Lub tsev teev Ntuj nyob Mumbai tau coj 6,000 tus neeg mus koom lub koob tsheej sau qoob loo.
Lub koob tsheej no yog npaj los ntawm cov kav xwm thoj nam nyob hauv lub Cheeb Koom Txoos Mumbai, koom nrog txhua pab Txiv Plig nyob hauv lub tsev kawm ntawv hwm Leej Ntshiab Tes Les Xas hauv lub nroog Bandra.
Lub koob tsheej no tau sau cov neeg thoj nam, tshwj xeeb tshaj yog hauv xeev ntuj uas hais xeem lus Hindi nyob Is Ntias qaum teb. Cov uas lawv tau tsiv los ua lub neej nyob Mumbai, kom muaj hauj lwm ua thiab muaj lub zoo neej.
Tswv Qhia Rodrigues nyob Bombay ua tus coj lub Txoos, thiab muaj 25 leeg Txiv Plig koom ua lub thaj txi Ntuj. Hauv cov lus nthuav ntawv Moo Zoo, Tswv Qhia tau txhawb dej siab rau cov neeg thoj nam kom lawv nrhiav lub meej mom, uas yog ua kom lawv txoj kev xav mus raws Tswv Ntuj lub hom phiaj. Nws hais tias : “Cov Leej Ntshiab yog cov tau txais kev sov siab hauv kev ua raws Tswv Ntuj lub hom phiaj.”
Nws hais tias : “Kev ntshiab huv ntawd yog tawm los ntawm kev ncaj ncees hauv lub neej niaj hnub.” Tom qab xaus lub thaj txi Ntuj, cov thawj coj neeg thoj nam tau txais cov lus qhuas txog lub meej mom hauv lawv tej kev ua hauj lwm. Txiv Plig Gleston uas yog tus Txiv Plig saib xyuas cov kav xwm neeg thoj nam, tau hais ib co lus cia siab rau cov tuaj sib koom tias : “Lub Koom Txoos yuav muab kev txhawb nqa ntxiv mus. Tshwj xeeb tshaj yog cov neeg thoj nam uas lawv tsev neeg ntsib teeb meem thiab lwm yam kev txhawj xeeb.” Txiv Plig Cosmos Ekka tau hais txog qhov tseem ceeb ntawm lub koob tsheej no hauv kev txuag tej kab lis kev cai thiab txhawb nqa qhov zoo ntawm cov neeg Adivasi nyob hauv lub Cheeb Koom Txoos. Cov tuaj koom lub koob tsheej tseem tau txais kev qhuab qhia kom nkag siab txog lawv txoj cai hauv kev tseev tsim, pab txuag tej ntaub ntawv kom zoo, thiab txuas nrog lawv tej kab lis kev cai. Kev tsuj xeeb no zeem tseeb txog kev muab siab rau ntawm lub Koom Txoos hauv kev txhawb nqa cov neeg thoj nam, pab txuag lawv lub meej mom, thiab tsim tej kev xav uas yog ib feem nyob hauv Mumbai.
