ZAJ NYEEM HNUB TIM 27 LUB 8 HLI 2024
HNUB NCO TXOG LEEJ NTSHIAB VIS SES NTHES DAWS POS
COV LUS NYOB HAUV LUS KAS NTAWV MOO ZOO (LK 9: 18-22)
Kwv tij Hmoob sawv daws, Huab Tais Yes Xus tshaj lub Moo Zoo 3 xyoos sib law rau tsoom Yus Das, tab sis sawv daws tsis ntseeg tias Huab Tais Yes Xus yog Leej Pleev. Lawv tsuas xav tias Huab Tais Yes Xus yog ib tug Yaj Saub txheej thaud rov sawv los tshaj txog Tswv Ntuj lub Ceeb Tsheej xwb. Nyob hauv cov Hauv Pais Xa Lus los nyaj lawv yuav xav li tsoom sid, vim tias tus Pleev raws li lawv lub tswv yim tsis yog ib tug neeg me, tsis yog ib tug pej xeem huab hwm xws li lawv; tab sis tus Pleev lawv tos mas yuav yog ib tug neeg muaj hwj chim loj caum tau cov Los Mas kom tawm hauv lub teb chaws mus.
Tsuas muaj Xis Moos Pob Zeb xwb thiaj lees tias Huab Tais Yes Xus yog Tswv Ntuj Leej Pleev.
Yog peb saib hauv Mas Tais Ntawv Moo Zoo, mas peb yuav paub ntxiv tias Huab Tais Yes Xus hais rau Pob Zeb tias “Xis Moos, koj txoj hmoov zoo vim qhov koj paub no tsis yog nqaij thiab ntshav qhia koj. Yog kuv Txiv nyob saum ntuj qhia koj.”
Kwv tij Hmoob, yam tob zais ntshis hauv txoj kev ntseeg mas yog ib yam to taub tsis yooj yim, tsum yog Tswv Ntuj tshoj xwb mas thiaj yuav to taub tau. Yog li mas niaj hnub no peb thiaj pom tias txoj kev tshaj lub Moo Zoo nrov mus txog txhua qhov chaw tab sis cov neeg hloov siab tshiab los ntseeg mas tsis yog txhua leej. Yog tus xav ntseeg thiab nws thov Tswv Ntuj xwb mas nws thiaj ntseeg tau.
Li ntawd mas kwv tij Hmoob, thaum peb hnov hais txog Huab Tais Yes Xus lub Moo Zoo, thaum peb yug los nyob hauv tsev neeg ntseeg lawm; qhov no tsis tau txaus, peb tseem niaj hnub thov Huab Tais Tswv Ntuj pub Leej Ntuj Plig nqes los nyob saum peb, kom Leej Ntuj Plig kaj peb lub tswv yim, hlawv peb lub siab kom kub lug txog txoj kev ntseeg, mas thaum Huab Tais Yes Xus nug peb tias “Koj ne! koj hais tias kuv yog leej twg?” ces peb thiaj yuav teb tau raws li Leej Ntshiab Pob Zeb lo lus tias “Koj yog Tswv Ntuj Leej Pleev.” Nyob zoo sawv daws.
