Txij thaum pib muaj lub Koom Txoos los, mas zaj hais txog tus txiv neej dig muag hauv nruab thiab raug piav nyob hauv lub Caij Plaub Caug. Qhov ntawd yog ua kom nkag siab yooj yim txog tus txiv neej dig muag hauv nruab thiab. Ua ntej yuav ntsib Yes Xus, mas nws yog neeg dig muag. Tab sis thaum nws ntsib Yes Xus lawm, Yes Xus kho nws lub qhov muag rov pom kev. Yes Xus muab aub ncaug ua ib qho av nkos los pleev tus txiv neej dig muag lub qhov muag. Nws hais kom tus dig muag mus ntxuav qhov muag nyob ntawm lub pas dej Xis Los Es. Tus dig muag mus ntxuav tas, nws rov los, nws cia li pom kev lawm.
Tom qab tus vaj Koos Taas Tis Nus, mas thawj qhov chaw ua lub Cim Ntxuav thiaj raug tsim tawm. Lawv hu qhov chaw ntawd ua qhov chaw ntawm qhov pom kev. Nyob hauv zaj nyeem hnub no, Zam tau txais lub zog txhawb siab los ntawm cov xwm txheej hauv Yes Xus lub neej. Thiab muab ua lub noob tseem ceeb hauv kev tshaj lub Moo Zoo. Yog kev cawm uas Yes Xus muab rau peb. Yes Xus nyob ntawd tos txog hnub kawg, yog hnub loj tshaj hauv kev nqaum paj nqaum nruas. Yes Xus hais nrov nrov tias :
“Leej twg nqhis, mas kom nws tuaj cuag kuv. Leej twg ntseeg txog kuv, mas kom nws haus.” Hauv lub caij ntawm qhov pom kev no, Yes Xus tshaj tias : “Kuv yog qhov pom kev kaj lub qab ntuj neeg. Leej twg lawv kuv qab, nws yuav tsis mus kev hauv qhov tsaus ntuj. Nws yuav tau qhov pom kev uas coj mus hauv txoj sia.”
Hauv Yes Xus txheej neeg mas sawv daws ntseeg tias : vim Tswv Ntuj kev ncaj ncees tsis muaj tag, nws thiaj muab paj tshab rau cov neeg zoo, cov raug txim thiab cov neeg phem nyob hauv ntiaj teb no. Rau txim raws li qhov lawv ua. Txoj hmoov phem, kev mob nkeeg thiab kev tsim txom yog kev rau txim hauv kev txhaum.
Yes Xus cov lus hais txog zaj no meej kawg. Tsis hais tus dig muag thiab nws niam nws txiv lawv puav leej tsis tau ua txhaum. Hais txog kev rau txim ntawm Tswv Ntuj hauv kev thuam Tswv Ntuj. Ntawd yog kev xav ntawm lwm txoj kev teev hawm. Thaum Ntawv Ntshiab hais txog Tswv Ntuj kev rau txim, mas nws siv xeem lus txheej thaud uas tsis yog peb xeem lus. Vim li no thiaj muaj qhov yuav thuam kev phem los ntawm kev txhaum, tsis yog los ntawm Tswv Ntuj. Zim txwv no kev siv cov lus paj lug txog Tswv Ntuj kev rau txim uas tsis muaj qhov meej tseeb, mas nws tsis yog thiab ua rau nkag siab yuam kev.
Yes Xus hais tias : “Thaum chiv thawj muaj ib tus neeg dig muag thiab muaj coob leej pom kev. Tab sis nyem no nws txawv lawm. Tus uas nws xav tias nws pom kev, yog tus neeg dig muag uas kho tsis zoo. Hos tus uas paub tias nws dig muag ntawd rov pom kev tuaj.” Sim saib seb Yes Xus raug hu li cas nyob hauv zaj no. Ntawm cov neeg muaj hwj chim lawv muaj qhov muag, tab sis lawv tsis xav paub tias Yes Xus yog leej twg ?
Tus dig muag ua lub neej raws kev ntseeg thiab haum nrog cov Thwj Tim lub neej. Thaum chiv thawj mas Yes Xus tsuas yog ib tug neeg dog dig rau nws xwb, tab sis tom qab ntawd Yes Xus rais ua yaj saub. Yog Tswv Ntuj li neeg thiab qhov kawg Yes Xus yog Tswv Ntuj. Lub npe kawg tseem ceeb tshaj. Yog lub npe uas cov neeg ntseeg siv los tshaj txog lawv txoj kev ntseeg, ua ntej yuav txais lub Cim Ntxuav. Hauv hmo hla cov tuaj kawm kev ntseeg yuav tshaj rau cov neeg ntseeg tias : “Kuv ntseeg tias Yes Xus yog Tswv Ntuj.” Txij hnub ntawd los lawv raug tos txais nyob hauv cov neeg ntseeg. “Yog tus tau txais qhov pom kev.”
Kwv tij Hmoob sawv daws ! Hnub no peb tham txog Zam ntawv Moo Zoo zaj 9 : 1-41 los xaus li no xwb. Thov Huab Tais Yes Xus Pleev lub txiaj ntsim nrog nej nyob, ua nej siab kaj lug. Lwm zaus peb mam sib ntsib dua, nej sawv daws nyob zoo !
