Ntawv Moo Zoo raws li Mas Tais thiab Lus Kas (1)
Peb rov nug tus kheej nyob hauv ntu kawg ntawm kev sib tham zaum tas los tias :
“Cov tshaj lub Moo Zoo, lawv siv dab tsi los xaiv cov ntsiab lus uas lawv muaj ?” Lawv yuav tso yam cuav pov tseg. Tswv Ntuj cov lus uas peb xav paub hnub no, tab sis lawv tsis tuaj yeem qhia peb tau txhua yam. Lawv yuav tsum xaiv thiab lawv siv dab tsi los xaiv cov ntsiab lus uas lawv muaj ? Tsis ntev peb yuav teb lo lus no. Tab sis ua ntej no peb yuav tham txog tias lwm phau ntawv Moo Zoo tshwm sim tau li cas ? Peb twb tau tham txog Mas Kos phau ntawv Moo Zoo tas lawm. Peb pom lawm tias lub keeb ntawm ntawv Moo Zoo raug sau los li cas. Nws tshwm sim nyob hauv xyoo 68, tom qab tus vaj Nes Los hiam cov neeg ntseeg heev kawg. Mas Kos ntawv Moo Zoo raug sau tawm los, tsis yog tias cov neeg Los Mas thiaj xav tau thiab txhawb nqa kom sau xwb. Nws tseem muaj lwm pab neeg coob coob uas lawv pom tias tsim nyog muaj cov lus no. Vim kev mus saib cov neeg ntseeg ntawm Yes Xus cov Hauv Paus Xa Lus muaj tsawg zuj zus. Thaum cov neeg ntseeg tuaj sib sau txais lub Cim Yug, mas lawv muaj tib txoj kev xwb yog lub Moo Zoo. Yog kev nyeem cov lus uas raug lees txais thiab lwm pab neeg ntseeg lees txais. Cov lus uas raug lees txais no tsuas nrhiav tau nyob hauv Mas Kos ntawv Moo Zoo xwb. Phau ntawv Moo Zoo no siv nyob hauv txhua pab neeg ntseeg thiab vim li no thiaj muaj kev luam tawm ntau phau. Kwv yees 50 xyoo, sawv daws thiaj mam siv ntawv Moo Zoo raws li Leej Ntshiab Mas Kos. Thawj phau ntawv tau txais kev qhuas kawg, tab sis kuj nco tias tseem tshuav ntau yam hais txog Yes Xus Nas Xas Les thiab Yes Xus lub Moo Zoo. Los yog ntau pab neeg ntseeg tsis tau rov hais txog kev nco cov lus tseeb ntawm Yes Xus, uas khaws tseg hauv lub caij cov Thwj Tim tseem muaj txoj sia nyob. Ntawd yog tus neeg tau nrog Yes Xus nyob, tab sis Mas Kos tsis tau hais txog. Thiab cov lus no yuav hnov qab tsis tau, yog leej twg xav paub tias Yes Xus yog leej twg tiag. Qhov no yog qhov laij thawj tias vim li cas ntau pab neeg ntseeg thiaj xav kom muaj lwm phau ntawv Moo Zoo thiab, yog dhau ntawm Mas Kos ntawv Moo Zoo lawm. Tsis tsim nyog tso tseg Mas Kos ntawv Moo Zoo, xws li xyoo 68 uas nyob Los Mas thaum cov neeg ntseeg kom Mas Kos sau nws phau ntawv Moo Zoo hauv cov xyoo 80 txog 85. Thaum thawj tiam neeg yuav tas, muaj ob pab neeg ntseeg uas tseem ceeb heev, yog cov ntseeg nyob As Nthias Kias thiab cov nyob Fis Lis Pos. Cov neeg ntseeg xaiv 2 tug neeg uas npaj txhij nyob hauv lawv los sau ntawv Moo Zoo. Nyob As Nthias Kias lawv kom Las Npis tus hloov siab tig los ntseeg, uas peb hu nws ua Mas Tais tus neeg sau se ua tus sau. Txawm li cas kuj xij, cov lus no tsis yog Mas Tais sau. Tab txawm muaj nws tej lo lus ua pov thawj kuj xij. Tab sis saib ntawm kev sau thiab kev teeb cov ntsiab lus, mas peb nkag siab tias yog sau los ntawm Las Npis tus paub ntawv Torah thiab His Xas Lais liv xwm zoo. Mas Tais lub npe thiab nws cov lus ua pov thawj, ua kom cov lus no muaj hwj chim tuaj. Dua li lwm tus neeg uas sau ntawv Moo Zoo yog Lus Kas. Lus Kas yog ib tug kws kho mob neeg As Nthias Kias, tab sis nws mus nyob Fis Lis Pos. Lus Kas yog tus uas sawv daws paub nws zoo, vim nws nrog Paj Lug mus saib cov neeg ntseeg thiab muab tas nws lub neej los tshaj lub Moo Zoo.
“Vim li cas Mas Tais thiab Lus Kas thiaj xaiv qhov tseeb thiab Tswv Ntuj cov Lus sib txawv ?” Nkawd cov hauj lwm suav tau tias yog tus cag tseem ceeb hauv kev nkag siab txog Tswv Ntuj thiab nws cov Lus. Mas Tais thiab Lus Kas yog tus neeg uas coj tus yam ntxwv sib txawv, thiab nyiam sib txawv. Kev hais lus thiab kev npaj kuj sib txawv. Ces muaj tseeb uas nkawd yuav xaiv cov ntsiab lus nyob hauv nkawd tes raws li qhov nkawd pom tias yog zoo tshaj. Yam twg tseem ceeb dua thiab yam twg muaj txiaj ntsim qab hau dua ? Kev xav tau hauv fab ntsuj plig ntawm cov neeg ntseeg uas nkawd sau ntawv mus rau kuj sib txawv thiab. Vim nkawd sau rau cov neeg ntseeg uas xav tau hauv fab ntsuj plig sib txawv. Lus Kas siv xeem lus txawv Mas Tais thiab Mas Kos.
Leej Ntshiab Mas Tais yog tseem neeg Yus Das, thiab qhov no peb pom tau nyob hauv nws hais txog Ntawv Ntshiab. Mas Tais ntawv Moo Zoo ntawm nws, peb pom hais txog ntawv Cog Lus Qub 70 zaus thiab qee zaus nws ncaj qha hais txog. Zim txwv no muaj qee yam yog hais piv txwv txog tseeb kawg.
