ZAJ NYEEM HNUB TIM 8 LUB 6 HLI 2026
HNUB OB, LIS PIAM 10 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 5: 1-12)
Kwv tij Hmoob, Huab Tais Yes Xus qhia peb tias cov tau txoj hmoov zoo muaj 8 cov neeg li no: cov pluag hauv nruab siab, cov siab zoo, cov quaj ntsuag, cov tshaib thiab nqhis txoj kev ncaj, cov hlub luag tej, cov siab huv, cov tsim kev thaj yeeb, cov raug luag hiam vim txoj kev ncaj.
Qhov hnub no tsim nyog rau peb khaws xav tswv yim, mas yog qhov tias muaj pes tsawg zaus peb pab tau cov neeg pluag, cov quaj ntsuag, cov raug hiam kom lawv tau txais Huab Tais Tswv Ntuj lub txiaj ntsim. Muaj pes tsawg zaus peb tau nplij tus neeg txom nyem, peb tau muab kev ncaj ncees, tau hlub, tau hais lus zoo rau lawv, kom lawv tau txais Tswv Ntuj kev hlub khuv leej lawv.
Kom peb nco ntsoov tias cov pluag hauv nruab siab, lawv tau txoj hmoov zoo vim lawv tau txais Tswv Ntuj lub Ceeb Tsheej, cov siab zoo lawv tau txoj hmoov zoo vim lawv tau txais lub ntiaj teb ua lawv li, cov quaj ntsuag tau txoj hmoov zoo vim muaj tus nplij lawv, cov tshaib nqhis txoj kev ncaj tau txoj hmoov zoo vim muaj tus daws lawv qhov nqhis, cov hlub luag tej tau txoj hmoov zoo vim yuav muaj tus hlub lawv, cov siab huv tau txoj hmoov zoo vim lawv pom Tswv Ntuj, cov tsim kev thaj yeeb tau txoj hmoov zoo vim lawv tau ua Tswv Ntuj cov me nyuam, cov raug luag hiam vim txoj kev ncaj tau txoj hmoov zoo vim lawv tau txais Tswv Ntuj lub Ceeb Tsheej.
Peb cov neeg ntseeg txog Yes Xus, peb yuav yog tus pub tej li hais los no rau lawv, yog peb tsis ua li, mas ntshai lawv yuav tsis tau txoj hmoov zoo. Lawv tsis tau txoj hmoov zoo, ces qhov kawg peb kuj yuav tsis tau thiab. Nyob zoo sawv daws.
