Cov Tswv Qhia Is Ntos Nes Xias rov zeem tseeb txog kev lag luam ncaj ncees thiab kev saib xyuas txhua yam nyob ib puag ncig.
Kev muab siab rau no tshwm sim los ntawm lub rooj sau siab nruab xyoos zaum tim ob ntawm KWI los yog lub pwm tsav Tswv Qhia, uas npaj nyob hauv hnub tim 4 txog tim 10 lub 11 hlis no, hauv lub ntsiab lus ‘Tsim kev lag luam ruaj khov thiab lub tsev nyob ua ke.’ Hauv kev sib tham hnub tim 10 lub 11 hlis no nyob Jakarta, Tswv Qhia Subianto Bunjamin uas nws yog tus thawj coj cov Tswv Qhia KWI hais tias :
“Lub Koom Txoos yuav hla dhau tej kev sib tham thiab txhua yam hauj lwm mus rau kev pib uas ncaj ncees, vim yog txiaj ntsim qab hau rau ib tsoom neeg.”
Nws hais tias : “Lub Koom Txoos tsis tuaj yeem tawm lus los yog txhim kho txhua yam hauj lwm xwb.” Kev lag luam yog qhov tseem ceeb rau neeg lub meej mom, tshwj xeeb tshaj yog kev xav tau ntawm cov neeg pluag txom nyem.
Cov Tswv Qhia tau tuav xam hais txog kev tos txais yam yuav tshwm sim, nrog rau kev pab cov neeg tau txais kev kub ntxhov los ntawm av qeeg, dej nyab thiab av xaub. Lawv tseem cog lus tias yuav tsim kev txhawb nqa tib neeg kev ncaj ncees los ntawm cov hauj lwm hauv lub Caij Plaub Caug. AI lub tswv yim tsim tawm kuj yog ib qhov tseem ceeb kawg. Tswv Qhia Subianto hais txog kev vam meej ntawm Technology tias ; yuav tsum hwm kev ncaj ncees thiab ua hauj lwm rau ib tsoom neeg.
Nws hais tias : “AI lub tswv yim tsim tawm yuav tsis ua kom neeg poob ua qhev, tab sis yog yam twj ua hauj lwm rau neeg.” Lub rooj sau siab tau xav txog kev npaj rau cov tub ntxhais hluas Is Ntos Nes Xias hnub nyob Sorong xyoo 2027, hauv Pas Puas xib fab naj. Tus lwm thawj tswj KWI uas yog Tswv Qhia Adrianus Sunarko hais txog qhov tseem ceeb hauv kev npaj txhij fab ntsuj plig, thiab kev saib xyuas kev ntseeg rau cov tub ntxhais hluas. Cov Tswv Qhia zeem tseeb txog lawv kev muab siab rau txog kev thaj yeeb thiab kev sib tham nyob Pas Puas, uas kev phem thiab kev chim siab hauv zej zog yog qhov txhawj xeeb.
Kev sau siab xaus rau lub thaj txi Ntuj nyob Jakarta, muaj Vas Tis Kas tus tiam lis nyob Jakarta uas yog Tswv Qhia Walter Erbi ua tus coj lub Txoos. Nws tau txhib kom cov Kav Tos Liv ua kom pom txog lawv txoj kev ntseeg nyob hauv cov lus hais, kev nqis tes ua thiab kev pab luag tej.
