Zaj nyeem hnub tim 5 lub 4 hlis 2026
Hnub Chiv Hla
Cov lus nyob hauv Zam Ntawv Moo Zoo (Z 20: 1-9)
Huab Tais Yes Xus Sawv Rov Los lawm, Alleuia! Nyob zoo os kwv tij Hmoob sawv daws, thov hais Alleluia rau nej sawv daws txhua leej txhua tus. Hnub no peb zoo siab uas peb sawv daws ua hmoov Huab Tais Yes Xus rov qab los ntawm kev tuag; nws muaj txoj sia tshiab. Thiab qhov no yog peb txoj kev vam khom, peb txoj kev ntseeg.
Hauv lub Moo Zoo hnub no, peb hnov tias Yes Xus cov thwj tim tau ntsib kev sawv rov los, yog thawj zaus uas lawv tau ntsib kev sawv rov los. Kuv hais tias lawv tau pom kev sawv rov los. Ces kev sawv rov los yog zoo li cas ne? Cov thwj tim tseem tsis tau pom Yes Xus. Qhov lawv pom yog lub ntxa qhuav, tsuas muaj cov hlab ntaub nyob ntawd xwb. Tsis muaj Yes Xus tus nyuam qhuav sawv rov los muaj txoj sia tos qhia qhov tseeb rau lawv. Cov thwj tim tseem tsis nkag siab qhov lawv pom. Lawv ntxhov siab, lawv ntshai kawg. Kuv ntseeg tias lawv muaj lo lus nug ntau yam xav nug, xav paub, tiam sis tsis muaj lo lus teb. Muaj ib tug thwj tim, nws pom qhov no, nws nco tau Huab Tais Yes Xus cov lus, ces nws ntseeg.
Kwv tij zoo nyiam sawv daws, qhov no yog caij Hla, qhov no yog txoj kev ntseeg ntawm kev sawv rov los uas cov thwj tim thiab peb tau ntsib. Peb tsis paub meej tas nrho, peb tsis to taub tag ib puas tsav yam. Tej zaus, peb nug tias Huab Tais Yes Xus yog leej twg? Tswv Ntuj nyob qhov twg? Hauv lub Moo Zoo, cov thwj tim kuj nrhiav Huab Tais Yes XUs thiab. Lawv nrhiav lub ntsiab lus ntawm kev sawv rov los. Tej zaus, tsis muaj lo lus teb rau peb. Tiam sis, ntawm qhov tsis paub, ntawm kev tsis nkag siab, ntawm qhov ntxhov siab, peb muaj kev ntseeg ruaj khov. Ntawm qhov tsaus ntuj nti ntawm lub neej, peb pib ntseeg txog Yes Xus, vam thiab cia siab rau nws.
Nyob zoo sawv daws.
