ZAJ NYEEM HNUB TIM 3 LUB 1 HLIS: NCO TXOF YES XUS LUB NPE NTSHIAB
COV LUS NYOB HAUV ZAM TSAB NTAWV, TSAB IB (1 Z 2: 29 – 3: 6)
LUB MOO ZOO RAWS LI ZAM (Z 1: 29-34)
Kwv tij Hmoob sawv daws, tus Hauv Paus Xa Lus Zam qhia peb tias Huab Tais Yes Xus yog tus siab ncaj, yog tus huv, thiab yog tus tsis muaj txhaum; yog peb coj txoj kev ncaj, peb ua tus neeg siab huv, thiab peb tsis ua txhaum mas txhais tau tias peb nyob hauv Huab Tais Yes Xus lawm.
Tiam sis peb yog neeg mas peb lub zog me dhau ces peb thiaj tsis yeej dab phem kev ntxias mus poob hauv kev ua txhaum. Yeej tsis muaj ib tug neeg twg yuav mus cuag Tswv Ntuj tau, yog tias nws vam txog nws xwb, nws tsis thov kev pab ntawm Tswv Ntuj. Yog vim li ntawd, Huab Tais Tswv Ntuj thiaj xa Leej Tub tuaj ua tus Yaj Txi Ntuj kom xwv tus vam txog Leej Tub mas Leej Tub txoj kev txi Ntuj pab tau kom nws mus nyob hauv Leej Tub, ces nws thiaj yuav nyob hauv Leej Tub, Leej Tub npo nws mus cuag Tswv Ntuj tau.
Nyob hauv Hmoob txoj kev ntseeg mas thaum ib tug neeg twg mob tsis txawj zoo, mas Hmoob yuav saib yaig; yog pom tias dab coj tus plig mus lawm, mas Hmoob yuav ua neeb. Hmoob muab tus npua txoj sia mus pauv tus neeg mob tus plig. Cov His Xas Lais tus yaj tua txi ntuj mas mus zoo li ntawd, lawv muab tua los theej lawv cov txim txhaum, cia tus yaj ris lawv lub txhaum. Tus yaj lawv yuav siv txi ntuj mas yog ib tug me nyuam yaj tsis txog ib xyoos, piv li yog tus yaj tsis tau qias neeg. Cov His Xas Lais ntseeg li ntawd.
Thaum tus ntxuav plig Zam pom Huab Tais Yes Xus mas Leej Ntuj Plig tshoj kom nws paub tias Huab Tais Yes Xus yog tus yuav raug tua los them lub qab ntuj neeg cov txhaum, ces Zam thiaj hais tias Huab Tais Yes Xus yog tus Yaj Txi Ntuj.
Zam tsis yog tuaj ua tim khawv txog Huab Tais Yes Xus tias yog tus Yaj Txi Ntuj xwb, Zam tseem ua tus qauv rau sawv daws yoog raws thiab; yam li Zam ua tus neeg me thiab Zam mloog Leej Ntuj Plig Ntshiab qhia Zam.
Yog peb ua tus neeg me mas peb thiaj pom Huab Tais Yes Xus, yog peb mloog Leej Ntuj Plig Ntshiab mas peb thiaj paub Huab Tais Yes Xus. Thaum peb pom thiab paub Huab Tais Yes Xus lawm, peb thiaj ntseeg txog Huab Tais Yes Xus, ces peb tso siab rau Huab Tais Yes Xus ua tus coj peb, tso siab rau Huab Tais Yes Xus ua tus theej peb cov txim txhaum npo peb ntawm txoj kev tuag.
Hnub no peb nco txog Yes Xus lub npe ntshiab, mas kom peb nco tias Huab Tais Yes Xus yog Tswv Ntuj Leej Tub yeem ua tus Yaj ris peb cov txhaum, kom tau coj peb rov mus cuag Huab Tais Leej Txiv. Peb yuav vam Huab Tais Leej Tub lub npe ‘Yes Xus’ kom peb xyaum ua lub neej mus raws txoj kev ncaj, kom peb paub tso siab rau Tswv Ntuj, kom peb nyob ruaj hauv Huab Tais lo lus qhia mus li.
Nyob zoo sawv daws.
