ZAJ NYEEM HNUB TIM 9 LUB 10 HLI 2024
HNUB NCO TXOG LEEJ NTSHIAB DIS OS NIS XIS OS
COV LUS NYOB HAUV LUS KAS NTAWV MOO ZOO (LK 11: 1-4)
Kwv tij Hmoob sawv daws, nyob hauv cov zaj teev Ntuj peb niaj hnub hais, mas tsuas muaj tib zag xwb uas yog Huab Tais Yes Xus qhia; yog zaj ‘Peb Txiv nyob saum ntuj’.
Lub Koom Txoos xav kom sawv daws to taub lub ntsiab, mas lub Koom Txoos thiaj muab zaj ‘Peb Txiv’ cais ua 7 ntu.
Peb ntu ua ntej, mas yog cov ntu cav txog Leej Txiv lub koob meej.
Plaub ntu tom qab, mas yog cov ntu thov Leej Txiv pab.
Peb cav txog Leej Txiv lub koob meej tias “Peb Txiv nyob saum ntuj, koj lub npe ntshiab nto moo lug; koj lub Ceeb Tsheej los txog; kom muaj raws li koj nyiam nyob ntiaj teb no li nyob saum ntuj.”
Ces peb cev cov lus thov Ntuj tias “Thov koj pub mov txaus peb noj hnub no; koj zam txhaum rau peb zoo li peb zam rau luag; koj txhob tso peb raug kev ntxias; koj npo peb dim ntawm kev phem.”
Hais cov lus thov tas mas peb mam hais tias “Ua li” los yog ‘Amen”.
Cov kwv tij, peb hais tias ‘Peb Txiv’ vim tias tsis yog peb ib leeg hais tab sis mas yog tas lub Koom Txoos hais zaj teev Ntuj ua ke, ces peb thiaj koom ib lub suab hais tias ‘Peb Txiv’.
Peb hais tias ‘nyob saum ntuj’ tsis yog lub ntuj ntsuab saum peb taub hau, tab sis yog lub ntuj ntshiab ci ntsa iab nyob hauv peb cov neeg ntseeg nruab siab.
Peb hais tias ‘koj lub npe ntshiab nto moo lug’ mas yog peb tab tom hais tias Huab Tais Leej Txiv lub npe ncha mus txog leej twg pob ntseg mas leej twg yuav cav txog Huab Tais Tswv Ntuj mus li.
Peb hais tias ‘koj lub Ceeb Tsheej los txog’ mas yog peb tab tom tshaj tias thaum Tswv Ntuj lub Ceeb Tsheej tuaj txog peb mas dab phem lub ceeb tsheej yuav ploj mus.
Peb hais tias ‘kom muaj raws li koj nyiam nyob ntiaj teb no li nyob saum ntuj’ mas yog peb tab tom hais tias Huab Tais Leej Txiv nyiam kom peb sib pab sib nres, Huab Tais Leej Txiv nyiam kom peb sib hlub; ces peb xav kom nyob ntiaj teb no sawv daws txawj sis nyiam sis hlub, mas tas lub ntiaj teb neeg thiaj yuav txais tau txoj kev cawm.
Kwv tij Hmoob, peb thov tias ‘thov koj pub mov txaus peb noj hnub no’, mas yog peb tab tom thov Huab Tais Leej Txiv yug peb cev nqaij thiab ntsuj plig nyob hauv hnub no kom txaus, ces peb yuav muab qhov seem coj mus pub rau lwm tus.
Peb thov tias ‘thov koj zam txhaum rau peb zoo li peb zam rau luag’, mas yog peb tab tom hais rau Huab Tais Leej Txiv tias thov Huab Tais Leej Txiv khuv leej peb kom peb txawj zam rau tus neeg ua tsis zoo rau peb, mas peb cov lus thov thiaj yuav nce mus txog Huab Tais Leej Txiv, ces peb thiaj yuav tau txais txoj kev zam ntawm Leej Txiv Tswv Ntuj.
Peb thov ntxiv tias ‘koj txhob tso peb raug kev ntxias’ vim peb ntshai tsam peb ntog hauv dab phem txoj kev ntxias siab, ces peb thiaj thov Huab Tais Leej Txiv pab peb kom dab phem txhob tuaj ntxias tau peb.
Peb hais tias ‘koj npo peb dim ntawm kev phem’ vim kev phem yog tus dab ntxias neeg kom txhob mloog Tswv Ntuj, yog tus coj peb poob mus rau hauv qhov txhaum, ces peb thiaj thov Leej Txiv npo peb dim hauv dab phem txhais tes rub peb mus hauv qhov txhaum.
Kwv tij, peb tseem hais tias ‘Ua li’ yog txhais tias ‘kom muaj tuaj raws li peb cov lus thov’.
Kwv tij Hmoob sawv daws, Huab Tais Yes Xus qhia hais zaj teev Ntuj ‘Peb Txiv nyob saum ntuj’ mas yog Huab Tais Yes Xus qhia tias ua ntej peb yuav thov dab tsi ntawm Huab Tais Tswv Ntuj mas peb yuav xub cav lus zoo txog Huab Tais Tswv Ntuj tso, thiab thaum peb thov mas peb yuav tsis txhob saib peb lub siab ntshaw ua qhov loj tab sis peb yuav thov kom muaj tuaj rau peb raws li Huab Tais Tswv Ntuj pom zoo, los yog Huab Tais Tswv Ntuj pub rau peb yog tias yam peb thov ntawd xis Huab Tais Tswv Ntuj siab. Yog li mas thaum peb cov neeg ntseeg hauv lub Koom Txoos Kav Tos Liv hais ib zag lus thov Ntuj, peb thiaj tsis yuam Huab Tais Tswv Ntuj kom ua xis peb siab, peb thiaj tsis yuam Huab Tais Tswv Ntuj kom ua hwj huam tawm tuaj kiag rau peb pom. Tab sis thaum peb thov Ntuj mas peb tso siab tias yog qhov peb thov ntawd yog yam Huab Tais Tswv Ntuj yeej yuav muab rau peb ces muaj ib hnub twg peb yuav tau txais, tab sis yog qhov peb thov ntawd tsis mus raws li Huab Tais Tswv Ntuj pom zoo, ces Huab Tais Tswv Ntuj tsis pub rau peb los yuav tsis ua cas, vim Huab Tais Tswv Ntuj yeej npaj ib yam zoo dua ntawd rau peb lawm.
