Zaj nyeem hnub tim 30 lub 4 hlis 2026
Hnub nco txog Leej Ntshiab Vaj Qhia Pis Yus Tsib
Cov lus nyob hauv Zam Ntawv Moo Zoo (Z 13: 16-20)
Kwv tij sawv daws, lub Moo Zoo hnub no Huab Tais Yes Xus qhia tias : “Tus qhev yuav tsis loj dua nws tus Tswv, nqe lus no yog Huab Tais Yes Xus qhia kom peb tsoom ntseeg sawv daws tsis txhob ua neeg muab hlob, peb yuav coj lub neej tsob hwb luag lwm tus, tab txawm peb muaj meej mom npaum twg, peb tau ua tus coj, los yog ua tus loj npaum twg nyob hauv ntiaj teb no, tsis kav, peb nco ntsoov tias, peb yuav tsum tsob hwb luag tej. Nyob rau hauv peb lub Koom Txoos kev ntseeg ib txwm qhia los, peb yuav tsum coj raws Huab Tais Yes Xus lo lus qhia no, tsis hais txij li Vaj Qhia los mus rau cov Txiv Plig, cov phauj, los mus txog rau ib tug neeg ntseeg Ntuj, peb yuav tsum ua neeg me los tsob hwb luag tej, peb tsis txhob ua neeg muab hlob, tsis txhob ntshaw yam uas nyob ntiaj teb no, peb yuav ntshaw yam uas nyob saum Ntuj. Vim peb yog Tswv Ntuj tsoom tub txib, peb yuav tsum ua Tswv Ntuj txoj hauj lwm, peb yuav txaus siab rau cov txiaj ntsim uas Tswv Ntuj pub rau peb xwb, peb tsis txhob mus ntshaw txog kev tau zoo noj tau zoo nyob, kev nplua nuj, kev ua nom ua tswv, vim tej ntawd tsis yog lub hom phiaj nyob rau hauv peb lub neej tiag tiag, lub neej uas Huab Tais Yes Xus qhia peb, yog qhov peb yuav tsum nrhiav Tswv Ntuj lub Ceeb Tsheej thiaj yog txoj kev kaj siab uas yuav nyob nrog peb mus ib txhis tiag tiag. Hos tej khoom nyob ntiaj teb no, uas neeg ntiaj teb ntshaw kom muaj, ces tsuas zoo li npau suav xwb, ib ntsaim muag twb ploj tag lawm. Tsis muaj qab hau rau peb.
Nyob zoo.
