Paj Muas tsis tshua hais txog nws tus kheej, thaum muaj neeg nug txog nws lub neej nyob Los Tsuas teb. Nws tsis paub tseeb txog nws lub hnub nyoog, vim tsis tau sau cim tseg txog nws lub hnub yug. Nws hais tias : nws tsuas hnov nws txiv piav tias nws yug thaum tseem ua tsov rog Zis Pees xwb. Qhov tseeb tiag, cov neeg laus Hmoob uas lawv muaj hnub nyoog ntau, lawv yuav nco tas txhua yam nyob hauv lawv lub neej qhov tseem ceeb thiab lawv tej keeb kwm. Hmoob muaj keeb kwm piav ua ntu zus los ntev, vim tsis muaj ntaub ntawv los sau cim tseg. Los txog rau xyoo 1950, thiaj muaj cov tub tshaj Ntuj Lus tuaj tsim tus ntawv Hmoob Latin uas niaj hnub siv no.
Kev cai Hmoob qhov tseem ceeb yog hauv yus yim neeg thiab kev hwm poj yawm txwv koob. Muaj ib lo lus niaj txhis piv txoj lus tias :
“Tus noj ntau diav qav, yog tus paub ntau tshaj thiab tsim nyog sawv daws hwm”.
Cov laus uas muaj hnub nyoog ntau, mas lawv yog tus ncej tse nres lub cuab yim neej. Vim lawv txawj ntau yam thiab ntsib tau yam los lawm. Ces ua chaw hwm thiab muaj cai nyob hauv cov zej zog Hmoob thaum ub. Raws kev cai, mas cov Hmoob laus muaj hnub nyoog yuav raug ua raws txheej neeg thiab raws txheeb ze nyob hauv kev cai. Cov laus yuav raug caw mus zaum rooj thiab xub noj mov ua ntej nyob hauv Hmoob tej kev cai dab qhuas. Hauv Hmoob tej kab lis kev cai, ntseeg tias kev thov koob hmoov ntawm cov laus, mas yuav tau txais koob hmoov thiab yuav muaj nyiaj muaj txiaj.
