Kev ntseeg (Peb tsis pom Yes Xes tab sis peb ntseeg, mas Leej Ntuj Plig Ntshiab nrog peb nyob ! )
Kev Ntseeg
Zam ntawv Moo Zoo zaj 20 : 19-31.
“Lawv zoo siab thaum lawv tau pom Tswv Ntuj.”
Cov lus hauv hnub no yuav faib ua ob feem, vim nws haum rau kev yees tawm tuaj ntawm tus sawv rov los. Nyob hauv thawj feem, hais txog Yes Xus pub Leej Ntuj Plig Ntshiab rau nws cov Thwj Tim thiab pub lub hwj chim rau lawv kom yeej kev phem. Nov yog tib lo lus uas peb pom thiab piav nyob hauv hnub Pentecosh. Hauv feem ob, yog hais txog cov xwm uas tshwm sim tuaj rau Tos Mas.
Kev ua xyem xyav ntawm tus Thwj Tim no rais ua paj lug mus lawm. Txawm leej twg kuj xij uas tsis muaj kev tso siab, mas kheev kheev muaj neeg hais tias :
“Koj tsis ntseeg xws li Tos Mas.” Tab sis thaum xav ntxaws lawm, saib zoo li nws tsis tau ua dab tsi txhaum. Nws tsuas yog xav pom yam uas lwm tus pom, vim li cas ho xav kom nws muaj kev ntseeg ntawm lo lus xwb ?”
Tab sis tsuas yog Tos Mas tib leeg ua xyem xyav xwb puas yog ? Hos lwm tus Thwj Tim puas ntseeg tus sawv rov los yooj yim thiab tam sid ? Saib zoo li txhua yam nws tsis yog zoo li ntawd. Hauv Mas Kos ntawv Moo Zoo piav tias ; Yes Xus tawm tuaj rau 11 tug Thwj Tim pom thiab nws kiam txog qhov lawv tsis ntseeg thiab siab tawv, vim lawv tsis ntseeg tus uas tau pom Yes Xus tom qab nws sawv rov los.
Kwv tij Hmoob sawv daws ! Hnub no peb tham txog Zam ntawv Moo Zoo zaj 20 los xaus li no xwb. Thov kom peb txhob ua li Tos Mas, vim nws tsis pom ces nws tsis ntseeg. Yog peb tsis tau pom tus sawv rov los tab sis peb ntseeg, mas Leej Ntuj Plig Ntshiab nrog peb nyob, thiab Yes Xus txoj kev thaj yeeb nyob hauv peb. Peb yuav muaj kev zoo siab, vim Yes Xus sawv rov qab los lawm.
Thov Huab Tais Yes Xus Pleev lub txiaj ntsim nrog nej nyob, ua nej siab kaj lug !
Lwm zaus peb mam sib ntsib dua, nyob zoo nej sawv daws !
