ZAJ NYEEM HNUB TIM 7 LUB 6 HLI 2026
HNUB CHIV HWM YES XUS LUB CEV THIAB COV NTSHAV
COV LUS NYOB HAUV ZAM NTAWV MOO ZOO (Z 6: 51-58)
Cov kwv tij, hnub no yog hnub chiv hwm Yes Xus lub cev thiab cov ntshav. Hauv lub Moo Zoo hnub no Huab Tais Yes Xus hais tias: “Hos tus noj kuv lub cev nqaij thiab haus kuv cov ntshav, nws muaj txoj sia nyob mus li.” Nws hais ntxiv tias, “Vim kuv lub cev nqaij yog ib co tseem txhiam xws noj, thiab kuv cov ntshav yog ib yam zoo haus.” Thaum ras txog cov lus no, peb paub meej tias Huab Tais tsis yog zoo tib yam li ib tug xib hwb los ib tug yaj saub uas qhia txog kev zoo, los piav txog Tswv Ntuj lo lus xwb. Tiam sis, Huab Tais Yes Xus yog Tswv Ntuj. Nws lub cev nqaij, cov ntshav, thiab cov lus muaj txiaj ntsim tiag tiag, thiab muaj hwj chim yug peb txoj sia tiag tiag. Li ntawd, thaum hais txog lub cev thiab cov ntshav ntawm no mas, tiag tiag mas peb hais txog lub Cim Yug uas yog tseem txhiam xws noj yug peb txoj sia thiab tsuj plig.
Thaum Huab Tais Yes Xus hais tias “Noj kuv lub cev thiab haus kuv cov ntshav” nws hais txog nws tus kheej, nws hais txog nws txoj kev txhom nyem, raug luag hiam thiab thuam, hais txog nws kev dai saum ntoo cuam thiab tuag. Nws muab nws txoj sia tag nrho: nws cev nqaij daim tawv thiab cov ntshav, rau tib neeg kom paub Tswv Ntuj, kom sib nyiam sib hlub, kom sib koom ua ib ke ua ib pab ib pawg ntseeg koom siab koom ntsws hauv lub koom txoos. Yog vim Yes Xus lub cev nqaij thiab cov ntshav, cov neeg ntseeg, pawg ntseeg, lub koom txoos thiaj yug tau, thiaj tshwm sim tuaj muaj txoj sia tiag.
Li ntawd, kwv tij zoo nyiam sawv daws, thov kom peb paub tias lub Cim Yug yog Huab Tais Yes Xus lub cev thiab cov ntshav tiag tiag. Txhua hnub no los txhua hnub chiv thiaj tsim nyog uas peb yuav tsum tuaj koom thaj txi Ntuj, mloog Tswv Ntuj Lo Lus thiab txais lub Cim Yug. peb thiaj tau txais Tswv Ntuj cov txiaj ntsim tiag. Tsis tas li ntawd, thaum koom thaj txi Ntuj tas lawm, peb rov mus tsev ua neej hauv txoj kev nyiam kev hlub vim kev nyiam kev hlub uas peb tau txais ntawm Yes Xus lub cev nqaij thiab cov ntshav no yuav yug peb txoj sia thiab tsuj plig hauv peb tsev neeg.
“Tus noj kuv cev nqaij thiab haus kuv cov ntshav, nws nyob hauv kuv thiab kuv nyob hauv nws.”
