.
Lo lus hauv lub neej, lub 9 hlis 2025. (Word of Life, Sep 2025)
“Nej nrog kuv zoo siab, vim kuv nrhiav tau kuv tus yaj poob zoo lawm.”
Cov neeg yug yaj hauv cov teb chaws As Xias Nrab txheej thaud, lawv kheev kheev suav lawv cov yaj tom qab coj yaj mus nog zaub los. Yog tias muaj ib tug yaj twg ploj lawm, mas lawv yuav tawm mus nrhiav. Lawv siab tawv heev, txawm tias yuav maub hmo ntuj hauv teb chaws suab puam los lawv yeej maub mus, kom nrhiav tau tus yaj uas ploj lawm.
Zaj paj lug hais txog tus yaj ploj mus lawm thiab rov nrhiav tau no, ua kom pom meej tseeb tias ; tus zov yaj muaj kev nyiam kev hlub rau nws cov yaj heev. Yog thaum nws paub tias ib tug yaj ploj mus lawm, nws kuj pib tawm nrhiav tam sid. Thaum nws nrhiav pom tus yaj lawm, nws yuav muab kwv saum xub pwg, vim tus yaj tsis muaj zog, ntshai los yog raug mob. Yog tias tsis pab, tus yaj yuav raws tus tswv qab tsis tau. Nws yuav coj tus yaj rov los xyaw npoj thiab nws yuav caw kwv tij phooj ywg tuaj koom ua koob tsheej kev zoo siab.
“Nej nrog kuv zoo siab, vim kuv nrhiav tau kuv tus yaj poob zoo lawm.”
Zaj paj lug ua piv txwv no, muaj 3 yam uas peb yuav muab los xav. Yog kev ploj mus, kev nrhiav tau thiab kev ua koob tsheej zoo siab.
Kev ploj mus los yog thaum peb yuam kev, lub Moo Zoo yog Tswv Ntuj tawm nrhiav tus neeg uas yuam kev los tus ploj mus. Peb kheev kheev yuam kev hauv txhua qhov chaw uas peb mus, peb ntsib los yog hauv peb kev ua lub neej. Yam uas peb tab tom hais txog no, yog hais txog kev raug tso pov tseg, kev tsis raug lees txais, kev pluag txom nyem, kev nkag siab yuam kev los yog kev sib tawg. Txhua yam no yog zoo li hauv teb chaws suab puam uas peb ntsia tsis pom muaj kev nyob qhov twg. Tswv Ntuj zoo li tus tswv zov yaj uas nrhiav peb. Tab txawm peb ntsia tsis pom Tswv Ntuj, tsis kav Tswv Ntuj nrhiav kom tau ntsib peb tas mus li.
Kev nrhiav tau. Peb yuav xav txog daim duab tus neeg zov yaj uas nws maj ceev ceev tawm mus nrhiav tus yaj nyob teb chaws suab puam. Nws yog daim duab uas zoo heev, ua kom peb nkag siab txog kev zoo siab ntawm tus tswv zov yaj thiab tus yaj.
Kev nrhiav tau no, tus yaj yuav pom tias nws rov tau nyob nyab xeeb. Li ntawd, kev rov nrhiav tau no yog kev khuv leej ntawm Tswv Ntuj.
Kev ua koob tsheej zoo siab. Tus zov yaj yuav hu kwv tij phooj ywg tuaj koom ua kev zoo siab, vim nws xav faib kev zoo siab rau sawv daws. Kuj zoo li hauv ob zaj paj lug sib piv, xws li zaj nrhiav lub txiaj nyiag uas ploj mus lawm thiab zaj leej txiv tus muaj kev khuv leej. Yes Xus xav qhia peb tias : “Kev koom nrog sawv daws zoo siab ua ke ntawd, yog qhov tseem ceeb. Nws pab kom peb txhob txiav txim rau lwm tus, vim sawv daws puav leej txawj yuam kev thiab rov nrhiav tau los yog rov ntsib.”
“Nej nrog kuv zoo siab, vim kuv nrhiav tau kuv tus yaj poob zoo lawm.”
Lo lus pub txoj sia no, ua kom peb paub nco txiaj ntsim hauv kev khuv leej uas Tswv Ntuj pub rau peb txhua tus. Kev sib koom hauv kev zoo siab, thiab kev tsuj xeeb yog qhov qhia txog kev sib koom ua ib tug. Yog hais txog tsis muaj kev sib cais, tsis hais cov neeg zoo thiab cov neeg muaj txhaum, peb yuav los sib koom kev zoo siab ua ke.
Muaj ib ntu nyob hauv cov lus Keira Lubicz sau tseg tias : “Nws caw kom peb nkag siab txog Tswv Ntuj lub hom phiaj, thiab ntseeg Tswv Ntuj txoj kev nyiam kev hlub.”
Peb kheev kheev xam los yog saib tias; Tswv Ntuj kev nyiam kev hlub yuav tsawg zuj zus. Tab sis Tswv Ntuj txoj kev xav txawv peb txoj kev xav. Tswv Ntuj tos peb tas mus li. Thiab kev rov los ntawm peb txhua zaus, nws coj kev zoo siab loj kawg los rau Tswv Ntuj. Tsis hais peb yuav los cuag Tswv Ntuj zaum tas zaum thiab, los yog suav tsis txheeb kuj xij.
“Nej nrog kuv zoo siab, vim kuv nrhiav tau kuv tus yaj poob zoo lawm.”
Qee zaus peb yog zoo li tus neeg yug yaj, peb yog tus neeg saib xyuas lwm tus thiab yuav tsum nrhiav lwm tus uas nyob nrug peb hauv peb lub zos, los yog nrhiav cov neeg pluag txom nyem. Cov neeg yuam kev los yog cov nrug peb mus, vim kev txom nyem hauv lub neej.
Ib tug xib hwb piav tias : “Muaj ib co tub kawm tsis tuaj kawm ntawv, ces kuv thiaj mus hauv lub khw uas nyob npuab peb lub tsev kawm ntawv. Kuv vam tias yuav tau ntsib lawv nyob ntawd. Vim kuv paub tias qee leej yuav tsum tawm mus ua hauj lwm nrhiav nyiaj. Muaj ib hnub kuv tau ntsib lawv, ua rau lawv poob siab qhov kuv mus nrhiav lawv. Tab sis lawv kuj zoo siab thiab pom tias lawv tseem ceeb rau tsev kawm ntawv. Qhov uas tau los ntawd yog lawv rov qab tuaj kawm ntawv txhua hnub, ces qhov no coj kev zoo siab tuaj rau sawv daws.”
Cov lus no sau los ntawm Patricia Massola thiab pab neeg lo lus pub txoj sia
