav qab zib thiab kis lwm hom kab mob rau cov hlab ntshav paj hlwb, hlab plawv thiab tus kab mob Cancer. Zaub mov tsis zoo yog los ntawm tej zaub mov uas yus lub cev xav tau, tab sis tsis tau noj mus pab. Xws li cov zaub mov muaj hlab thiab muaj Vitamins qis, los yog muaj roj, muaj suab thaj thiab qab ntsev dhau.

Tab txawm yog tej txhiam xws noj uas yuav nyob hauv kiab khw, nws kuj muaj tej yam qab txaus peb siab, tab sis kev ntim hauv hnav roj hmab thiab kev khaws tej txhiam xws noj ntawd, nws yuav ua rau tej yam uas peb lub cev xav tau ploj mus.

Cov zaub mov tsis zoo yog los ntawm yus noj ntau dhau, yog tias koj lub cev tau txais  calorie ntau dua kev xam ntawm tej zaub mov uas koj noj txhua txhia hnub. Tab txawm tej zaub mov koj noj yog cov zaub mov zoo, tsis kav nws yuav ua rau koj rog tuaj thiab muaj tus kab mob rog phob vog. Yog thaum koj muaj tus kab mob rog thiab hnyav tuaj, yuav ua rau koj muaj ntshav qab zib thiab mob plawv tau.

Ib qhov ntawd, yog tias koj noj zaub mov tsawg dhau, nws kuj yuav ua rau koj lub cev tau noj tsis txaus, ces zoo li koj tsis muaj txhiam xws noj. Cov neeg muaj ntau yam kab mob xws li ; dhuav zaub mov, yuav ua kom nws lub plawv kis kab mob tau ib yam li cov neeg noj mov ntau.

Cov zaub mov noj tsis zoo, ua dab tsi rau koj lub cev ?

Cov zaub mov noj tsis zoo, yuav ua teeb meem ntau yam rau koj lub cev. Tsis yog tias yuav ua kom koj muaj mob xwb, tseem ua rau koj siab ntsws puas, lub zog ntaug, tawv nqaij tsis zoo thiab kev nyob ntawm koj nrog rau txoj sia luv. Zaub mov noj tsis zoo, kuj ua teeb meem kom koj chim, qaug zog thiab tsis qab siab ua hauj lwm. Ua kom rog thiab hnyav tuaj, mob kaus hniav, muaj ntshav siab, Cholesterol nce siab, teeb meem hlab ntsha hauv paj hlwb, ntshav qab zib, pob txha tsis khov, lwm yam kab mob Cancer thiab kev noj zaub mov tsis xwm yeem.

Zaub mov noj tsis zoo, kuj ua rau yus lub cev kev noj qab nyob zoo hauv txhua txhua hnub qis zuj zus thiab kev lom zem, kev ua hauj lwm tsis zoo li qub.

Kev noj zaub mov pab yus lub cev yog hais txog dab tsi ? Koj yuav pib coj tej yam no mus ua thiab hloov tus cuj pwm kev noj mov tau li cas ? Tej zaum tej yam no kuj pab tau qee leej kom txhob rog, ntshav tsis siab, thiab qee leej kuj pab kom lawv tau noj qab nyob zoo sov siab dua qub tuaj.

Kev pauv hloov tej yam no, tsis yog yuav ua tau sai nyob hauv ib hmos los yog ib hnub. Koj tsis tuaj yeem yuav pib sawv ntxov thiab hloov tus cuj pwm tau rau yav tsaus ntuj. Tej yam no yog qhov yuav maj mam hloov zuj zus thiab ua tau yooj yim. Piv li koj xaiv ib lub zaub Broccoli los hloov cov qos liab uas koj zom xyaw nqaij, los yog koj siv txiv Apple los hloov cov qos yaj ywm ua tej yam noj thaum sawv ntxov.

Ntxiv mus no yog qhov qhia kom paub thiab yog lub tswv yim muaj txiaj ntsim, pab kom koj muaj lub cev ntaj ntsug nyob zoo thiab muaj lub neej sov siab.

• Noj zaub thiab txiv xyoob txiv ntoo kom ntau nyob hauv niaj hnub. Sawv ntxov noj mov mog thiab blueberries. Noj txiv xyoob txiv ntoo 2 zaug nyob hauv ib hnub thiab noj zaub.
• Noj tej yam muaj roj kom tsawg, nyeem cov ntawv luag sau rau ntawm tej txhiam xws noj uas koj yuav. Koj yuav saib yam luag muab sib tov thiab xaiv yuav hom koj nyiam.
• Txhob noj daw ntsev, nco ntsoov rau ntse kom tsawg zuj zus nyob hauv tej yam koj noj, mus txog qhov tsuag plig.
• Noj piam thaj kom tsawg, koj yuav xaiv noj tej yam txhiam xws uas muaj qhov qab zib tsawg.
• Haus dej kom ntau, yam li haus dej dawb kom ntau dua tej yam dej haus uas qab zib. Yuav pab kom koj qhov hnyav nqis thiab tawv nqaij zoo, vim txhua yam hauv koj lub cev 70 feem pua yog dej.
• Soj ntsuam txog koj tus kheej, noj zaub kom ntau hauv koj pluas hmo, txhab tej yam muaj qab hau uas tsis muaj roj, xws li nqaij, ntses, nqaij qaib thiab taum. Kom koj pluas mov muaj 4 yam no.
• Xub xav ua ntej tias : ib qho teeb meem los ntawm cov neeg noj lawv pluas tshais, yog qos yaj ywm kib thiab tej ncuav qab zib, yog vim lawv maj. Xav txog pluas mov kawg hauv lub lis piam thiab tej yam xob yem. Yuav yam koj xav tau thiab npaj kom muaj txhiam xws txaus. Tej yam no pab kom koj tau noj cov zaub mov zoo rau koj lub cev thiab pab kom koj txuag tau nyiaj.