ZAJ NYEEM HNUB TIM 26 LUB 12 HLIS: HNUB UA HMOOV LEEJ NTSHIAB TES FAS NOS
COV HAUV PAUS XA LUS TEJ HAUJ LWM (HL 6: 8-10, 7: 54-60)
LUB MOO ZOO RAWS LI MAS TAIS (MT 10: 17-22)
Cov kwv tij Hmoob, nag hmo peb muaj kev zoo siab loj vim peb ua hmoov hwm Yes Xus yug los, tab sis ua cas hnub no lub Koom Txoos tseev kom peb nco txog Leej Ntshiab Tes Fas Nos txoj kev tuag, ces thiaj yuav ua hmoov txog Tes Fas Nos.
Kwv tij, tsis yog peb yuav nco txog Tes Fas Nos txoj kev tuag xwb, peb tseem yuav ua hmoov txog Leej Ntshiab Zam tus sau Ntawv Moo Zoo rau hnub tag kis, thiab neeg kis peb tseem ua hmoov cov me nyuam siab ntshiab tuag ua tim khawv thiab.
Tos lub Koom Txoos cia ua hmoov 3 hnub sib law tom qab hwm Yes Xus yug vim tias lub Koom Txoos muab lawv los tam Huab Tais Yes Xus 3 tug tseem phooj ywg; yam li tus tseem phooj ywg yeem ua tim khawv txog Huab Tais Yes Xus, tus tseem phooj ywg yeem raug txom nyem vim Huab Tais Yes Xus lub npe, tus tseem phooj ywg tsis paub Huab Tais Yes Xus tab sis nws tuag kom luag tej cav txog Huab Tais Yes Xus.
Hnub no, yog ua hmoov txog thawj tus phooj ywg; yog tus neeg yeem tuag ua tim khawv txog Huab Tais Yes Xus. Lub Koom Txoos muab Tes Fas Nos los ua piv txwv vim nws yog thawj tus ntseeg txog Yes Xus tau tuag ua tim khawv txog nws txoj kev ntseeg raws li cov lus Leej Ntshiab Lus Kas sau piav nyob hauv phau ntawv cov Hauv Paus Xa Lus cov hauj lwm li nej tau hnov hauv zaj nyeem hnub no. Tes Fas Nos cov lus ua tim khawv muaj lub ntsiab tias vim Huab Tais Tswv Ntuj hlub peb, nws thiaj xa Leej Tub Yes Xus tuaj tuag txhiv peb thiab sawv rov los kom peb tau txais txoj sia tshiab.
Tes Fas Nos kuj ntuas lawv kom txhob ua xwb qwb txhav, ces cov Yus Das npau taw lawv thiaj muab Tes Fas Nos tua.
Lawv yuav tua Tes Fas Nos, tsis kav nws tsis chim rau lawv, Tes Fas Nos tseem thov Ntuj rau lawv tias “Huab Tais, koj txhob muab qhov txhaum ntawd rau lawv ris.”
Kwv tij, Huab Tais Yes Xus yeej hais tseg tias tus twg ua Huab Tais Yes Xus tseem phooj ywg mas nws yuav ntsib kev txom nyem loj; yam li raug ntes, raug hiam, rau kom plaub ntug. Txawm li ntawd, sawv daws yuav ua siab tawv nyiaj ris kev txom nyem, thiab txhob ntxhov siab; lawv yuav muaj Leej Ntuj Plig nrog nraim lawv mus li.
Lawv yuav ua tiag nyiaj mus kom txog qhov kawg; yam li txog thaum lawv txoj sia tu, mas lawv thiaj yuav txais kev cawm.
Kwv tij Hmoob, yog vim li hais los no mas lub Koom Txoos thiaj muab hnub tom qab ua lub ntees hwm Yes Xus yug tshwj cia nco txog Tes Fas Nos txoj kev tuag.
Tag kis peb mam los mloog hais txog tus tseem phooj ywg tim ob; yam li tus phooj ywg yeem raug txom nyem vim Yes Xus lub npe.
