Tus tub zog Pas Kis Taas poob nyob hauv txoj kev tshuav nuj nqis. (Pakistan's kiln workers)

Tus tub zog Pas Kis Taas poob nyob hauv txoj kev tshuav nuj nqis. (Pakistan’s kiln workers are trapped in modern-day slavery)

Ib tug tub zog hais tias nws yug los nyob hauv tsev neeg muaj nuj nqis thiab ntshe nws yuav tuag vim nuj nqis thiab yuav tseg nws cov me nyuam nyob nrog nuj nqis.

4 xyoos dhau los, Masih raug nws tus tswv muab nws muag nrog cov nuj nqis rau ib tug tswv tsev ci av. Tam sim no tus neeg Kav Tos Liv uas nws muaj hnub nyoog 42 xyoos. Nws tab tom ua hauj lwm nyob hauv qhov chaw tshiab uas yog ci av nyob hauv lub nroog Faisalabad, lub xeev Punjab. 

Nws tau txais nyiaj hli ib lub hlis yog 1,200 rupee los yog 4 dos las. Nws siv sij hawm 2 hnub thiaj ci tau 1,000 daim av ci. Tab sis nws tus tswv muab nws cov nyiaj hli ib nrab lov them nws cov nuj nqis thiab them cov paj. Masih tau txais nqi zog tsawg heev thiab nws tseem yug nws tsev neeg 6 leej. Kev ua hauj lwm ci av yog cov hauj lwm nyuab thiab ua rau nws tsev neeg yuav tsum siv sij hawm ua hauj lwm ntev heev nyob hauv ib hnub. Nws tsev neeg tseem muaj ib tug me nyuam me uas hnub nyoog tsis tau txog 5 xyoos thiab.

Zoo li nws lub neej mag ntxiab tas ib sim neej los ntawm nuj nqis thiab kev ua qhev. Masih tsev neeg lawv nyob hauv ib lub tsev av pob pob nyob ze lub qhov cub ci av. Nws kheev kheev qiv nyiaj ntawm nws tus tswv thiab tej neeg txheeb ze uas muaj nyiaj, kom tau nyiaj los yuav txhuv noj thiab qee yam hauv lub yim neej. Zoo li nws tshuav nuj nqis thawm niaj thawm xyoo. Thaum caij ntuj nag mas lub qhov cub ci av yuav tsum raug kaw ntau lub hlis, ces ua rau nws tsev neeg poob hauj lwm tsis muaj kev khwv nyiaj.

Masih hais tias : “Peb nyob hauv lub neej txom nyem, kuv tsis paub tias yuav hloov mus li cas? Kuv yug los ua neeg tshuav nuj nqis thiab ntshe kuv yuav tuag vim nuj nqis, kuv yuav cia tej me nyuam nyob nrog nuj nqis. Ib hnub peb yuav luag tsis tau ib pluag mov noj, tsis muaj neeg quav ntsej txog peb, peb pw nyob hauv ib kem tsev khoob ntshuv.” Muaj tub zog kwv yees 3 txog 5 plhom leej, feem coob yog cov tub zog uas lawv nrog cov tswv tsev cog lus, thiab yog cov raug quab yuam ua hauj lwm nyob ntawm cov qhov cub ci av 20,000 lub nyob thoob As Xias Naj, uas tsoom pej xeem feem coob yog cov Mawv Xis Lim.

Cov lus no yog Pulitzer Center tshaj tawm nyob hauv lub 1 hlis xyoo no.

Cov neeg thov kev ncaj ncees hais tias : muaj poj niam, txiv neej thiab me nyuam coob leej nyob ntawm cov qhov cub uas lawv kheev kheev raug ntxias mus muag. Cov neeg raug ntxias mus muag yog nyob hauv cov xeev ntuj pluag txom nyem. Lawv raug neeg dag ntxias tias : yuav coj lawv mus ua cov hauj lwm tau nyiaj ntau, muaj kev nyob kaj siab thiab kev pab zoo. Tab sis qhov kawg lawv raug quab yuam ua hauj lwm hnyav thiab raug muag. Kev xa neeg mus txawv teb chaws tsis raug cai, mas yog kev ua luam neeg. Tab sis cov tub zog raug quab yuam nws yog nws ib yam ntawm kev muag neeg.

Lwm cov tub zog nyob lwm xeev ntuj, xws li cov neeg ua liaj ua teb, cov neeg ntes ntses thiab cov khawb qhov thee av, kuj yog vim kev ua tiag uv nrhiav nyiaj. Tab sis cov tub zog nyob ntawm cov qhov cub ci av, mas lawv txom nyem kawg. Vim lawv tsis tau kev ywj siab thiab tawm tsis tau mus qhov twg. Cov tub zog ci av feem coob hauv Kasur, Sheikhupura thiab Faisalabad uas nyob hauv lub xeev Punjab, lawv yog neeg ntseeg. Cov qhov cub ci av feem ntau kuj yog nyob rau tej chaw deb nroog, deb kev kawm thiab deb kws kho mob, ces lawv lub neej yog txom nyem ntsuav. Yog ib tug neeg twg muaj mob los yog raug mob, mas kawg nyias saib nyias tus kheej xwb. Xav yuav tshuaj noj, kuj tsis muaj nyiaj. Yog muaj mob lawm, tus tswv tsev kuj tsis quab yuam pes tsawg thiab. Cov tswv tsev ci av kuj qhia tias lawv tshuav nuj nqis, tab sis tsis muaj qhov meej tseeb tias nuj nqis yog tshuav npaum cas, thiab lub sij hawm lawv yuav them nuj nqis yog thaum twg ?

Vim kev pluag, kev tsis paub ntawv thiab tsis paub txog txoj cai ua tub zog, ces cov tub zog thiab lawv tsev neeg thiaj raug ua qhev li no thawm xyoo thiab txhua xyoo. Masih tsis paub tias nws tshuav tus tswv tshiab nuj nqis npaum cas, thiab yuav them rov qab thaum twg ? Yuav ntev npaum cas uas nws cov me nyuam yuav ua qhev ci av mus txog thaum twg ? Cov tub zog tej me tub me nyuam yog cov txom nyem tshaj plaws nyob hauv cov neeg ci av. Cov lus no yog cov kav xwm ntawm tib neeg kev ncaj ncees nyob Pas Kis Taas teb uas tus hais.

Tam sim no muaj cov me nyuam tub ntxhais hluas ze 2 plhom leej ua hauj lwm zoo li cov qhev. Tab txawm tias kev siv cov me nyuam tub me nyuam ntxhais ua qhev muaj nyob ntau qhov chaw, tsis kav kuj tseem tsis tau muaj leej twg raug txiav txim tias ua txhaum los yog raug rau txim li. Vim cov tub zog feem coob yog tuaj ntawm tej pab neeg raug caij tsuj, xws li cov neeg ntseeg uas pluag txom nyem nyob hauv lub xeev Punjab, thiab cov His Ntus uas yog neeg txheej qis nyob hauv lub xeev Sindh.

Tus tawm txoj cai thiab cov tseem hwv tsis muaj kev pom dej siab thiab tsis hlub tshua txog cov haiv neeg tsawg kiag li. Cov me nyuam tub ntxhais hluas uas lawv ua hauj lwm nyob hauv cov qhov cub ci av, lawv tsis muaj txhiam xws noj txaus thiab lawv qhov muag tsis tshua pom kev zoo. Ces hais txog qhov tuag lawv muaj feem cuam yuav tuag coob thiab tuag sai dua lwm cov. Tsis tas li ntawd, lawv kheev kheev raug cov tswv tsev ntes kaw kom cov niam cov txiv txhob tawm mus sab nraud, thaum lawv hais tias lawv mus kho mob los yog yuav tej yam toob xib tseem ceeb.

Kev quab yuam neeg ua hauj lwm hnyav, nws yuav ua mob rau lub cev thiab ua rau neeg tuag tau, ces tej yam no hais tau tias yog kev tua neeg. Cov neeg pluag tsis tau txais kev pov hwm thiab cov neeg ntse muaj hwm chim kuj txawj nrhiav tswv yim zam kev ncaj ncees. Xyoo 2005 pab neeg saib xyuas kev ncaj ncees tau tawm tsam thov kom tso tseg txoj kev quab yuam tub zog nyob Pas Kis Taas teb. Lawv thov kom tseem hwv tawm txoj cai kav cov tub zog, tab sis txog tav no txoj cai ntawd kuj tsis muaj zog li. Tseem hwv Pas Kis Taas txoj cai txwv tsis pub yuam neeg ua qhev, yog tsis pub hem, tsis pub nyiag neeg, tsis pub ua luam neeg nyob hauv cov tub zog, yog leej twg ua li ntawd mas nws yuav raug txim. Tab sis tsuas yog tsa kom muaj txoj cai xwb, tsis muaj kev siv txoj cai. Ces cov tswv tsev av ci feem coob lawv tsis kam mus nce npe txais tub zog kom raug cai raws li cov tseem hwv hais. Lawv tab meeg thuam tseem hwv txoj cai thiab lawv tsis quav ntsej txog.

Global Slavery Index xyoo 2023, thiaj tshaj tias Pas Kis Taas teb yog lub teb chaws tim 80 nyob hauv 100 lub teb chaws uas muaj kev quab yuam caij tsuj neeg.