Zaj Nyeem Hnub Tim 5 Lub 7 Hli 2026 (Hnub Hwm Leej Ntshiab Pob Zeb Thiab Leej Ntshiab Paj Lug)

ZAJ NYEEM HNUB TIM 5 LUB 7 HLI 2026

HNUB HWM LEEJ NTSHIAB POB ZEB THIAB LEEJ NTSHIAB PAJ LUG

COV LUS NYOB HAUV MAS TAIS NTAWV MOO ZOO (MT 16: 13-19)

Cov kwv tij Hmoob, hnub no peb hwm Leej Ntshiab Pob Zeb thiab Leej Ntshiab Paj Lug. Ob tug thwj tim no yog tus pab txhawb nqa Lub Koom Txoos kom loj hlob tuaj. Nkawd yog ob tug thwj tim tseem ceeb tshaj rau cov pawg ntseeg nyob thaum hauv paus. Nkawd ob leej tseem ceeb tshaj kuj vim tias nkawd txoj kev ntseeg ntawm Huab Tais Yes Xus. Nkawd ntseeg tias Yes Xus yog Tswv Ntuj. Qhov no tseem ceeb tshaj plaws nawb.

Hauv lub Moo Zoo peb hnov hnub no, Huab Tais Yes Xus nug nws cov thwj tim tias “nej ne, nej hais tias kuv yog leej twg?” Ces Pob Zeb teb tias “Koj yog Leej Pleev, yog tus Tswv Ntuj Muaj Txoj Sia Leej Tub.” Lo lus teb uas Pob Zeb hais rau Yes Xus yog lo lus tseem ceeb ntawm nws lub neej vim tias lo lus teb no yog nws txoj kev ntseeg txog Yes Xus. Tas nws lub neej yav tom ntej, nws yuav muab rau Huab Tais Yes Xus, nws yuav muab los tsob hwb Tswv Ntuj.

Ntawm Paj Lug kuj zoo ib yam. Nws rov los yuav lub siab tshiab yuav lub neej tshiab los tsob hwb Tswv Ntuj, nws tshaj lub Moo Zoo, nws coj lub Moo Zoo mus rau lwm haiv neeg. 

Ob leej thwj tim no yog piv txwv zoo rau peb pom thiab ua raws li nkawd. Ntawm peb cov neeg ntseeg, peb yuav tsum ua hauj lwm tshaj Ntuj Lus no ntxiv mus. Ob tug leej ntshiab no, nkawd tsis tshaj Ntuj lus ntawm qhov ncauj xwb, tab sis nkawd ua lub neej kom muaj qab hau muaj kev ncaj ncees, muaj kev nyiam kev hlub, ua neej zoo ua piv txiv rau luag pom, lawv thiaj ntseeg tias Tswv Ntuj Lo Lus muaj qab hau, muaj txiaj ntsim, muaj hwj chim hloov tau peb lub neej tiag tiag.

Cov kwv tij, thov kom leej ntshiab Pob Zeb thiab Paj Lug tus piv txwv pab peb ua raws tau thiab pab kom peb muaj zog ua qhov zoo hauv ntiaj teb no. Amen. 

Nyob zoo sawv daws.