ZAJ NYEEM HNUB TIM 8 LUB 10 HLI 2024
HNUB PEB LUB LIS PIAM 27 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 10: 38-42)
Kwv tij Hmoob, cov lus hauv lub Moo Zoo hnub no mas Leej Ntshiab Lus Kas sau piav txog thaum Huab Tais Yes Xus mus txog lub zos Npes Tas Nis, ces Huab Tais Yes Xus mus so nyob hauv Las Ntxas Los lub tsev. Las Ntxas Los muaj 1 tug muam; yog Mas Tas thiab Mab Liab.
Lus Kas muab zaj no sau tseg cia vim nws xav qhia sawv daws tias tus neeg ua zoo li cas thiaj yuav txais tau qhov zoo tshaj ntawm Huab Tais Yes Xus.
Muab xav saib, thaum muaj ib tug qhua tuaj txog hauv peb tsev mas peb ua zoo li cas? Thaum peb mus teev Ntuj mas peb ua zoo li cas?
Ntseeg tau tias thaum muaj ib tug qhua tuaj txog hauv peb vaj peb tsev mas feem ntau peb yuav kov qhov ub qhov no kom tau txais tus qhua zoo tshaj plaws; yam li tus niam tsev mus npaj pluas qav, mus tu lub chav pw. Tsuas yog tus txiv tsev thiaj nrog tus qhua tham, tab sis yog tus qhua yog poj niam ces tus txiv tsev kuj yuav tsis tshua paub nrog tham thiab los kuj muaj. Tej zaus tus txiv tsev kuj txhib tus niam tsev los yog cov me nyuam kom ua yam ub yam no. Saib saib mas zoo li sawv daws ua ntxhov hnyo.
Hnub no thaum Huab Tais Yes Xus tuaj txog hauv Las Ntxas Los tsev, mas muaj ntsis zoo li hais los ntawd. Mas Tas rau siab ntso lis nws cov hauj lwm; yam li npaj zaub npaj mov, tu chav txais qhua rau Huab Tais Yes Xus thiab cov thwj tim tau so. Mas Tas ua li ntawd, mas nws lub siab fab tsis xyeej yuav los mloog Huab Tais Yes Xus.
Kwv tij, thaum peb ua ib tug qhua mas peb yeej xav nrog tsev neeg tham, peb tsis xav mus ua kev ntxhov rau tsev neeg. Peb yeej tsis xav kom tsev neeg npaj yam zoo zoo rau peb, peb tsuas vam tias lawv thiab peb yuav sib tham luag ntxhwb ntxhi xwb.
Huab Tais Yes Xus yeej xav li ntawd, thiab Huab Tais Yes Xus zoo siab thaum pom Mab Liab los zaum mloog nws. Yog li mas thaum Mas Tas thov Huab Tais Yes Xus pab hais Mab Liab mus pab nws ua num, mas Huab Tais Yes Xus thiaj hais rau Mas Tas tias “Mas Tas koj tsis txhob txhawj txog tej yam yuav ua los txais kuv, tab sis koj yuav ua xws li Mab Liab. Koj tso koj qhov txhawj thiab lub siab fab pov tseg, koj ua siab kaj thiab do dais los mloog kuv hais lus rau koj mas yuav zoo dua.”
Kwv tij, thaum peb mus teev Ntuj los yeej zoo ib yam li. Huab Tais Tswv Ntuj xav kom peb coj ib lub siab kaj lug mus mloog Tswv Ntuj Lo Lus, tsis yog kom peb ris txoj kev txhawj nqa lub siab fab mus hauv lub tsev teev Ntuj. Peb ua li ntawd mas peb yuav mloog tsis tau cov lus Huab Tais Yes Xus xav hais rau peb. Peb ua li ntawd, mas peb yuav tsis to taub tias nyob hauv lub Lis Piam no Huab Tais Yes Xus ntuas kom peb ua dab tsi. Peb teev Ntuj tas mas peb thiaj yws yws tias ‘Ab! Txiv Plig hais dab tsi kuv twb tsis paub li’.
Kwv tij Hmoob sawv daws, txhua zaus ua ntej yuav mloog Tswv Ntuj Lo Lus tsis hais hauv lub Txoos los yog nyeem Ntawv Ntshiab, mas peb yuav tau tso txhua yam kev txhawj kev ntxhov pov tseg, peb yuav nyob tswm xeeb thiab cuab pob ntseg mloog los muab siab rau nyeem; mas peb thiaj yuav txais tau Tswv Ntuj Lo Lus los yug peb txoj kev ntseeg.
