Hnub Chiv tim 2 Lub 3 Hlis Ntuj 2025
Lub lis piam 8 hauv lub Caij Nyob Nruab Xyoo
Lus Kas 6:39-45
“Tsis muaj ib tsob ntoo zoo nkauj yuav txi ib co txiv lwj, tsis muaj ib tsob ntoo lwj yuav txi ib co txiv zoo nkauj.”
Nyob zoo…
Kwv tij zoo nyiam sawv daws, hnub no yog hnub chiv, yog hnub uas peb cov ntseeg Kas Tos Liv txhua leej txhua tus yuav mus teev Ntuj, yuav mus koom thaj txi Ntuj nyob tim tsev teev Ntuj. Txhua hnub chiv peb caiv rau Tswv Ntuj, peb muab lub sij hawm no rau Tswv Ntuj thiab muab rau peb tsev neeg. Cov ntseeg Kas Tos Liv lub neej kuj yog zoo li no. hauv 1 lub lis piam, 6 hnub peb ua hauj lwm, peb nrhiav noj nrhiav haus, nrhiav nyiaj nrhiav txiag, nrhiav kev vam meej, nrhiav kev noj qab nyob zoo, nrhiav lub neej zoo, npluaj nug, muaj noj muaj haus yav tom ntej. Mas 1 hnub peb nrhiav cov mov pub txoj sia, peb nrhiav mov pub tus tsuj plig uas yog Huab Tais Yes Xus lub cev thiab cov ntshav hauv thaj txi Ntuj, peb nrhiav kom nyob ze Tswv Ntuj. Peb nrhiav cov pub cev nqaij thiab mov pub tsuj plig, peb thiaj tawg paj txi txiv, peb thiaj txi txiv tau. Zoo xws li Tswv Ntuj Lo Lus peb hnov hnub no, “Tsis muaj ib tsob ntoo zoo nkauj yuav txi ib co txiv lwj, tsis muaj ib tsob ntoo lwj yuav txi ib co txiv zoo nkauj.”
Peb cov ntseeg Kas Tos Liv yuav tsum ua lub neej kom txi tau txiv zoo knauj rau luag pom, peb yuav tsum txi tau txiv zoo nkauj nyob nruab nrab peb cov ntseeg thiab cov tsis tau ntseeg ib yam li thiab, kom lawv paub tias cov ntseeg txog Huab Tais Yes Xus, tsis yog hais tias tsuas yog yus ntseeg xwb, tab sis yus tawg paj txi txiv ntau ntau.
Hauv Ntawv Moo Zoo hnub no Huab Tais Yes Xus tseem hais ntxiv kom peb ceev faj, txhob ua neeg zoo li cov dig muag uas coj lwm tus dig muag mus yuam kev. Peb yuav tsum siv Tswv Ntuj Lo Lus qhia ua lub teeb kaj peb lub neej. Thiab Huab Tais Yes Xus qhia peb kom ceeb faj txhob txiav txim luag tej, txhob hais phem rau luag, peb tsis muaj cai txiav txim luag tej, tsuas yog Tswv Ntuj xwb thiaj muaj. Huab Tais Yes Xus qhia ntxiv tias: “Vim li cas koj ntsia tus quav nplej uas nyob hauv koj tus kwv lub qhov muag? Hos tus nqaj uas nyob hauv koj lub qhov muag, koj ho tsis pom! Thiab nws hais tias: “Koj rho tus nqaj hauv koj qhov muag pov tseg tso; koj thiaj yuav pom kev dig tus quav nplej hauv koj tus kwv lub qhov muag.”
Cov kwv tij zoo nyiam, nej saib, tej zaus, peb puas ua neeg zoo li no? peb puas ntsia ntawm luag tej qhov txhaum qhov phem txawm tias nws yog yam me me xwb, tiam sis peb tsis ntsia ntawm qhov zoo, qhov zoo nkauj uas luag ua rau peb. Qhov yus ua yog qhov phem qhov tsis zoo tshaj, tiam sis yus tsis pom, yus tsis hais txog, tiam sis thaum luag ua phem ua tsis zoo, yus hais lus phem phem rau lawv. Huab Tais Yes Xus qhia peb cov ntseeg sawv daws kom txhob ua li ntawd nawb. Peb cov ntseeg txog Yes Xus, cov ua Yes Xus cov thwj tim yuav tsum muab siab rau qhov zoo, qhov zoo nkauj, txiv zoo nkauj, tsis yog qhov tsis zoo los qhov phem.
Thov kom peb ua neeg zoo li tsob ntoo zoo uas Huab Tais Yes Xus hais tias: “Xav paub tsob ntoo, mas yuav ntsia nws lub txiv. Tus neeg zoo, rho tej yam zoo tawm hauv nws lub siab los. Tus neeg phem rho tej yam phem tawm hauv nws lub siab los. Vim tias yam uas lub ncauj hais tawm, yog phwj hauv lub siab tuaj.”
