Hnub Chiv tim 5 Lub 1 Hlis Ntuj 2025
Lub Caij Nyob Nruab Xyoo
Lus Kas 3:15-16, 21-22
Hnub Chiv Hwm Huab Tais Yes Xus Txais Lub Cim Ntxuav
“Koj yog kuv Leej Tub. Hnub no kuv xeeb koj.”
Cov kwv tij zoo nyiam sawv daws, hnub no yog hnub chiv uas Huab Tais Yes Xus txais kab ke ntxuav. Lub Koom Txoos xaus lub caij Yes Xus Yug Los lawm. Tam sim no, peb nyob hauv lub Caij Nyob Nruab Xyoo lawm os cov kwv tij.
Cov lus “Koj yog kuv Leej Tub. Hnub no kuv xeeb koj” yog lub ntsiab lust seem ceeb hauv hnub chiv no uas peb ua hmoov tsuj xeeb hwm Huab Tais Yes Xus txais kab ke ntxuav. Hnub no, peb nco txog Peb Leeg Huab Tais txoj kev nyiam hauv Yes Xus txoj hauj lwm tshaj Ntuj Lus.
Huav hmo ntshiab huv nyob lub zos Bethlehem, Yes Xus yug los nruab nrab peb, nws yug los hauv txoj kev txom nyem tshaj plaws nyob ntawm ib lub dab nyuj. Tsis tas li ntawd, hauv hnub Huab Tais Yes Xus tawm tuaj, cov kws hnub qub txhos caug txais nws ua tus Mes Xis As los tus Pleev ntawm txhua haiv neeg uas lawv tab tom txais ntev dhau lawm. Hnub no, peb muab siab rau Huab Tais Yes Xus thiab nws txoj hauj lwm tshaj Ntuj Lus. Huab Tais Leej Txiv hais rau Yes Xus tias: “Koj yog kuv Leej Tub!” Lub ntuj qhib plho los, ces Leej Ntuj Plig Ntshiab yees ua ib lub cev, xws li ib tug nquab, nqes los saum Yes Xus. Qhov no tshwm sim tuaj ua rau sawv daws paub kom meej tias Yes Xus yog Tswv Ntuj Leej Tub, thiab tam sim no, nws yuav pib ua Tswv Ntuj txoj hauj lwm tshaj Ntuj Lus thiab txoj hauj lwm cawm neeg lawm.
Hauv Ntawv Moo Zoo hnub no, Yes Xus txais kab ke ntxuav ntawm Zam Ntxuav Plig. Yes Xus txais kab ke ntxuav tsis yog txhais tias Yes Xus muaj txhaum. Tsis yog li ntawd. Yes Xus yog Tswv Ntuj, li ntawd, nws tsis muaj txhaum, nws tsis muaj lub keeb txhaum thiab. Yes Xus txais kab ke ntxuav yog lub cim tshaj rau sawv daws paub tias tam sim mus no yav tom ntej, kuv yuav tig los yuav lub siab tshiab, kuv yuav ua lub neej tshiab nyob hauv Tswv Ntuj, kuv yuav pauv ntxeev kuv lub neej kom zoo tuaj. Kuv yog Tswv Ntuj Leej Tub lawm, ntxiv mus mas kuv tsis ua neej nyob hauv kev txhaum kev tsis zoo.
Yes Xus tuaj txais kab ke ntxuav ntawm Zam tsis yog tias nws muaj txhaum tab sis yog ua tim khawv tias Yes Xus yogi b tug neeg ncaj ncees, ua lub neej raws txoj kev ncaj. Tsis tas li ntawd, kev tig los yuav lub siab tshiab ntawm Yes Xus thiab haiv neeg Israel, tsis yog kev daw txhaum, tab sis yog kev ua Tswv Ntuj cov thwj tim, yog kev ua lub neej thiab pub txoj sia tag nrho rau Tswv Ntuj.
Kwv tij zoo nyiam sawv daws, peb cov ntseeg sawv daws, peb cov tau txais lub cim ntxuav sawv daws, peb kuj yuav tsum ua li no thiab. Yes Xus yog peb tus piv txwv. Lub cim ntxuav tsis yog passport los txoj kev ua kom peb mus pem Ntuj lub Ceeb Tsheej xwb xwb, tab sis mas, peb yuav tsum ua neej kom tsim nyog Tswv Ntuj hu peb “Tswv Ntuj cov tub cov ntxhais.” Peb yuav tsum ib txwm tu siab ntawm peb cov txhaum thiab yuav lub siab tshiab tig los nhriav Tswv Ntuj, tig los taug hauv Tswv Ntuj txoj kev. Peb thiaj tsim nyog txais Tswv Ntuj lub Ceeb Tsheej.
Yes Xus muaj lub hom phiaj raws li no. Txij no mus, Yes Xus yuav tshaj Tswv Ntuj lub Moo Zoo rau niaj teb neeg. Tom qab ntawd, sawv daws yuav paub tias nws yog Tswv Ntuj leej Tub. Zoo li Lus Kas hais tias “muaj ib lub suab nrov saum ntuj tuaj tias ‘Koj yog kuv Leej Tub. Hnub no, kuv xeeb koj!”
