ZAJ NYEEM HNUB TIM 22 LUB 7 HLI 2025
HNUB UA HMOOV LEEJ NTSHIAB MAB LIAB MAS NTAS LAS
COV LUS NYOB HAUV ZAM NTAWV MOO ZOO (Z 20: 1, 11-18)
Kwv tij Hmoob sawv daws, ua ntej no lub Koom Txoos saib Mab Liab Mas Ntas Las thiab Las Ntxas Los tus muam Mab Liab yog tib tug. Tab sis txog xyoo 2021 Vaj Qhia Fas Ntshis Kus tshaj tej lo lus tias Mab Liab Mas Ntas Las thiab Las Ntxas Los tus muam Mab Liab, nkawd nyias muaj nyias.
Lub Koom Txoos pom tias Mab Liab Mas Ntas Las tsis yog ib tug poj niam muaj lub siab ntseeg xws li lwm tus poj niam nyob hauv Ntawv Moo Zoo xwb, Mab Liab Mas Ntas Las tseem yog tus xa Huab Tais Yes Xus lo lus mus rau cov Hauv Paus Xa Lus raws li cov lus peb tau hnub hauv hnub no. Huab Tais Yes Xus hais rau Mab Liab Mas Ntas Las tias “Koj mus cuag kuv cov kwv tij, koj hais rau lawv tias ‘kuv nce mus cuag kuv txiv thiab nej txiv, mus cuag kuv tus Tswv Ntuj thiab nej tus Tswv Ntuj’.”
Yog vim li no lub Koom Txoos saib Mab Liab Mas Ntas Las yog tus Hauv Paus Xa Lus rau cov Hauv Paus Xa Lus. Li ntawd, lub Koom Txoos thiaj tsis yog yuav nco txog xwb, tab sis lub Koom Txoos yuav ua hmoov Mab Liab Mas Ntas Las xws li ua hmoov cov Hauv Paus Xa Lus.
Lub Koom Txoos saib Mab Liab Mas Ntas Las yog ib tug neeg tseem ceeb thiab muaj txoj hmoov zoo. Lub Koom Txoos tsis hais tias poj niam tsis muaj tsim npaum txiv neej, lub Koom Txoos saib sawv daws muaj tsim thiab tseem ceeb tib yam.
Kwv tij Hmoob, muaj ib zaug Huab Tais Yes Xus qhia cov thwj tim tias “Koj txhab cuab tam nyob qhov twg, koj lub siab kuj yuav nyob qhov ntawd” (MT 6: 21), ces hnub no peb pom tias Mab Liab Mas Ntas Las muab tas nws lub siab nrhiav Huab Tais Yes Xus, nws mus tom Huab Tais Yes Xus lub ntxa thaum lub ntuj tsis tau kaj. Thaum ntawd, Mab Liab Mas Ntas Las lub siab kuj tsis kaj, nws tsis muaj kev cia siab; tab sis nws tso siab thiab nyiam Huab Tais Yes Xus heev, mas nws thiaj ua siab loj mus tom Huab Tais Yes Xus lub ntxa.
Thaum Huab Tais Yes Xus tawm tuaj rau Mab Liab Mas Ntas Las pom, nws tseem ntxhov siab ces nws zeem tsis tau Huab Tais Yes Xus. Huab Tais Yes Xus hu nws lub npe mas nws thiaj mam feeb, ces Mab Liab Mas Ntas Las zeem tau Huab Tais Yes Xus.
Huab Tais Yes Xus hais kom Mab Liab Mas Ntas Las mus qhia lub moo zoo no rau cov thwj tim, Mab Liab hais rau lawv tias “Kuv pom Huab Tais lawm.” Mab Liab Mas Ntas Las lo lus no yog nws ua pov thawj tias Huab Tais Yes Xus yog Huab Tais Tswv Ntuj tiag.
Kwv tij Hmoob sawv daws, nyob hauv peb lub neej ua neeg ntseeg, mas peb yuav ua xws li Mab Liab Mas Ntas Las; peb yuav tso siab rau Huab Tais Yes Xus mus li thiab peb ntseeg tias Huab Tais Yes Xus yog peb tus Huab Tais Tswv Ntuj tiag. Thaum peb mus teev Ntuj, los yog nyeem Ntawv Ntshiab; peb ua siab fab, peb ntxhov siab txog ntau yam, peb tsis tsa peb lub siab nyob ze Tswv Ntuj, mas peb yuav tsis to taub tias Huab Tais Tswv Ntuj tab tom hais dab tsi rau peb. Txhua hnub peb yuav muab peb kev ntxhov siab tso pov tseg, ces peb muab siab npuab Huab Tais Tswv Ntuj, mloog saib Huab Tais Tswv Ntuj xav hais dab tsi rau peb.
Peb kuj yuav hais qhia rau sawv daws kom paub txog Huab Tais Yes Xus, ua tim khawv rau cov nyob ib ncig peb tias Huab Tais Yes Xus tuag saum ntoo cuam, nws sawv rov los, nws mus saum ntuj, nws yog Huab Tais, yog Tswv Ntuj.
