ZAJ NYEEM HNUB TIM 30 LUB 12 HLIS: HNUB TSIB TOM QAB YES XUS YUG
COV LUS NYOB HAUV ZAM TSAB NTAWV, TSAB IB (1 Z: 2: 12-17)
LUB MOO ZOO RAWS LI LUS KAS (LK 2: 36-40)
Kwv tij Hmoob sawv daws, hmo 24 thaum ib tag hmo thiab hnub 25 thaum sawv ntxov thiab yav pom kev mas lub Koom Txoos ua lub txoos hwm Yes Xus yug. Tom qab hnub tim 25 mas lub Koom Txoos tshwj 8 hnub sib law cia ua hwm Yes Xus yug los; yam li yog hnub tim 26 lub 12 hlis txog hnub tim 2 lub 1 hlis. Nyob hauv 8 hnub ntawd, peb hnov hais txog Tes Fas Nos thawj thwj tim tuag ua tim khawv txog txoj kev ntseeg, hais txog tus Hauv Paus Xa Lus Zam raug tsim txom vim Yes Xus lub npe, hais txog cov me nyuam raug tua tuag thaum lub caij Yes Xus yug, hais txog Yes Xus tsev neeg ntshiab uas muaj Mab Liab, Yos Xes thiab tus me nyuam Yes Xus, hais txog cov xwm thaum Yes Xus yug.
Kwv tij, nyob hauv hnub no yog hnub tsib tom qab Yes Xus yug, peb mloog tus Hauv Paus Xa Lus Zam tsab ntawv sau ntuas cov neeg ntseeg tias tus ntseeg txog Yes Xus lub npe mas nws cov txhaum daws tas lawm, lawv yuav hloov ua tus neeg tshiab tsis mus taug lub qab ntuj txoj kev ntxiv; yam li lub cev nqaij txoj kev ntshaw, qhov muag txoj kev ntshaw, txoj kev khav theeb vim nplua nuj. Tab sis tus ntseeg txog Yes Xus lub npe, nws yuav ua yam xis Tswv Ntuj siab.
Lub cev nqaij txog kev ntshaw thiab lub qhov muag txoj kev ntshaw; yam li pom luag tej muaj vaj tse zoo ces yus ntshaw muaj xws li luag, ces yus cia li saib kev nrhiav nyiaj loj dua Tswv Ntuj, los yus mus ua hauj lwm txhaum kev cai hauj lwm qab rooj kom tau nyiaj sai, los yus cia li ua neeg cuaj khaum qia dub tsis hlub cov neeg txom nyem; yam li yus pom luag tej zoo nkauj zoo nraug, ces yus cia li xav qhov phem qhov qias tuaj rau nruab siab, los yog cia li mus nrog luag sib deev; thiab tseem muaj ntau yam ntxiv.
Tus neeg ntseeg txog Yes Xus, nws yuav muab Tswv Ntuj Lo Lus los yug nws ces nws xaiv ua qhov zoo xis Tswv Ntuj siab; yam li nws nplua nuj dua lwm tus ces nws qee nyiaj mus pab tus txom nyem, nws muaj zog dua lwm tus ces nws tawm lub zog mus pab tus lub zog muag, nws txawj ntse thiab muaj laj lim dua lwm tus ces nws pab lub tswv yim rau tus tsis paub.
Nyob hauv Lus Kas phau Ntawv Moo Zoo peb nyeem hauv hnub no, piav txog tus pog laus As Nas nyob rawv hauv lub Tuam Tsev Teev Ntuj kom tau teev Ntuj. Lus Kas piav tias yuav txiv tau 7 xyoo ces tus txiv tuag, nws qee lub neej poj ntsuam los teev Ntuj txog hnub nws muaj 84 xyoos. Muab xam los mas hais tau tias nws tuaj teev Ntuj hauv lub Tuam Tsev Teev Ntuj ze li ntawm 60 tawm xyoo. Ntev kawm! Hnub no nws tau pom tus me nyuam Yes Xus lawm.
Kwv tij, Lus Kas sau tias ‘As Nas yog Fas Nus Ees tus ntxhais, xeem As Ntxes’. Lo lus no txhais tias ‘Tswv Ntuj hlub tus nyob ntawm Tswv Ntuj xub ntiag, nws muaj kev zoo siab.’
Yog li As Nas thiaj yog lub cim qhia peb tias tus twg ua hauj lwm xis Tswv Ntuj siab mus li mas tus ntawd tau txais kev zoo siab vim tias nws yuav tau pom Huab Tais Tswv Ntuj.
Tswv Ntuj Lo Lus hauv hnub no lub ntsiab thiaj yog qhov no: kom peb ua tiag nrauj lub qab ntuj txoj kev, tig los yuav Tswv Ntuj Lo Lus ua lub teeb coj kev rau peb taug, mas peb thiaj yuav ua lub neej mus raws li Huab Tais Tswv Ntuj nyiam, peb thiaj yuav txais tau Tswv Ntuj kev thoob tsib thiab Tswv Ntuj lub txiaj ntsim, qhov kawg peb thiaj yuav tau pom Huab Tais Tswv Ntuj xws li hnub no tus pog laus tau pom tus me nyuam Yes Xus.
