ZAJ NYEEM HNUB TIM 3 LUB 12 HLIS: HNUB NCO TXOG LEEJ NTSHIAB XAS VIS YES
COV LUS PAJ LUG SAU MUS RAU COV NTSEEG NYOB KOS LIS NTHOS, TSAB IB (1 KLN 9: 16-19, 22-23)
LUB MOO ZOO RAWS LI MAS KOS (MT 16: 15-20)
Kwv tij Hmoob sawv daws, hnub no lub Koom Txoos nco txog Leej Ntshiab Xas Vis Yes tus tub tshaj Ntuj Lus rau As Xias Naj thiab As Xias Toob Fab. Xas Vis Yes ua Leej Choj nyob hauv lub koom haum Yes Xus cov tub tshaj Ntuj Lus los yog ‘Yes Xus Is’.
Tswv Ntuj lo lus hauv hnub no peb hnov hais txog cov tub tshaj Ntuj Lus txoj hauj lwm tshaj lub Moo Xoo. Peb hnov tus Hauv Paus Xa Lus hais rau cov ntseeg nyob Kos Lis Nthos tias “Kuv tshaj lub Moo Zoo tsis yog vim kuv xav nto koob meej. Kuv tshaj lub Moo Zoo vim yog txoj hauj lwm Tswv Ntuj muab rau kuv ua.” Nyob hauv Ntawv Moo Zoo, peb kuj hnov Huab Tais Yes Xus txhib cov thwj tim tias “Nej mus thoob qab ntuj, nej tshaj lub Moo Zoo rau txhua leej txhua tus”, ces cov thwj tim tawm mus tshaj lub Moo Zoo rau txhua qhov txhia chaw.
Kwv tij Hmoob, Huab Tais Yes Xus muab txoj hauj lwm rau cov thwj tim tawm mus tshaj lub Moo Zoo vim Huab Tais Yes Xus pom tias cov thwj tim hlob tiav nyob hauv txoj kev ntseeg txog nws lawm, txog lub caij cov thwj tim yuav coj Tswv Ntuj lub Ceeb Tsheej mus pub rau lwm tus lawm, txog lub caij cov thwj tim yuav tsim Yes Xus lub Koom Txoos nyob hauv qab ntuj lawm. Ib yam li txog lub caij cog nplej ces tus tseb nplej yuav tawm mus tseb cov noob nplej hauv nws daim teb lawm.
Kwv tij, txoj hauj lwm tshaj lub Moo Zoo thiaj yog lub Koom Txoos txoj kab xwm loj thiab tseem ceeb. Lub Koom Txoos tsis yog tus Vaj Qhia, cov Tswv Qhia, cov Leej Choj lawv xwb. Lub Koom Txoos yog tas nrho cov neeg ntseeg txog Yes Xus nyob hauv lub qab ntuj. Yog li mas txoj kab xwm tshaj lub Moo Zoo thiaj tsis yog ib tus neeg twg txoj, yog cov neeg ntseeg uas txoj kev ntseeg hlob tiav lawm lawv sawv daws txoj; yog kuv txoj, thiab yog koj txoj. Peb sawv daws muaj tib txog hauj lwm ua; yog tshaj lub Moo Zoo.
Tos hais tias yog cov neeg lawv txoj kev ntseeg hlob tiav, vim tias tus neeg txoj kev ntseg hlob tiav mas nws puab lawm tias tsis yog nws tau lub npe tias ntseeg txog Yes Xus xwb, nws tseem paub tias Tswv Ntuj pub lub neej rau nws kom tau ua tim khawv zeeb tseeb txog lub Moo Zoo; yam li nws yeem xaiv txoj kev ua sawv daws qhev, ua sawv daws tus tub txib, tsob hwb sawv daws nyob hauv txoj kev sib nyiam sib hlub.
Kwv tij Hmoob, nyob hauv lub caij Tos Huab Tais no peb txhob ua li yav tas los; yam li nquag hais zaj Peb Txiv Nyob Saum Ntuj, nquag hais zaj Koj Nyob Kaj Lug Mab Liab, nquag hais Huab Tais 10 Lo Lus Qhia, los paub tas cov zaj teev Ntuj lub Koom Txoos qhia, nco tau tas txhua lo lus Huab Tais Yes Xus hais nyob hauv Ntawv Moo Zoo, tab sis tsis ua raws.
Thov kom lub caij Tos Huab Tais no, peb sawv daws muab tas peb lub neej los ua lub Moo Zoo rau lwm tus pom; yam li peb sis nyiam sis hlub, peb tsim kev sib haum xeeb, peb sib pab sib nres, peb hwm Tswv Ntuj thiab ntseeg txog Tswv Ntuj yam ruaj nreb.
