Tswv Qhia Liab Lais Fais Thas Tis hais tias “Kev rov tim ntsej tim muag tshiab nrog Leej Pleev yog lub siab ntseeg nyob As Xias lub plawv”

Hnub tim 28 lub 11 hlis 2025 yog hnub tim ob hauv lub rooj Kev Tso Siab Tawm Rooj Fiv Ntuj Loj, Tswv Qhia Liab Las Fais Thas Tis tus Tuam Tswv Qhia Loj nyob hauv lub Koom Txoos Xis Los - Mas Las Npas thiab Tuam Tswv Qhia nyob lub nroog Aws Nas Kus Las – Aas Nkas Mas Lis, Is Ntias teb uas tus hais zaj lus ‘Kev hu kom rov tim ntsej tim muag tshiab nrog Leej Pleev’. Hnub no muaj cov sawv cev tshaj 900 leej, tsis hais cov Tswv Qhia, Leej Choj, Leej Qee thiab Leej Nrog thoob As Xias teb, tuaj mloog nws lus cob qhia.

Tswv Qhia Liab Thas Tis hais tias lub siab ntseeg tsis yog ntseeg raws npe los yog kev txawj kev paub. Nws hais li no “Kev swm zaj hais txog Huab Tais Yes Xus, los yog paub txog Huab Tais Yes Xus, mas tsis txaus. Qhov tseem ceeb mas yog qhov tias peb qhib siab ntsib Huab Tais Yes Xus, yog kev tim ntsej tim muag uas Huab Tais Yes Xus hliv kev nyiam los puv peb siab, thiab txhawb peb kev ua neej thiab pub Huab Tais Yes Xus rau lwm tus vim peb nyiam thiab ntseeg lawv siab.”

Peb yam loj thiab dav ntawm kev sib tim ntsej tim muag.

Tuam Tswv Qhia Thas Tis hais tias kev rov sib tim ntsej tim muag tshiab, muaj peb yam loj thaib dav; yog tus kheej, plhis dua tshiab, thiab hloov tus kheej.

- Tus kheej: Lub siab ntseeg tsis yog hais txog lub tswv yim kev xav los cov kab ke nkaus xwb. Tiam sis lub siab ntseeg yog kev ntsib Huab Tais Yes Xus nyob hauv kev ua neej thiab kev sib fim, zoo ib yam li kev tim ntsej tim muag nrog yus tus phooj ywg sib paub zoo thiab sib nyiam sib hlub.

- Plhis dua tshiab: Tab txawm tus neeg paub Leej Pleev los tau ntev xyoo, nws muaj peev xwm rov hnov txog nws lub siab ntseeg tshiab tuaj tau. Kev sib ntsib tim ntsej tim muag yuav tob thiab muaj zog dua qub, mas tsum qhib siab txais Tswv Ntuj lub txiaj ntsim.

- Hloov tus kheej: Kev tau ntsib tim ntsej tim muag nrog Leej Pleev tseeb tiag, muaj peev xwm hloov tau peb kev xav, kho tus peb tus cwj pwm, thiab txhais peb tus yam ntxwv dua tshiab.

Tuam Tswv Qhia Thas Tis hais tias “Thaum tus neeg twg ntsib Huab Tais Yes Xus tiag lawm, nws lub neej tsis zoo li qhov qub ntxiv.”

Nws piav txog lub swm txheej nws tau txais thaum ua hauj lwm nyob hauv lub xeev Kaws Las Las, Is Ntias teb tias nws pom ntau leej lawv hloov tus kheej thaum lawv tau tim ntsej tim muag nrog Leej Pleev. Ntau leej lawv lam ua neej nyob tsis muaj qab hau, lawv tig los ua neeg muaj hom phiaj tshiab, lawv lees txais lub siab ntseeg, thiab lawv cog cag ruaj nyob hauv kev ua neej raws Huab Tais Yes Xus tus lw.

Yam cov nyom tshwj xeeb rau As Xias teb.

Tuam Tswv Qhia Thas Tis hais txog As Xias teb kev sib txawv tsis hais txuj txoog, kev teev hawm, xeem lus, thiab cov kab ke tias tej no puav leej yog kev cov nyom thiab cib fim li no “As Xias teb yog thaj chaw ntshiab Huab Tais Yes Xus yug los, ua neej nyob, tuag, thiab sawv rov los, thiab As Xias teb tseem yog thaj chaw chiv txoj kev teev hawm Yes Xus thiab.” Txawm li ntawd, nyob hauv cov teb chaws, tsoom pej xeem ntseeg txog Yes Xus yog feem tsawg, tab yog hauv Is Ntias teb lub teb chaws Leej Ntshiab Tos Mas tuaj tshaj lub Moo Zoo, los cov ntseeg tseem yog cov tsawg xws li lwm cov teb chaws thiab.

Nws lees tias tsuas yog tus neeg nws tus kheej tau tim ntsej tim muag nrog Leej Pleev xwb, thiaj li pub Leej Pleev rau luag lwm tus tau. “Peb yuav piav txog Huab Tais Yes Xus Pleev tau, mas thawj yam yog peb tsum muaj zaj hais txog peb kev ntsib Huab Tais Yes Xus. Tus tau muaj swm txheej nrog Leej Pleev, nws yuav nyob ntsiag ntsiag tsis tau. Zoo li nws raug yuam kom tsum piav rau luag tej mloog.”

Kev ua neej thiab kev faib lub siab ntseeg cog cag nyob hauv kev nyiam.

Tuam Tswv Qhia txhib sawv daws kom ua lub neej thiab faib lawv lub siab ntseeg yam xyiv fab luag ntxhi thiab muaj sia tias “Kev xyiv fab thaum tau tim ntsej tim muag ua tau kom peb kev ua tim khawv yog yam txaus ntseeg, mus tau zoo, thiab ntxim siab.”

Nws taw kom pom tias yam pab tau kom cov neeg ntseeg ntsib Leej Pleev, mas yog kev thov Ntuj ib leeg, kev twm Ntawv Ntshiab, kev koom Txoos Txi Ntuj, kev tsob hwb, thiab kev hlub cov neeg pluag cov neeg txom nyem. Tej yam li hais los no yog kev ua tim khawv txog Leej Pleev tus tawm ntsa.

Cov yawm sij tseem ceeb rau lub neej ua neeg ntseeg nyob As Xias.

Tuam Tswv Qhia Thas Tis hais txog ob peb yam tseem ceeb uas sawv daws yuav tau ras txog li no:

- Kev nrog lwm txoj kev teev hawm sib tham: Leej Pleev yog tus tseem choj thiab Leej Pleev yog tus vaj thaj yeeb coj cov kev teev hawm los sib cuag.

- Kev yoog luag txuj: Lub siab ntseeg tsum tswm rau pom nyob hauv As Xias cov txuj txoog, xeem lus, cim qauv, mas Leej Pleev thiaj yuav nkag tau mus rau hauv cov kab ke sib txawv ntau hauv lub tuam tseb.

- Kev tuav xwm cov Leej Choj: Yam tawm hauv kev sib tuav xam cov Leej Choj tuaj, tsum tau muab coj los siv coj los qhia.

- Kev cia cov hluas muaj feem xyuam: Cov hluas nyob As Xias tab tom ntsib kev pluag, kev tsis sib luag, thiab kev sib cov nyom. Kev rov tim ntsej tim muag nrog Leej Pleev dua tsum ua lub zog txhawb kom muaj kev tso siab, muaj lub siab loj siab tawv, thiab sib qhib siab.

- Xov xwm thiab kev sib txuas lus: lub ntuj tshiab kev sib txuas lus tsim nyog coj muss iv kom muaj qab hau thiab tsim txiaj, kom kev faib lub siab ntseeg mus tau zoo.

- Kev koom tes ntawm tsoom ntseeg: Tus tau txais lub Cim Ntxuav mas nws raug hu los ua tim khawv txog Leej Pleev, nws nyob poo cov pab pawg uas tej zaum cov Leej Choj mus tsis txog.

- Kev tshaib nqhis sab ntsuj plig: Ntau plhom leej neeg nyob As Xias lawv nrhiav Tswv Ntuj; lub siab ntseeg tsum tsom kom lawv pom tias Leej Pleev yog qhov lawv tab tom nrhiav.

Txhib kom ua neej nyob hauv Leej Pleev kev nyiam.

Qhov tuaj puag tom qab hauv Tuam Tswv Qhia Tas Tis cov lus cob qhia, mas yog nws txhib sawv daws kom lawv ua neej thiab sib faib lub siab ntseeg uas yog qhov ruab nrab tshaj plawv hauv lub neej ua neeg ntseeg tias “Thov kom lub tuam teb no rais ua lub siab ntseeg daim teb loj cia rau tau sau qoob nyob hauv lub ntuj tiam peb caug.” Nws hais ntxiv tias “Nyob hauv kev rov tim ntsej tim muag tshiab no, peb tawm mus ua tim khawv txog Leej Pleev kev nyiam nyob hauv peb lo lus thiab yam peb ua, peb cia siab tias lub siab ntseeg yuav nrhau cag ruaj nyob hauv As Xias teb thiab hloov As Xias teb mus ua kev to siab, kev thaj yeeb, thiab kev nyiam lub teeb tsom rau lub qab ntuj tau chaw theem.