ZAJ NYEEM HNUB TIM 5 LUB 2 HLIS 2024
HNUB NCO TXOG LEEJ NTSHIAB AS NKAS TAS
COV LUS NYOB HAUV MAS KOS NTAWV MOO ZOO (MK 6: 53-56)
Kwv tij Hmoob sawv daws, lub Moo Zoo hnub no piav rau peb paub tias muaj neeg coob tau kov Huab Tais Yes Xus ces lawv zoo ntawm tus mob. Lub Moo Zoo tsuas sau luv luv li no xwb, tab sis yog nej niaj hnub mloog Yes Xus lub Moo Zoo peb coj tuaj piav rau nej mloog mas nej yuav paub tias tus neeg mob zoo tau yog vim nws muaj lub siab ntseeg txog Huab Tais Yes Xus, ces nws thiaj dim ntawm tus mob. Vim li no peb thiaj mem tau tias cov neeg tau kov Huab Tais Yes Xus tas ces lawv zoo mas txhais tau tias lawv muaj lub siab ntseeg tiag, tsis tas li ntawd lawv cov swm neeg coj tus mob tuaj mas lawv kuj muaj lub siab ntseeg tias Huab Tais Yes Xus muaj hwj huam cawm tau lawv tus neeg mob, mas thaum lawv cim tau Huab Tais Yes Xus, lawv thiaj maj zeeg mus coj lawv tus neeg mob tuaj cuag Huab Tais Yes Xus. Lub Moo Zoo hais tias “Cov neeg uas cim tau Yes Xus, khiav thoob ib cheeb tsam ntawd, lawv mus kwv cov neeg muaj txiab nkeeg tuaj rau Yes Xus. Lawv thov Yes Xus kom nws cia lawv kov nws, tab yog kov lub tw tsho xwb kuj tau.”
Cov kwv tij, peb muab tig los xav mas peb puas muaj ib lub siab ntseeg npaum li cov neeg hauv lub Moo Zoo hnub no? Peb puas kub siab nrhiav Huab Tais Yes Xus cuag li lawv sawv daws?
Yog peb xav kom Huab Tais Yes Xus cawm tau peb, mas peb yuav tsum ua cuag nkaus lawv. Dhau ntawd, peb kuj yuav tau muab lub txiaj ntsim Huab Tais Yes Xus tau pub los cawm peb no rau lwm tus thiab. Qhov zoo tshaj mas yog pub txoj kev hlub rau cov neeg txom nyem, nyiam tus ua tsis zoo rau peb.
Nyob zoo sawv daws.
