HNUB TIM 7 LUB 11 HLIS; HNUB TSIB LUB LIS PIAM 31 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 15: 1-10)
Kwv tij Hmoob sawv daws, hnub no peb hnov Huab Tais Yes Xus hais txog tus tswv yaj tawm mus nrhiav tus yaj poob zoo, tus niam tsev taws teeb nrhiav nws lub txiaj nyiag poob. Tej zaus nej qee tus yuav xav tias tib nyuag tug yaj poob zoo xwb ua cas yuav nkim sij hawm tawm mus nrhiav, ua cas tib lub txiaj nyiag poob xwb yuav nkim roj taws teeb nrhiav txhiaj txhua. Tab sis yog nej yog tus tswv yaj los tus tswv nyiaj ntawd, mas nej yuav tsis xav li qhov nej hais, nej yeej tsis xav kom muaj ib tug yaj ploj los ib lub txiaj nyiag poob.
Piv rau peb cov Hmoob yug nyuaj yug twm, yug qaib yug npua, mas peb yuav pom tseeb kawg tias thaum ib tug nyuj los twm ploj lawm mas peb lub siab yuav ntxhov npaum cas, thaum ib tug qaib tug npua tsis pom los pw mas peb siab fab cuag li cas.
Tos peb siab tsis kaj li mas tsis yog vim peb saib tias tus nyuj los tus twm, tus qaib los tus npua ntawd peb coj mus muag tau tus nqi kim kim, tiam sis yog peb muaj lub siab nyiam tus tsiaj ntawd.
Kwv tij Hmoob, muaj ib zaug cov ntseeg nug Txiv Plig Nyiaj Pov tias ‘Txiv, ua cas koj yuav nkim nyiaj thiab lub sij hawm los tshaj xov tooj cua ZOO TSWV ZOV YAJ rau Hmoob mloog, koj twb paub tias Hmoob tsis nyiam mloog cov zaj hais txog Ntuj kev cai, lawv nyiam mloog cov lus lom zem.’
Txiv Plig Nyiaj Pov teb li cas rau cov nug nws?
Txiv Plig teb tias ‘Yog li koj hais, tab sis kuv yuav zoo siab heev thaum hnov tias muaj ib tug Hmoob tig los ntseeg txog Tswv Ntuj vim lawv tau mloog peb cov lus tshaj xo hauv lub xov tooj cua ZOO TSWV ZOV YAJ.’
Txiv Plig Nyiaj Pov hais ntxiv tias ‘Kuv nkim nyiaj nkim sij hawm, txawm tias nyob hauv Hmoob 100 leej, yog muaj 1 leeg mloog xwb, ces kuv zoo siab lawm.’
Kwv tij Hmoob sawv daws, lub Moo Zoo hnub no yog zoo li ntawd. Peb yuav zoo siab yog tias peb nrhiav tau yam peb nyiam rov los. Yuav muaj kev zoo siab loj nyob saum ntuj yog tias ib tug neeg txhaum hloov siab tshiab ntxub kev txhaum. Huab Tais Tswv Ntuj yuav zoo siab yog tias hnub no peb txais cov neeg txhaum rov los ua peb kwv peb tij.
