Hnub Chiv tim 16 Lub 2 Hlis Ntuj 2025
Lub lis piam 6 hauv lub Caij Nyob Nruab Xyoo
Lus Kas 6:17, 20-26
“Nej cov pluag, mas nej txoj hmoov zoo, vim Tswv Ntuj lub Ceeb Tsheej yog nej tug.”
Cov kwv tij, hauv lub Moo Zoo hnub no peb hnov Huab Tais Yes Xus txhawb lub zog thiab qhia nws cov thwj tim txog Ntuj lub Ceeb Tsheej. Lawv txiav txim siab los ua Yes Xus cov thwj tim, los raws Yes Xus qab, lawv txiav siab raug lawm. Vim tias Tswv Ntuj lub Ceeb Tsheej yog lawv tug. Txawm tias muaj kev txom nyem, muaj kev tshaib plab, muaj kev quaj ntsuag, muaj kev ntxub kev hiam ntau yam hauv yus lub neej, tiam sim, yog yus tsis ua xyem xyav, yus ntseeg thiab tso siab tiag tiag rau Tswv Ntuj, Tswv Ntuj yuav saib xyuas raws li Tswv Ntuj lub siab nyiam. Zoo xws li Huab Tais Yes Xus cov lus qhia tseem ceeb hnub no:
“Nej cov pluag, mas nej txoj hmoov zoo, vim Tswv Ntuj lub Ceeb Tsheej yog nej tug.
Yog nej tshaib, nej txoj hmoov zoo, vim nej yuav tau noj txaus siab.
Nej cov quaj, nej txoj hmoov zoo, vim qhov kawg mas nej yuav luag.
Yog muaj neeg ntxub nej, cem nej, los xyav lus phem rau nej vim Yes Xus lub npe, mas nej txoj hmoov zoo.” Huab Tais Yes Xus cog lus tias “hnub ntawd, nej yuav zoo siab, nej yuav dhia hom khaj, vim nej tau txais koob haum loj nyob saum ntuj. Yog peb raws Yes Xus qab, yog peb ntseeg txog Yes Xus, mloog nws Lo Lus, thiab ua raws li nws cov lus qhia, Peb yuav tau txais koob hmoov koob haum loj nyob saum ntuj.
Kwv tij zoo nyiam sawv daws, txhob yuam kev xav tias thaum yus txiav siab los ntseeg txog Tswv Ntuj, ntseeg txog Yes Xus tas lawm ces, yus tsis muaj teeb meem dab tsi, yus tsis ntsib kev txom nyem, yus tsis muaj kev nyuaj siab, yus tsis muaj kev tshaib plab, yus tsis raug luag hiam thiab ntxub, yus tsis muaj kev quaj ntsuag, txhob yuam kev xav li ntawd nawb. Hnub no, hauv lub Moo Zoo Huab Tais Yes Xus hais tseeb, hais kom meej lawm tias muaj tiag, peb yuav muaj tiag! Tab sis mas peb yuav yeej kom tau los tsis tau. Yog peb yeej tau vim peb cia siab rau Tswv Ntuj, peb kuj txoj hmoov zoo, thaum kawg, mas peb yuav tau txais Tswv Ntuj lub Ceeb Tsheej.
Cov kwv tij, ua neej nyob hauv lub ntiaj teb no tsis yooj yim kiag li. Txawm tias muaj teeb meem los kev txom nyem hnyav npaum li cas kuj xij, txhob tsis nco qab tias peb muaj Tswv Ntuj, txhob tsis nco qab tias Tswv Ntuj yog kev vam khom, Tswv Ntuj yog qhov chaw so ntawm peb cov quaj ntsuag, ntawm peb cov tu siab. Txhob tsis nco qab tias Tsw Ntuj yog qhov chaw so kawg uas peb tib neeg vam khom rau Tswv Ntuj tau. Txiv plig thov txhawb lub siab txhawb lub zog rau peb cov neeg ntseeg sawv daws nawb, thov kom Tswv Ntuj pab peb, kho peb kom muaj dag muaj zog yeej tau kev txom nyem kev nyuaj siab tag nrho, kom peb ntseeg ruaj ruaj txog Tswv Ntuj, “vim peb txoj hmoov zoo.”
