Hnub Chiv tim 5 Lub 1 Hlis Ntuj 2025
Lub Caij Yes Xus Yug Los
Mas Tais 2:1-12
Hnub Chiv Hwm Huab Tais Yes Xus Tawm Tuaj
“lawv pom tus me nyuam thiab nws niam Mab Liab, lawv pe, lawv hawm nws. Lawv qhib lawv cov phij xab, lawv cev kub, cev txab ntoo xyab, thiab cev txab txiv yoov ua paj tshab rau nws.”
Hnub chiv no yog hnub hwm Leej Pleev tawm tuaj. Lo lus “tawm tuaj” los Epiphany txhais tias kev tshwm sim. Ua li ntawd, mas hnub chiv hwm Leej Pleev tawm tuaj kuj txhais tias peb ua hmoov txog hnub me nyuam Yes Xus tawm tuaj rau sawv daws paub tias txoj kev cawm uas Tswv Ntuj tau cog lus tau tshwm sim tuaj lawm. Tus me nyuam Yes Xus yog qhov pom kev rau lub qab ntuj neeg, tsis hais His Xas Lais los pej kum neeg. Tus me nyuam Yes Xus yog paj tshaj muaj qab hau tshaj plaws rau txhua txhia haiv neeg.
Hauv Ntawv Moo Zoo hnub no, peb hnov Mas Tais qhia txog cov kws hnub qub tuaj Toob Fab tuaj hawm me nyuam Yes Xus. Hauv Mas Tais Ntawv Moo Zoo xwb uas hais txog cov kws hnub qub. Cov Kws Hnub Qub no peb tsis paub ntau yam txog lawv. Peb tsis paub lawv npe. Tam li peb paub lawv tuaj ntawm Pes Xist eb tuaj, vim nyob Pes Xis teb yeej muaj ib co Leej Choj saib kam cov hnub qub los ntaus txheeb saib neeg txoj hmoov. Sawv daws saib lawv yog ib co neeg paub txij ci ntau. Cov kws hnub qub sawv cev lub qab ntuj neeg. Lawv tuaj txawv teb chaws tuaj. Lawv ntshaw paub txog tus Cawm Seej, lawv muaj lub siab ntshaw nrhiav Tswv Ntuj.
Cov kws hnub qub muab paj tshaj 3 yam rau tus me nyuam. Muaj kub, txab ntoo xyab, thiab txab txiv yoov. Paj tshaj 3 peb yam no muaj lub ntsiab tseem ceeb hais txog tus me nyuam. Kub muaj lub ntsiab hais txog kev ua vaj ntawm Yes Xus peb tus Huab Tais, txab ntoo xyab txhais tias Tswv Ntuj nrog nraim peb los Tswv Ntuj nrog peb nyob ib yam li pa ncho ntawm txab ntoo xyab hauv thaj txi Ntuj. Thiab txab txiv yoov muaj lub ntsiab hais txog Huab Tais Yes Xus kev txom nyem loj thiab kev tuag hauv txoj kev cawm neeg.
Tsis tas li ntawd, lub hnub qub kuj yob ib lub cim tseem ceeb tshaj. Peb yuav muab lub hnub qub los piv rau Ntuj lub txiaj ntsim ua kom peb pom kev tuaj cuag Yes Xus, thiab muab piv rau lub Moo Zoo, uas lub Moo Zoo tuaj coj cov haiv neeg mus cuag Yes Xus. Lub Moo Zoo yog mov pub txoj sia, yug peb tus tsuj plig, thiab ua qhov pom kev coj peb lub neej kom taug hauv Tswv Ntuj txoj kev, uas yog txoj kev mus txog Ntuj lub Ceeb Tsheej.
Kwv tij zoo nyiam sawv daws, cov kws hnub qub ntseeg tam sis ntawd. Peb yuav ua zoo li lawv. Peb txhob cav ncauj. Peb tsis pom peb tus Huab Tais lub hwj chim, tsis pom lub Koom Txoos muaj hwj chim peb zej zos Hmoob: peb hwm Yes Xus ib yam li cov kws hnub qub uas lawv hwm Yes Xus nyob hauv ib lub tsev me me. Peb ntseeg, vim peb tau txais Tswv Ntuj qhov pom kev, xws li yog lub hnub qub coj peb kev.
Peb niaj hnub yuav thov Tswv Ntuj lub txiaj ntsim qhia peb kev mus cuag Yes Xus. Peb yuav nco ntsoov tias lub hnub qub tsis yuam leej twg: nws qhia txoj kev: yus ntseeg, yus ntsia, yus thiaj tau mus cuag Yes Xus. Yog tus ua siab hnyav los yus nkees mas yus must sis txog Yes Xus. Yes Yus tsis yuam yus kom yus ntseeg.
Thov kom Huab Tais tus nyuam qhuav yug los foom hmoov zoo rau nej thiab ua lub hnub qub coj nej txoj hauv kev tas mus li
