ZAJ NYEEM HNUB TIM 31 LUB 10 HLI 2025
HNUB RAU, LIS PIAM 30 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 14: 1-6)
Kwv tij sawv daws, nyob rau hauv zaj no peb pom tias, cov Fas Lis Xais thiab cov Kws Lij Choj lawv coj txoj cai nruj dhau, ua rau lawv tsis muaj lub siab hlub neeg thiab tsis txawj khuv leej neeg, lawv tsis muaj lub siab muag uas yuav txawj sib hlub sib pab, lawv tsis nkag siab luag lwm tus, lawv tsuas pom txoj cai xwb, leej twg ua raws txoj cai cev lawv tias zoo, hos tus ua tsis raws txoj cai cev law txiav tias yog neeg txhaum, vim lawv muab txoj cai saib hlob dua lub siab uas txawj sib hlub sib zam. Ntawv Ntshiab piav tias, lawv ntsia saib Huab Tais Yes Xus yuav ua dab tsi txhaum txoj cai, tiam sis, Huab Tais qhia ntau zaus rau lawv thiab ua rau lawv ntsia, kom lawv pom txog Tswv Ntuj txoj kev khuv leej neeg, kom neeg muaj lub siab hlub luag lwm tus. Thuam Huab Tais pom tej tug neeg mob tuaj cuag nws Huab Tais hlub lawv, ces nws cev tes kho lawv tam sim ntawd, tab yog nyob rau hauv hnub ntawd yog hnub Xas Npas Tos, yog hnub uas cov Yus Das Caiv, tsis kav Huab Tais kho huv tib si. Huab Tais muab ib lo lus nug, cov Fas Lis Xais thiab cov Kws Lij Choj tias, yog nej leej twg muaj ib tug tub los ib tug nyuj poob rau hauv ib lub qhov nyob rau hnub Xas Npas Tos ntawd, nej puas yuav cev tes pab tam sim ntawd ? Ces lawv teb tsis tau Huab Tais lo lus nug. vim qhov tob nyob rau hauv neeg lub siab, leej twg los yeej ntshaw txoj kev hlub, leej twg los yeej ntshaw txoj sia ib yam nkaus. Li ntawd, yog peb ntshaw txoj kev hlub mas peb los cuag Huab Tais Yes Xus, ces nws yuav pub rau peb, vim nws yog tus Tswv hauv txoj kev hlub.
Nyob zoo sawv daws.
