ZAJ NYEEM HNUB TIM 21 LUB 7 HLI 2025
HNUB NCO TXOG LEEJ NTSHIAB LOS LEES NTXOS NYOB NPIS DIS XIS
COV LUS NYOB HAUV MAS TAIS NTAWV MOO ZOO (MT 12: 38-42)
Cov kwv tij, tej zaum nej twb xav tias ua cas Tswv Ntuj tsis ua kiag hwj huam rau ntiaj teb neeg pom, mas sawv daws thiaj yuav zoo siab tig los ntseeg Ntuj kom tas; ua cas Huab Tais Yes Xus tsis tawm los rau sawv daws pom, mas sawv daws thiaj yuav tso siab rau Huab Tais Yes Xus tag siab.
Kwv tij Hmoob, Tswv Ntuj tsis ua li ntawd, Huab Tais Yes Xus kuj yuav tsis ua li thiab. Vim tias Huab Tais Yes Xus tsis yog tus zoo li peb lub tswv yim xav, tiam sis Huab Tais Yes Xus yog tus Tswv Ntuj tsob hwb ntiaj teb neeg. Huab Tais Yes Xus xav kom peb nyiam nws vim nws nyiam peb, tsis yog kom peb nyiam nws vim nws yuam peb.
Lub Moo Zoo hnub no yog piav txog thaum cov Fas Lis Xais thiab cov Kws Ntawv Ntshiab hais kom Huab Tais Yes Xus ua ib lub cim rau lawv pom, ces Huab Tais Yes Xus teb rau lawv tias “Nej yuav tsis pom ib lub cim dab tsi, lub cim nej pom kawg yog Yos Nas lub cim xwb.”
Yos Nas lub cim yog zoo li cas?
Thaum Tswv Ntuj txib Yos Nas mus tshaj Tswv Ntuj lo lus rau cov neeg ua txhaum hauv lub tsheej Nis Nis Vas, mas Yos Nas tsis kam mus, nws khiav deb ntawm Tswv Ntuj, ces Tswv Ntuj thiaj cia tus vaj ntses tuaj nqos Yos Nas mus nyob hauv plab tau 3 hnub, mam rov tso Yos Nas tawm. Yos Nas thiaj ua ib siab mus tshaj Tswv Ntuj lo lus rau cov neeg hauv lub tsheej Nis Nis Vas.
Huab Tais Yes Xus hais tias lub cim lawv yuav pom yog Yos Nas lub cim, kuj yog Huab Tais Yes Xus qhia lawv tias qhov lawv yuav pom mas yog nws yuav tuag mus zwm av 3 hnub, ces nws yuav sawv rov los ib yam li Yos Nas nyob hauv tus vaj ntses plab mus txog hnub peb, ces tus vaj ntses mam ntuav Yos Nas tawm los.
Yos Nas mus tshaj Tswv Ntuj lo lus rau cov neeg nyob Nis Nis Vas, mas lawv tu siab thiab tig los yuav siab tshiab, ces lawv tsis raug Tswv Ntuj nplua. Huab Tais Yes Xus sawv rov los, nws coj txoj kev cawm tuaj rau lub qab ntuj neeg; tus twg ntseeg txog Huab Tais Yes Xus, tus ntawd yuav txais kev cawm.
Kwv tij, peb ntseeg txog Huab Tais Yes Xus, mas peb tau txais kev cawm lawm, peb txhob xav tias txaus lawm. Peb yuav nco ntsoov tias muaj ib zaug Huab Tais Yes Xus hais rau cov tuaj mloog nws tias hnub txiav txim, nws yuav txiav txim sawv daws raws li nyias cov hauj lwm. Yog li mas niaj hnub no peb cov ntseeg txog Yes Xus, peb tau txais kev cawm lawm tiag, tab sis tsis tau lav tias peb yuav tau txais txoj sia nyob mus li. Li ntawd, tsis yog peb ntseeg xwb, peb tseem yuav tu siab rau peb cov txhaum thiab hloov siab tshiab tso kev ua txhaum pov tseg tig los ua zoo thiab.
Nyob zoo.
