HNUB TIM 16 LUB 11 HLIS; HNUB NCO TXOG LEEJ NTSHIAB MAS NKAS LIS, TUS POJ VAJ KOS LEES
COV LUS NYOB HAUV LUS KAS NTAWV MOO ZOO (LK 18: 1-8)
Kwv tij Hmoob sawv daws, yog nej nco tau mas muaj ib zaug cov thwj tim hais kom Huab Tais Yes Xus qhia lawv teev Ntuj, mas Huab Tais Yes Xus thiaj qhia lawv hais zaj ‘Peb Txiv’.
Hnub no, Huab Tais Yes Xus hais ib co lus ntuas cov thwj tim kom muab siab rua teev Ntuj tsis tseg, mas lawv thiaj yuav tau txais raws li lawv cov lus thov. Huab Tais Yes Xus hais tias “Nej saib mas! Tus txwj laus txiav txim tsis hwm Ntuj thiab tsis hwm neeg, tsis kav nws tsis xav kom tus poj ntsuam niaj hnub tuaj txob nws, ces nws tsa tus poj ntsuam cai tiv tus ntxub tus poj ntsuam. Ntawm Tswv Ntuj mas nws kuj yuav ua li ntawd thiab.”
Tswv Ntuj teb cov neeg thov txog Tswv Ntuj tsis yog vim Tswv Ntuj dhuav los yog nkees mloog lawv cov lus, tab sis yog vim Tswv Ntuj hlub lawv, Tswv Ntuj pom lawv muajib lub siab ntseeg, lawv siab ncaj, thiab Tswv Ntuj pom tias thaum lawv thov mas lawv tsis ntaus siab yau. Lawv thov tsis tseg, lawv thov tsis yog vim txoj kev ntshaw tab sis lawv thov nus rau qhov ncaj.
Kwv tij Hmoob, yog Huab Tais Tswv Ntuj ua xws li tus txwj laus hauv zaj paj lug no; yog pub rau tus thov vim nws nkees mloog thiab nthuav hnov cov lus thov; mas qhov kawg saib sawv daws yuav tsis muaj ib lub siab ntseeg, ces yuav zoo li lo lus Huab Tais Yes Xus hais tias “Thaum Neeg Leej Tub rov los, nws puas yuav pom neeg ntseeg nyob ntiaj teb?”
Kwv tij, yog peb xav ua neeg ntseeg kom tom thawj mus kom txog qhov kawg, mas peb kuj yuav teev Ntuj tsis tseg, txawm tias peb tsis pom Tswv Ntuj teb peb cov lus los xij. Peeb yuav tsis txhob ntaus siab yau rau txoj kev teev Ntuj.
Ib qho tuaj, peb kuj yuav tsum paub tias Tswv Ntuj xav kom peb thov dab tsi thiaj xis Tswv Ntuj siab. Peb yuav tsum paub tias yam twgtsis tsim nyog peb yuav thov.
Nyob zoo sawv daws.
