Khiav ntawm Suav teb : kev khiav ntawm cov neeg thoj nam Suav nyob As Mes Lis Kas teb thiab nyob Aws Los Pas. (Escape from China: the boom of irregular migrants in the US and Europe)
Tom qab thawj zaug ntawm kev xuas dav hlau xa neeg rov qab, mas cov xwm txheej no raug muab los sib hais hnyav kawg ntawm TRAMP thiab BIDEN. Teeb meem kub ntxhov tom qab tus kab mob COVID-19 yog qhov loj kawg. Txoj kev mus txog Italy uas hla Serbia nws yog qhov ntxhov siab txog cov neeg raug muag.
Kev khiav ua neeg thoj nam txhaum cai ntawm cov neeg Suav muaj coob zuj zus nyob hauv txhua xeev ntuj. Ob peb hnub dhau los no, lub pwm tsav tuav kev ruaj ntseg nyob As Mes Lis Kas teb tshaj txog Alejandro Mayorkas cov lus tias : tseem hwv As Mes Lis Kas tau xa 116 tus neeg Suav ua neeg txhaum kev cai rov qab mus Suav teb, thiab yog thawj zaug ntawm kev xa cov neeg txhaum cai nyob hauv 5 xyoo tag los. Raws kev soj ntsuam ntawm tseem hwv As Mes Lis Kas, pom tias muaj cov neeg Suav khiav hla Mev Xis Kos ciam teb mus rau Kas Nas Das teb li ntawm 56,000 leej. Lawv yog nyiag kev khiav hla teb chaws lub caij nplooj ntoos zeeg xyoo 2023 thiab 2024.
Coob dua tsaib ub lawm 3,000 leej. Cov xwm no thiaj raug muab ua lus hais sib cav ua ntus zus thiab tseem yuav muab los hais nyob hauv kev xaiv tsa tus Txoov Tim Tswv tshiab sai sai no. Cov sau npe xaiv tsa ntawm pab nom Republican uas TRAMP ua tus coj, thiaj liam tas liam dua tias : tus Txoov Tim Tswv Joe Biden uas yog tus coj pab nom Democratic, tsis muaj peev xwm tiv thaiv cov neeg thoj nam txhaum kev cai ntawd kom txhob muaj ntxiv.
Kev hais lus saib tsis taus cov neeg thoj nam thiab cov neeg As Xias ntawm TRAMP, nws tsis yog ntxub ntxaug cov neeg Suav ua thoj nam xwb, nws tseem yog hais txog tas nrho cov neeg As Xias uas nyob As Mes Lis Kas teb thiab. Tab txawm Pej Ceeb yuav koom tes nrog tseem hwv As Mes Lis Kas nrhiav kev txwv thiab tiv thaiv cov neeg thoj nam txhaum kev cai los tau ntau lub hlis, tsis kav cov teeb meem no kuj tseem yog qhov ua rau 2 lub teb chaws muaj kev chawj chim tas li. Suav tiv As Mes Lis Kas, thiab As Mes Lis Kas muab cov neeg Suav ua thoj nam los ua chaw tib saib tsis taus Suav. Qhov no yog tus tiam lis Suav nyob Washington cov lus hais 4 lub lis piam tag los.
Ntawm Victor Shih uas nws yog ib tug kws txuj fab kev lag luam Suav nyob hauv lub tsev kawm ntawv txheej siab nyob California thiab San Diego. Nws hais tias cov neeg Suav ua thoj nam nyob As Mes Lis Kas teb txoj kev cia siab tsis muaj li. Vim yog cov tseem hwv Suav Pej Ceeb txoj cai ntawm kev thaj yeeb muaj tsawg heev. Kev kho mob dawb, kev ntiav zog thiab lwm yam tseem hwv As Mes Lis Kas kev pab kuj tsawg heev. Kev khiav ua neeg thoj nam tawm mus txawv teb chaws, yog txoj siv sia nruj heev rau cov tseem hwv Pej Ceeb. Vim muaj qee tus neeg khiav ua thoj nam n
ws yog tub tseev tsim, thiab muaj qee leej rov tiv cov tseem hwv Suav Pej Ceeb.
Cov yim neeg thoj nam lawv muaj ntau yam kev nyuab nyob tom qab, zoo li Wang Zhongwei uas nws muaj 32 xyoos tuaj ntawm Wenzhou tuaj. Nws cia siab tias yuav tau ua lub neej kaj siab lug nrog nws poj niam thiab 2 tug me nyuam. Nws yog tus tswv ntawm ib lub Koom Haum me me uas muaj cov neeg ua hauj lwm li 30-40 leej. Lawv yog xaws khaub ncaws xa mus rau Aws Los Pas tuam teb. Lawv tau nyiaj li ntawm 30,000 txog 60,000 dos las nyob hauv ib xyoos. Tab sis teeb meem kub ntxhov yog los ntawm tus kab mob COVID-19, ces xyoo 2021 lawv lub Koom Haum raug kaw tseg. Yog vim tseem yuav yug nws tsev neeg, ces nws thiaj mus ua ib tug neeg tsav tsheb Platform Didi Chuxing ib yam li lwm tus neeg uas ntsib teeb meem li nws.
Tab txawm tias nws khaws tau me ntsis nyiaj, tsis kav nws tsis tuaj yeem yuav them tau nws tej nuj nqis. Nws hais tias nws xav muab tus kheej tua kom tuag. Zoo li nws lub ntuj yog nyob hauv ib lub nkuaj tsis muaj kev cia siab. Nws thiaj txiav txim siab muab txhua yam muag thiab ncaim mus, kom nws cov me nyuam uas nyob rau ib sab ntug dej hiab txwv muaj lub neej zoo rau yav tom ntej. Tom qab nws mus ntau hnub kev, nws hla Darien Gap uas nrov nto npe, yog xeev ntuj uas xyoob ntoo ntom nti thiab yog toj roob hauv pes nyob nruab nrab ntawm Kos Loos Npias thiab Pas Nas Mas. Qhov kawg nws thiaj mus txog Mev Xis Kos thiab As Mes Lis Kas ciam teb. Nws pib ua lub neej tshiab nyob ntawd.
Txawm li cas kuj xij, teeb meem ntawm kev ua neeg thoj nam nyiag nkag teb chaws txhaum cai ntawm cov neeg Suav, tsis yog muaj nyob As Mes Lis Kas teb xwb, nws kis mus txog Aws Los Pas tuam teb huv tib si. Ob peb hnub dhau los no, tseem hwv Suav lub tshuab ntes neeg tau tsom ntes cov neeg ua tub sab nyiag neeg. Pom tseeb kawg tias lawv nyiag cov neeg Suav khiav tawm mus rau Is Tas Lias teb.
Kev soj ntsuam ntawm cov tub ceev xwm zov ciam teb Trieste, uas lawv zov tus ciam teb Italian thiab Slovenian lub 4 hlis tsaib no, pom tias muaj tej pab neeg thoj nam Suav tsawg tsawg caij dav hlau ya mus rau cov teb chaws nyob ze Is Tas Lias uas lawv tsis siv Visa, xws li Serbia teb. Thaum lawv nyiag nkag mus txog Is Tas Lias teb lawm, lawv raug xa mus rau lub yeej thoj nam lim neeg Cazzago, hauv lub xeev Venice. Lawv ua txuj raug kaw nyob ntawd ob peb hnub, kom cov tub ceev xwm ntseeg. Tom qab ntawd cov neeg thoj nam hnav tej cev khaub ncaws zoo zoo, caij cov tsheb zoo zoo thiab lawv muaj tej lub phij xab zoo nkauj nrog lawv xws li cov tub lag tub luam. Lawv caij tsheb ntawm Cazzago mus txog Venice, Milan, Prato thiab txawv teb chaws uas yog Fab Kis teb thiab Xyis Pas Yas teb raws li lawv lub hom phiaj.
Hos cov khuam nyob Is Tas Lias teb, lawv tej ntaub ntawv raug lwg thiab xa mus rau tseem hwv Suav. Cov neeg thoj nam ntawd thiaj rais ua ib co neeg dab tsis muaj ntaub ntawv, thiab raug nyob ua qhev them nuj nqis hauv tej tuam tsev tsim toob xib thiab tej tsev txiav khaub ncaws.
Dhau ntawm tej xwv txheej no lawm, tseem tshawb pom cov poj niam Suav ntau pua daim duab uas lawv liab qab thiab tuav phau ntawv taug kev (Passport) nyob ntawm lawv tes. Qhov no qhia tias yog ib txoj kev muag cev txheej tshiab ntawm cov neeg Suav nyob hauv xeev ntuj Aws Los Pas.
